Read tsotso AYUBU 39 Bible Online

AYUBU 39 - tsotso bible

AYUBU 39

¹“Unyala khuva wamanya inyinga ya makondi kamenyanga mu vikulu kivulanga vimeme? Unyala khuva walolakhu khuli visusu viumbulimu nivivulanga vaana vavio?

²Unyala khuva wamanya matukhu ka viheelitsanga vaana vavio? Unyala khuva wamanyakhu litukhu lia vivulanga?

³Unyala khuva wamanya matukhu ka vishiyanga khwivula, nivimali khuhulila isalila yu khwivula?

⁴Vaana vavio vanyolanga tsingulu, vatushilanga mumbulimu mwenomo; khali valekha vanyina vavo khutsia wa venyanga.

⁵“Ni viina walakhula ipunda yumbulimu khuva indakhule? Ni viina wachivoholola?

⁶Nachiha shiangalangwi khuva havundu ha inyala khumenya, khandi khumenya havundu ha vandu vakhaywangwa khuraakwa viraakwa.

⁷Imenyanga ihale wene khurula khu liyooko lihulilikhananga mu litaala; ili hale wene khurula khu liyooko liu mundu wa ikholelanga muhinzilu.

⁸Ichenda chendanga mu vikulu nikhava vulimu vu khwaya, khali ikhavanga shia shindu shiosi shivisi.

⁹“Imbogo inyala khuhuchilila khukhurumishila? Inyala khukonakhu vutukhu vwosi mushitioli shiosi?

¹⁰Unyala khuchiachikha muchochi khukhulimila? Inoho inyala khukhwesa lichembe liu khulimila?

¹¹Unyala khuchisuuvila lwa ili ni tsingulu tsinyishi? Unyala khuchilekha khukhukholela muhinzilu kwokwo mulitoho?

¹²Uli ni lisuuvila imbogo inyala khukhuchesela viraakwa viovio, nu khukhulerela havundu hukhwilulila?

¹³“Liahutu likhuvakanga tsimbaha tsialio nu vwiloli vunyishi; navutswa likhaywangwa khupulukha khuli ling'ang'oyi.

¹⁴Lirelanga mavuyu kayo khu lukuushi, khunyola luya khurula hasi.

¹⁵Navutswa liahutu liakorwa khumanya nikava kanyala khusionolwa, inoho inyama yumbulimu khukatuuvachila hasi.

¹⁶Liahutu lilulilanga vaana valio, khuli ni vi linyonyi lindi, khali nikava muhinzilu kukhwalula nu kwi shikhaya, livula liheenda mwoyo liosi;

¹⁷shichila Nyasaye wakhola liahutu khuvula khuva nu vusitsa, khali waliima limanya.

¹⁸Navutswa indutsu niyakhenya khwilukhaka, lilekhanga inyuma ifarasi nu mundu uchihilanga.

¹⁹“Ayubu, kanyala khuva nivi waha ifarasi tsingulu, khali nuraambihitsa vwooya mwing'ori mwayo?

²⁰Unyala khuva nivi uchikholanga khurumaruma khuli isiichi? Ihoolanga mwoyo mukali kukhuhuka.

²¹Ituuvakanga mu luhoongo ni tsimbakaywa tsiayo; yilukhachilanga muliihe ni tsingulu tsiosi.

²²Ifarasi ivulakhu shindu shiu khuria, shinyala khuheenda mwoyo, khali khuria khwiirwa ni shivavi tawe.

²³Ileswangwa ni mivanu, khali lirimu lituuyananga niliang'ang'a.

²⁴Navutswa yilukhakanga vuchila khuria, nitsia mu liihe nu vululu; shisiliva nishimali khukhuvwa, shinyala khusinjila tawe.

²⁵Isaa yosi shisiliva nishimali khukhuvwa, iholanga mwoyo mukali; ihuunyilitsanga maluusu ki liihe nishili ihale wene, khuli vimilili va vasikali valaanjililanga muliihe.

²⁶“Kanyala khuva shilitsa shipulukhanga lwa yivi washechitsa, khuvambalalitsa tsimbaha tsiashio ikuvanda?

²⁷Shilitsa shilindililakhu khuvoolelwa khupulukha nu khumbakha shitsu shiashio khu vikulu?

²⁸Shilitsa shiumbakhanga shitsu shiashio khu lwanda luraambi, naho ha shivisilu shiashio shili.

²⁹Naho ha shilolelanga shia shilia; tsimoni tsiashio tsilolanga ihale wene muno.

³⁰Viminyoli viashio vinunanga masahi; khandi havundu ha shindu shiakhutsa shili, naho ha unyolanga shilitsa.”