Read tsotso AYUBU 37 Bible Online

AYUBU 37 - tsotso bible

AYUBU 37

¹“Mwoyo kwanje kurimukhanga, khurulana khu vindu vienevo, mandechela mmbili kwosi.

²Hulishitsi vulahi vwene khuli Nyasaye ahilikananga khuli likulu, khandi khuli ahuma humanga nalomoloma.

³Asashitsanga likulu shia havundu hosi mwikulu, khandi luheni lwelwe luhemukhanga shia havundu hosi mu shivala.

⁴Namali khukhola ndio, nalwo lwa lihilikana liu mwoyo kwekwe lihulilikhananga, muhumu ku khuchenyinya kwi likulu, nonoho lwa luheni lutsilililanga khuhemukha.

⁵Nyasaye ahilikananga khuli likulu munjila yu khuchenyinya; akholanga makhuva ku khuchenyinya ka khunyala khuvula khumanya.

⁶Avoolelanga imparafu ironye khulilova, nu khukhuvitsa imbula khulilova,

⁷khwikalila vandu voosi va yaloonga khukhola mihinzilu chiavo; khwenya vandu vave nivamanyi mihinzilu chiechie.

⁸Tsinyama tsiumbulimu tsikalukhanga ha tsimenyanga, khandi tsitsililila khuva havundu ha tsikonanga.

⁹Imbuutsa indamanu ihuutsanga nirula ikuvanda, ma vushindu vululu muno vuhuutsa khurula ivuluka.

¹⁰Miuya chia Nyasaye chichilanga matsi khukwa imparafu, khali khukumilana halala khuli machina ki imparafu.

¹¹Nyasaye yelelitsanga imbula mu malesi; khali luheni lwelwe luhemukhanga shia havundu hosi,

¹²khulondokhana khuli Nyasaye yenyanga kakholeshe. Malesi ka voyong'ananga vushiama nikavotokhana khuli akimililanga, khurweshitsa koosi ka yenyanga khwikholekha mu shivala.

¹³Nyasaye yenyanga lienya lielie khwikholekha khulilova; kave nu khusalilitsa vandu, inoho khumanyinya khuli yayaanza vandu.

¹⁴“Ayubu, hulila makhuva yaka; uhonjele, ukanakane khu mihinzilu chiu khuchenyinya chia Nyasaye.

¹⁵Unyala khuva wamanya khuli Nyasaye yimililanga malesi, khandi achila luheni lwelwe luhemukha mu malesi?

¹⁶Unyala khuva wamanya khuli malesi ku mwikulu kelelanga khulala, nu kuli muhinzilu ku khuchenyinya kwa Nyasaye uli museletse mu vucheli.

¹⁷Ulolanga wayifwala tsinguvu tsiu luya lunyishi, lwa vushindu khurula ikuvanda vuhuutsanga mu shivala.

¹⁸Unyala khukhonya Nyasaye khuvambalalitsa malesi, khutinya khuli shivia shiavekhwa ilaanji?

¹⁹Khwechitsi ka khuvoolela Nyasaye; shichila khuvula shia khunyala khuvoola mu tsingakani tsieru.

²⁰Anyala khuvoolelwa ndi nyenyanga khulomoloma? Ni viina unyala khureeva khwenya khutivitswa?

²¹“Vandu shivanyala khuheenzakhu khu liuva, lwa liang'ang'anga nilili mwikulu, lwa vushindu vuviranga nu vulilavitsa tawe.

²²Nyasaye arulanga ivuluka niyang'ang'anga khuli itsahabu; vukhumi vwevwe vuchilanga khumuha luyali.

²³Shindu shivulakhuho shia khumanyi khulondokhana khu tsingulu tsia Nyasaye Uli Ikulu khu Viosi; navutswa nu watoto khandi akholanga likhola liu vulunji vuchila khukhutambitsa.

²⁴Khulwa yako, vandu vamuheetsanga luyali, shichila avula shiaheendelanga mwoyo mundu wikholanga khuva nu vusitsa.”