Read tsotso KHURULA 34 Bible Online

KHURULA 34 - tsotso bible

KHURULA 34

¹Mwami Nyasaye yavoolela Musa, “Khonga machina kandi kavili, khuli ku khuraanga yako; ninzi niitsa khuhandika khuko, makhuva kali ni kahandikwa khu machina kavili kakhongwa kali ku khuraanga, ka watong'olanyinya.

²Yirecheshe mukamba mu mavwevwe, ma unine ikulu khu Shikulu shia Sinai khwitsa khumbukanilayo.

³Mundu avuli khukhulondayo; mundu akhalolekhakhu shia havundu hosi khu shikulu shienesho tawe; khali makondi inoho tsing'ombe vikhayakhu vunyasi himbi khu shikulu shienesho tawe.”

⁴Nalwo lwa Musa yakhonga machina kandi kavili, khuli machina kali ku khuraanga yako. Yasimukha mu mavwevwe natsia khu Shikulu shia Sinai nachinji machina kenako, khuli Mwami Nyasaye yali namuvoolele akhole.

⁵Mwami Nyasaye yikha hasi mu malesi, nasinjila na Musa hawenaho, navoola havulavu lira lielie litakatifu, lira lialaangwangwa Mwami Nyasaye.

⁶Mwami Nyasaye yavirila imbeli wewe nalaanga, “Inzi, Mwami Nyasaye, ninzi Nyasaye witsula tsimbavasi khandi uvelelanga vandu, ukhanyala khuvukula vurima vu vwangu tawe; navutswa umanyinyanga vuyaanzi vwi mihika ni mihika, khandi vusuuvilwa.

⁷Nzilililanga khwitsushitsa lilaaka lianje khu vandu va makhula tsiheelefu ni tsiheelefu, masemeha vandu khurula mu vindu vitamanu nende vwoni; navutswa shinyala khulekha khusalilitsa vaana halala na vakoko vavo, vavivula vi likhula lia khavaka nende lia khane, shichila vwoni vwa vivuli vavo tawe.”

⁸Musa yinama hasi vwangu nasaala khu Mwami Nyasaye.

⁹Musa yavoola, “Mwami Nyasaye, niiva ni kilikali, uyaanzitswangwa ninzi, khureevanga utsi na khutsi. Vandu yava ni vahaaka, navutswa ukhusemehe khurula mu vutamanu vweru nende vwoni vweru; ukhuhuchilile khuli vandu vovo.”

¹⁰Mwami Nyasaye yavoolela Musa, “Nombanga nunundi lilakano na Vaisraeli. Niitsa khukhola imbeli wa vandu voosi vindu viu khuchenyinya, vishili khukholwakhu shia havundu hosi mu shivala, khali mu vandu vi tsimbia tsindi tsiosi. Vandu voosi valiitsa khulola vindu viu khuchenyinya, via inzi Mwami Nyasaye, nyala khukhola, shichila nzitsanga khukhukholela shindu shilitsa khukhuvelelitsa.

¹¹Ulonde malako ka khuheetsanga nunundi. Lola! Niitsa khukhunga Vaamori, Vakanaani, Vaahitse, Vapeerizi, Vaahivi, nende Vayeebusi, lwa muliitsa khuva numwisuundanga khuvo.

¹²Muvuli khukholakhu lilakano liosi na vandu vu mu shivala shia mutsitsamu; shichila kuliitsa khuva mureeko mutamanu muno khu munyi.

¹³Nikhali, muliitsa khusambulanyinya vwaali vwavo, khupomolanyinya machina kavo matakatifu ka vasinjilitsa; nu khureemakanyinya shimanyilu shia nyasaye wavo wi shikhali Ashera.

¹⁴“Muvuli khusaalakhu khu nyasaye wundi; shichila inzi, Mwami Nyasaye nashila lishiendekha.

¹⁵Muvuli khukholakhu lilakano liosi na vandu vamenyanga mu shivala shia mutsitsamu; shichila lwa valiitsa khusaala khu vanyasaye vavo nu khuvakholela musango, valiitsa khumulaanga khusanga navo; nu khuchelitswa khulia shiukhulia shia vahaananga khu vanyasaye vavo.

¹⁶Vaana venyu vi shiyayi, vanyala khuhila vakhali vacheni venavo, valiitsa khuvimilila khwambakhana khuva vasuuvilwa khwinzi nivasaala khu vanyasaye vavo.

¹⁷“Muvuli khulombakhu vanyasaye khu vivia nu khusaala khuvo.

