Read tsotso AYUBU 22 Bible Online

AYUBU 22 - tsotso bible

AYUBU 22

¹Nalwo lwa Elifatsi yachipa Ayubu,

²“Mundu anyala khuva nu vukhala shina khu Nyasaye? Mundu uli nu vusitsa neye uli nu vukhala khuye.

³Ukanakananga unyala khuyaanzitsa Nyasaye Uli Ikulu khu Viosi, niiva likhola liolio ni liu vulunji? Ni shina shianyala khunyola niiva uvula vutamanu vwosi?

⁴Ukanakananga lwa uheetsanga Nyasaye luyali, nalwo lwa akhuchelihitsanga nu khukhukhalachila?

⁵Ni kilikali, vutamanu vwa wu kholanga vunyala khuva vunyishi? Vwoni vwovwo shiuvunyala khuvwa tawe.

⁶Wachila vamwavo wowo nivakhurunga likoovi liolio, nuvanavula tsinguvu, khuvarika shekenye.

⁷Wambakhana khuha yavo vali nivavwele tsingulu matsi; nuvula khuha va inzala yali niyaleka shiukhulia,

⁸khali niiva wali mundu wi tsingulu, nuli nu mulimi -- mundu waheelwa luyali neye wamenyamu.

⁹Nivi wakhunganyinya vakhutsakhali makhono makhaya; khali nuvula khukholela vavisandu ka venyanga khukholelwa.

¹⁰Nako kachilanga nureekwa mu tsimbeka tsiosi, nonoho lwa waria vuchila khumanya.

¹¹Shisuundii shiamala khukhukwila khali uvula shiulolanga; khali michelelo chia matsi chikhwihilananga.

¹²Nyasaye anyala khuva wamenya ikulu mwikulu? Lolikhu tsinyining'ini ikulu, khuli tsili ihale wene muno!

¹³Nikhali mureevanga, ‘Ni shina shia Nyasaye yamanya? Anyala khukhukhalachila shindu khuvirila mu shisuundi shikali muno?’

¹⁴Malesi malitoho ka muvotokhana, khuvula khulola, achendanga mu vushindu ikulu.

¹⁵Unyala khutsililila khukhola vindu via vandu vakholanga khale via vandu vatamanu vamenya nivakholanga?

¹⁶Varulitswaho matukhu kavo nikashili khutukha, misinji chiavo chiahilanyinywa na matsi ki michelelo.

¹⁷Navo vandu vavoolela Nyasaye, ‘Lekhana na khutsi vutswa!’ ‘Ni shina shia yivi Nyasaye Uli Ikulu khu Viosi unyala khukhukhola?’

¹⁸Khali ndio, Nyasaye neye witsulitsa vindu vilahi mu tsinzu tsiavo -- navutswa ndi ihale wene khurula khu ka vandu vatamanu valoshitsanga khukhola.

¹⁹Vandu vi likhola liu vulunji vakalolanga nivasangala; vandu vavula vutamanu vwosi va vasekhanga nu khuvachaya,

²⁰nivavoola, ‘Ni kilikali, vatsiku veru vamala khutivitswa, khandi via varika, mulilu kumali khulaalitsa.’

²¹“Ayubu, nuyaanza yihaane khu Nyasaye, umenye mu milembe; nalwo lwa uliitsa khukholelwa malahi.

²²Ulonde mivaalo khurula khuye; ure makhuva keke mu mwoyo kwokwo.

²³Niiva uliitsa khukalukha khu Nyasaye Uli Ikulu khu Viosi, ulakalushitswa muliiva liolio; nulalekhana ni vindu vitamanu via vandu vi inzu yoyo vakholanga;

²⁴niiva uliitsa khuvukula itsahabu khuli nu lukuushi, khandi itsahabu ya Ofiri khuli machina kali hasi mu muchela,

²⁵khandi niiva Nyasaye Uli Ikulu khu Viosi aliitsa khuva khuli itsahabu yoyo, khuli ifetsa yoyo yu vukuuli vululu;

²⁶toto, nalwo lwa uliitsa khuyaanzitswa mu Nyasaye Uli Ikulu khu Viosi, nu khulindilila mu lisuuvilitswa mu Nyasaye.

²⁷Uliitsa khusaala khuye, naye aliitsa khukhuchipa, nu khurweshitsa ka wisuuha uliitsa khukhola.

²⁸Likhuva lia uliitsa khuviritsa khukhola nalio liuliitsa khukholelwa, khandi vulavu vuliitsa khwakha khu injila yoyo.

²⁹Lwa vandu vakholwangwa tsisoni, mulomolomanga nu vwiloli; shichila neye ahonyinyanga vandu vichehitsi.

³⁰Nyasaye ahonyinyanga mundu uvula vutamanu vwosi; uliitsa khuhonyinywa khuvirila mu vikholwa viovio vilahi.”