Read tsotso AYUBU 4 Bible Online

AYUBU 4 - tsotso bible

AYUBU 4

¹Nalwo lwa Elifatsi wi litaala Temani yachipa Ayubu,

²“Niiva mundu anyala khuchelitsa khukhuvoolela likhuva unyala khulaleka mu mwoyo? Ni viina unyala khwiyikalila khulomoloma?

³Kanakanakhu khuli wechitsa vandu vanyishi, khuli watinyilitsa vandu vateteshele.

⁴Makhuva koko katinyilitsa mundu wali ni yisikarilanga, khali wakhola woyo wali navula tsingulu khuva ni tsingulu.

⁵Navutswa nunundi kakhunyoli, khali uvula likhutsila; kamali khukhukwila, uheendanga mwoyo.

⁶Khuha Nyasaye luyali kanyala khuva nalio lisuuvilitsa liolio, khali vusuuvilwa vwovwo navwo lisuuvilitswa liuli nalio?

⁷“Kanakanakhu, niiva wakhakholakhu vutamanu vwosi nuvula khutivitswa; Inoho ni hena ha mundu wi likhola liu vulunji yativitswa?

⁸Khuli nalola, vandu valimanga mu milimi mitamanu khali yavo varaakanga vutamanu khuli nu vukuutsa; navo vachesanga nunundi vwoni nende vutamanu.

⁹Nyasaye avativitsilanga mu miuya chiechie; valaalitswangwa khuvirila mu vurima vwevwe.

¹⁰Vandu vatamanu vahumanga khuli isimba indulu, navutswa Nyasaye avahonjelitsanga, avikalila khukhola ka venyanga.

¹¹Isimba yi tsingulu itivanga shichila ivula shia ilia, khali vaana vi isimba ikhali vasalananga!

¹²“Litukhu lindi, mundu yambolela likhuva muvwivisi, nahulila namoonyanga.

¹³Lialolekha khuli malolo mu vutukhu, lwa tsindolo tsinyishi tsikumilanga vandu.

¹⁴Namanya nindia, nindechela, mmbili kwanje nu kuvwa tsingulu.

¹⁵Muya ku vushindu vwambuutsa mumoni; maswa kali khu mmbili kwanje nikasinjila.

¹⁶Shindu shiasinjila vulunji imbeli wanje, lwa naheenza, navula khushimanya. Shiukhwaliho ni liyooko tawe; nahulila mwoyo nu kuvoolanga:

¹⁷‘Mundu wenyekhanga khukhutsa anyala khuva wi likhola liu vulunji khuvira Nyasaye? Mundu anyala khuva munihu khuvira Muloonji wewe?

¹⁸Khali Nyasaye shiasuuvilanga varumishi veve tawe; alolanga vutamanu mu tsinjelosi tsietsie.

¹⁹Ukanakananga anyala khusuuvila shindu shialoongwa khu litohi, shindu shiarula khu malova shinyala khusionolwa khuli inguyi?

²⁰Vandu vanyala khuva valamu mu mavwevwe, navutswa vakhutsanga khulukolovo nu khushili khutukha vuchila mundu khumanyakhu shindu shiosi.

²¹Vanuulwangwa miandu chiavo chiosi; vakhutsanga, nivashili khunyola vusitsa.’