¹⁸“Mwitsushitse Mulukha kwi Mikati chialombwa vuchila Mamela. Muliitsa khulia mikati chialombwa vuchila mamela khumatukhu saba, mu mweli kwa Abibu, khuli namuvoolela mukhole; shichila nakwo kwali mweli kwa mwarula mu shivala shia Misri.

¹⁹“Shia mwana wi shiyayi wosi mukhulundu khwivulwa, nende muruku kwosi musatsa ku khuraanga khwivulwa, ni vianje;

²⁰navutswa muliitsa khuhavina vulamu vwi shimoli shi ipunda shiukhuraanga khwivula, numuhaana likondi havukono halio. Niiva muliitsa khuvula khukhola ndio, muliitsa khutong'ola ling'ori liayo. Havini vulamu vwa shia mwana mukhulundu wosi khwivulwa. “Mundu avuli khulolekhakhu imbeli wanje, vuchila shihanwa shiosi.

²¹“Muli na matukhu sita ka munyala khukhola muhinzilu kwenyu; navutswa muvuli khukholakhu muhinzilu kwosi khulitukhu lia saba, khali kave mumatukhu ku khulima inoho khuchesa.

²²“Muliitsa khukhola kenyekhanga khulitukhu liu Mulukha kwi Lichesa, lwa muranganga khuchesa inganu yenyu, khandi khulitukhu liu Mulukha kwa Matiili lwa muhika kuvwetsanga, nu mwakhamala khwatuula matunda kenyu.

²³“Vandu vasatsa venyu voosi, valiitsa khusaala hali khavaka khumuhika khwinzi, Mwami Nyasaye, uli Nyasaye wa Israeli.

²⁴Niitsa khumukhunjila vandu vi tsimbia tsindi tsiosi imbeli wenyu, nu khuvambalitsa mupaka kwenyu. Mundu avulakhuho, uliitsa khwikomba shivala shienyu lwa muliitsa khwitsa khusaala hali khavaka khumuhika imbeli wanje inzi Mwami Nyasaye, uli Nyasaye wenyu.

²⁵“Muvuli khuhaanakhu shihanwa shiu mukati kwalombwa na mamela, lwa muliitsa khusinza muruku ku musango. Muvuli khulekhakhu khutukha mu mavwevwe, shitonye shi inyama yu muruku kwa valiitsa khusinza, khulitukhu liu Mulukha kwa Pasaka.

²⁶“Shia khumuhika, muliitsa khulera mu inzu yu Mwami Nyasaye, uli Nyasaye wenyu imu ya muliitsa khuchesa yu khuraanga. “Muvuli khuteekhakhu shimeme shi likondi, inoho shimeme shi imbuli mu maveele ka nyina washio.”

²⁷Mwami Nyasaye yavoolela Musa, “Handika makhuva yaka hasi, shichila kholanga lilakano lianje nivi nende Vaisraeli, khulondokhana khu makhuva kenako.”

²⁸Musa yamenya havundu henaho khumatukhu makhomi kane, mbasu nu vutukhu, vuchila khung'wa matsi inoho khulia shiukhulia shiosi. Yahandika khu machina kakhongwa kenako, makhuva ki lilakano -- Malako Likhomi.

²⁹Lwa Musa yakholomokha hasi khurula khu Shikulu shia Sinai nachinji machina kavili kakhongwa ka Malako Likhomi, vweni vwevwe vwang'ang'anga, shichila yali nalomolomenje nu Mwami Nyasaye; navutswa shiyali namanyikhu vweni vwevwe vwang'ang'anga tawe.

³⁰Haruni nende vandu voosi vaheenza Musa, nivalola vweni vwevwe vwang'ang'anga; manivaria khwisuunda himbi khuye.

³¹Navutswa Musa yavalaanga. Nalwo lwa Haruni nende vimilili va Vaisraeli voosi vatsia khuye, ma Musa nalomoloma khuvo.

³²Lwa Musa yali namali khulomoloma navo, Vaisraeli voosi vitsa nivivunjelitsila khuye; ma Musa navaha malako koosi, ku Mwami Nyasaye yali namuheele khu Shikulu shia Sinai.

³³Lwa Musa yali namali khulomoloma khuvo, yavoha shitambaya mu vweni vwevwe;

³⁴isaa yosi ya yinjilanga mu Liheemo Litakatifu, khulomoloma nu Mwami Nyasaye, ya navulanga shitambaya shienesho. Lwa yarulamu, yavoolelanga Vaisraeli voosi shia shindu shiosi, shia yali navoolelwi avoole;

³⁵nivalola vweni vwevwe nu vwang'ang'anga. Musa yivohanga khandi shitambaya mu vweni vwevwe, khutukha isaa yindi yu khutsia khulomoloma nu Mwami Nyasaye.