Read tsotso KHURULA 35 Bible Online

KHURULA 35 - tsotso bible

KHURULA 35

¹Musa yalaanga halala Vaisraeli voosi navavoolela, “Yaka nako ku Mwami Nyasaye avooli mukhole:

²Muli na matukhu sita, ka munyala khukhola muhinzilu kwenyu, navutswa litukhu lia saba liliitsa khuva litakatifu. Liliitsa khuva litukhu liu khuhulukha liakholwa khuva litakatifu khwinzi. Mundu uliitsa khukholakhu muhinzilu khulitukhu lienelo, aliitsa khwiirwa.

³Muvuli khuhaambitsakhu khali mulilu mu tsingo tsienyu, khulitukhu li Lisabato lienelo.”

⁴Musa yavoolela Vaisraeli voosi, “Yaka nako ku Mwami Nyasaye avooli:

⁵Muliitsa khuhaana shihanwa khu Mwami Nyasaye. Shia mundu wosi uli ni lienya liu khukhola kenako, aliitsa khulera shihanwa shi itsahabu, ifetsa, nende mukasa;

⁶machoro malahi ku khunavakhu, ki tsimbusi tsia bulu, tsia sambarau, nende tsimuuchi; tsinguvu tsialombwa khu maseelo ki tsimbuli;

⁷maseelo ka makondi mamiiko; maseelo ki tsimbuli nende musala ku munyenye;

⁸makura ki tsitaaha; tsipila pili tsia makura ku khuvekhwa nende vindu vihuunyanga mwayu mulahi,

⁹machina ka mayayi nende machina kanyala khuvikhwa mu shiambala shiu Mukali wa vasalisi voosi, khandi mu inguvu yeye yu mu shiliru.

¹⁰“Shia mundu wosi khu munyi, wechela khukhola muhinzilu kwekwe, aliitsa khulomba shia shindu shiosi shiu Mwami yavoola alombe:

¹¹Liheemo Litakatifu, halala ni shindu shialio shiu khukhunishila mukari nende ilwanyi, tsingaka tsialio nende tsifulemu tsialio, tsisheti tsialio, misala chialio, nende lwalilu lwalio;

¹²Lisanduku li Lilakano, misala chialio, shindu shialio shiu khukhunishila, nende luvaala lu khulisuunda;

¹³imesa, misala chiayo, nende shia shindu shiosi shialio; mukati mutakatifu;

¹⁴shikuru shi itaaha tsiu khwashitsa vulavu nende vindu vi tsitaaha na makura katsio;

¹⁵vwaali vu khusambilakhu vubani nende misala chiavwo; makura ku khuvekha, vubani vuhuunyanga mwayu mulahi; luvaala lu mu vwinjililu vwi Liheemo Litakatifu;

¹⁶vwaali vwi vihanwa viu khusambwa, halala ni tsiwaya tsiahambanyinywakhu tsialombwa khu mukasa, misala chiavwo, nende vindu viavwo viosi; lukalayi lu khusavilakhu nu lwalilu lwalwo;

¹⁷tsimbala tsiu mu lwanyi, misala chiatsio nende lwalilu; luvaala lu mu vwinjililu vu mu lwanyi,

¹⁸tsingomu nende mikoye chi Liheemo Litakatifu nende lwanyi;

¹⁹nende tsinguvu tsindahi tsia vasalisi vanyala khwifwala, nivarumikhanga Havundu Hatakatifu -- tsinguvu tsindakatifu tsiu musalisi Haruni nende vaana veve.”

²⁰Vaisraeli voosi vasimukha nivarula imbeli wa Musa,

²¹khandi shia mundu wosi yali nu mwoyo ku khukhola kenako, yalera shihanwa khu Mwami Nyasaye shiu khulomba Liheemo Litakatifu. Valera vindu viosi, vienyekhanga khurumikha khusaala Mwami Nyasaye, khandi viu khunavila tsinguvu tsiu vusalisi.

²²Vandu voosi vitsaho, khali vandu vasatsa nende vakhali; vandu voosi vali nu mwoyo ku khuhaana valera tsisindani, matemba, tsipete, viuma vinyishi lukanu, nende machina manyishi kalombwa khu itsahabu lukanu nivavikhola khuva vitakatifu khu Mwami Nyasaye.

²³Shia mundu wosi wali nali ni vitambaya vilavu, vi tsimbusi tsia bulu, sambarau inoho tsimuuchi; tsinguvu tsialombwa khu vwoya vwi tsimbuli; maseelo ka makondi mamiiko mamuuchihilu; inoho liseelo lilahi, yalera.

²⁴Vandu voosi vali nu vunyali vu khuhaana ifetsa, inoho mukasa valera vihanwa viavo khu Mwami Nyasaye. Shia mundu wosi wali nu musala ku munyenye, kunyala khurumikha khu muhinzilu kwosi yakulera.

²⁵Vandu vakhali voosi vali nivechela khunaava, valera vitambaya vilavu nende tsimbusi tsia bulu, sambarau, nende tsimuuchi, tsia vali nivalomba khale.

²⁶Valomba khandi tsimbusi khu vwoya vwi tsimbuli.

²⁷Vimilili vavo valera machina ka mayayi nende machina kandi, kanyala khuvikhwa mu shiambala nende mu inguvu yu mu shiliru

²⁸nende tsipila pili halala na makura ki tsitaaha, makura kukhuvekhwa, nende vubani vuhuunyanga mwayu mulahi.

²⁹Vaisraeli voosi vali nu mwoyo ku khulera vihanwa viavo, valerela Mwami Nyasaye shichila muhinzilu kwa yali navoolele Musa akhole.

³⁰Musa yavoolela Vaisraeli, “Loli, Mwami Nyasaye urovole Bezaleli, mwana wa Uri, nali mukuuka wa Huri, khurula mu vandu vuluhia lwa Yuda.

³¹Nyasaye umuheele tsingulu tsietsie tsinyishi nende vucheli,

³²vunyali vu khukhola khandi limanya liu khukhola muhinzilu kwosi lukanu, khulomba vindu khu itsahabu, ifetsa nende mukasa;

³³ku khukhonga machina koosi lukanu; khukhonga vindu khu misala; khandi muhinzilu kundi ku khukhonga vindu vindi lukanu.

³⁴Mwami Nyasaye umuheele ye halala na Oholiabu mwana wa Ahisamaki, khurula mu vandu vuluhia lwa Dani, vucheli vu khwechitsa vandu vandi muhinzilu kwavo.

³⁵Mwami Nyasaye uvaheele vucheli, vu khukhola shia shindu shiosi mu muhinzilu kwosi lukanu kwa vakhonji, vachiori, nende vanavi vi tsinguvu tsindavu; vi tsimbusi tsia bulu, sambarau, nende tsimuuchi; khandi tsinguvu tsindi lukanu. Vali nu vunyali vu khukhola muhinzilu kwosi lukanu, nu khuchiora vindu lukanu.