Read tsotso AYUBU 27 Bible Online

AYUBU 27 - tsotso bible

AYUBU 27

¹Nalwo lwa Ayubu yalomoloma khandi navoola,

²“Nzisuuhanga khu Nyasaye uli mwoyo, unzambakhanile katoto, Nyasaye Uli Ikulu khu Viosi uchilanga ninyakhana mu mwoyo kwanje;

³lwa shili nu vulamu mwinzi, khandi shiesesanga miuya chia Nyasaye;

⁴shinyala khulomolomakhu vuvehi, inoho khukaatakhu mundu wosi tawe.

⁵Shinyala khuhuchililakhu ndi mukholi likhola liu vulunji tawe; nishili khukhutsa, shinyala khwivukula ninzi wakhola vutamanu tawe.

⁶Natsililila khuva vulunji vuchila khukhutsa mwoyo; tsinganakani tsianje tsiu mukari ni tsindahi khumatukhu koosi kashili mwoyo.

⁷“Nzikombanga mutsiku wanje asalilitswi khuli mundu mutamanu, khandi mundu ungwananga khusalilitswa khuli mundu wambakhananga likhola liu vulunji.

⁸Ni lisuuvilitswa shina liu mundu mutamanu wakorwa Nyasaye ali nalio, Nyasaye namali khumwambakhana, lwa achilanga akhutsa?

⁹Nyasaye anyala khumuhulishitsakhu lwa alilanga khwenya khukhonywa, lwa vutiinyu vumukwilanga?

¹⁰Anyala khuvakhu nu vuyaanzi imbeli wa Nyasaye Uli Ikulu khu Viosi? Anyala khusaalakhu khu Nyasaye khumatukhu koosi?

¹¹Nyala khumwechitsakhu shindu khurulana khu tsingulu tsia Nyasaye; shinyala khumuvisa ka Nyasaye Uli Ikulu khu Viosi akholanga tawe.

¹²Munyi voosi mwamala khukalola; shichila shina mulomolomanga makhuva ki shikhaya?

¹³“Yaka nako ku mundu mutamanu aliitsa khuvirilakhu khurula khu Nyasaye, khandi ka Nyasaye Uli Ikulu khu Viosi aliitsa khukhola mundu utambitsanga vandi:

¹⁴Khali niiva aliitsa khuva wayivula vaana vanyishi, valiitsa khwiirwa; khali vaana veve shivaliitsa khuva ni shiukhulia shivatukha tawe.

¹⁵Lukhutsu lutamanu luliitsa khwiira vandu valiitsa khurikala, khalivakhutsakhali vavo valivula khwikhula.

¹⁶Khali niiva wavunjikha ifetsa mu vunyishi khuli lukuushi, khandi wayivunjishila tsinguvu tsinyishi khuli litohi --

¹⁷anyala khuva avunjitsanga, navutswa mundu wu kholanga katoto aliitsa khwifwala, khandi vandu vavula vutamanu vwosi valiitsa khukavana ifetsa yeye.

¹⁸Inzu ya yumbakhanga ili khuli inzu yu luvuvi, khuli litiili liu mulindi alombanga mu mulimi.

¹⁹Atsitsanga khukona nali muhinda, navutswa nalwo lukhumalilikha; avukhanga mu tsindolo nali mumanani.

²⁰Liria limukumilanga khuli muchelelo kwa matsi; shihungutsi shimuhilananga mu vutukhu.

²¹Vushindu khurula ivukwi vumuchinguulanga khumuhila ihale wene; vumuyenzanga khurula havundu ha amenyanga.

²²Vumuhuutsanga vuchila khumuvela, lwa achelitsanga khwilukha mu shikhaya.

²³Vushindu vumuhitsanyinyanga lwa yilukhakanga, khuhuma nu khumurishitsa ni tsingulu tsiu khutivitsa.”