Read tsotso AYUBU 11 Bible Online

AYUBU 11 - tsotso bible

AYUBU 11

¹Nalwo lwa Zofari wi litaala lia Nahamatsi yachipa Ayubu,

²“Makhuva manyishi ka ulomolome kanyala khuvula khuchipwa? Mwilomolominyi anyala khukholwa khuva wi likhola liu vulunji?

³Usuuvilanga khwilomolominya khwokhwo khunyala khuhonjelitsa vandu? Mundu avulakhuho unyala khukhuha tsisoni, lwa wu kholanga shihenye henye?

⁴Uvoolanga, ‘Makhuva kambolanga ni katoto; khandi ndi munihu imbeli wa Nyasaye.’

⁵Navutswa nakhikombi Nyasaye alomolome, akhuvoolelekhu shindu,

⁶khukhukhola khumanya makhuva kaviswa khu vusitsa, shichila vusitsa vwatoto vuli ni tsinjila tsinyishi. Khutukha umanye yaka: Khali Nyasaye wayivilila vulala khu vwoni vwovwo.

⁷“Unyala khukhavilitsa vindu viaviswa via Nyasaye? Unyala khumanya khwa Nyasaye Uli Ikulu khu Viosi atukhanga?

⁸Ali ni tsingulu tsinyishi khuvira likulu, ni shina shiunyala? Khali mukari mwene khuvira shihatisi -- Ni shina shiunyala khumanya?

⁹Tsingulu tsienetso tsili nu vuraambi khuvira lilova, khali ni tsingalamu khuvira inyanza.

¹⁰Niiva Nyasaye alavira, khukhwikalila mucheela, nu khukhukhalachila mushiina, ni viina unyala khumukaya?

¹¹Ni kilikali, Nyasaye wamanya vandu vavehi, khali naloli vutamanu, amanyanga.

¹²Navutswa mundu muyiingwa anyala khunyola vusitsa, ipunda yumbulimu ni ipunda yumbulimu.

¹³“Khali ndio, nu wihaana nu mwoyo kwosi khuye, khali nuchinga makhono koko khusaala khuye,

¹⁴niiva ulalekhana nu vwoni vwovwo, nu khuvula khuhuchililakhu vindu vitamanu khukholwa mu vandu vi inzu yoyo,

¹⁵Nalwo lwa ulilolekha imbeli wa vandu vuchila tsisoni tsiosi; uliitsa khusinjila ni tsingulu, vuchila khuria.

¹⁶Uliitsa khwivilila vutiinyu vwovwo, khuvwitsushitsa khuli michelelo chia matsi kavira khale.

¹⁷Vulamu vwovwo vulang'ang'a khuvira mbasu nu kwakhanga, khali shisuundi shiliitsa khukwa khuli vulavu mu mavwevwe.

¹⁸Uliitsa khuva ni lisuuvilitsa, shichila khuliho ni lisuuvilitswa; uliitsa khulindwa nu khuhulukha mu vulindi vulahi.

¹⁹Uliitsa khukona vuchila khuria; khali vandu vanyishi valiitsa khukhureeva vukhonyi.

²⁰Navutswa vandu vatamanu valiitsa khuvekhulitswa; vavulakhu khuli valiitsa khwihonolokha. Lisuuvilitswa liavo liukhumalilikha ni live likhutsa.”