Read tsotso AYUBU 9 Bible Online

AYUBU 9 - tsotso bible

AYUBU 9

¹Nalwo lwa Ayubu yachipa,

²“Toto, manyi vulahi ndi nindio. Navutswa mundu anyala khuva ndina wi likhola liu vulunji imbeli wa Nyasaye?

³Niiva mundu yakhamuhinjitsi, avulakhu ha anyala khutukha; avulakhu lireevo liosi lia yakhanyala khuchipakhu khali mu mareevo iheelefu indala.

⁴Nyasaye ali nu vusitsa nende tsingulu tsinyishi; shichila mundu avulakhuho unyala khumukuura.

⁵Nyasaye asuundanga vikulu vuchila khumanyakhu shindu shiosi, avitivitsa khuvirila mu vurima vwevwe.

⁶Nyasaye atechelitsanga lilova mu makono kalio, misinji chilitiilanga chinuyanyinywa.

⁷Yikalilanga liuva khuvula khwakha, khali tsinyining'ini khuvula khwashitsa vulavu.

⁸Neye wonyene wavambalalitsa likulu, khandi nasinjilitsa maruundu ki inyanza.

⁹Nyasaye yelelitsa tsinyining'ini mu malesi -- Inyining'ini ili ni Tsingulu, Orioni, plehindesu nende tsinyining'ini ikuvanda.

¹⁰Neye wu kholanga vindu viu khuchenyinya via khunyala khuvula khumanya; viloleshitsu vinyala khuvula khuvalitswa.

¹¹Lwa aviranga khwinzi, mbulakhu khuli nyala khumulola; natsia wa yenyi, shinyala khumumanyishitsa tawe.

¹²Namali khuvukula, ni viina unyala khumukaya? Ni viina unyala khumureeva, ‘Ni shina shia wu kholanga?’

¹³“Nyasaye nakumile vurima shiakalukhanga inyuma tawe; vakhonyani va Rahabu vamusikamilanga nivaria.

¹⁴Nyala khumuchipa munjila shina? Nyala khunyola hena makhuva ku khumuvoolela?

¹⁵Khali niiva mbula vutamanu vwosi vwakholi, shinyala khumuchipa tawe. Khutukha nasaya mukhalachi wanje ambele tsimbavasi.

¹⁶Khali niiva namulaanga naye anjipe, shisuuvilanga anyala khumbulishitsa tawe.

¹⁷Anyashitsanga khuvirila khu shihungutsi; akholanga nzililila khunyakhana vuchila shivune shiosi.

¹⁸Yambakhananga khumba vwiyangu vu khwesesa miuya; navutswa wachila menyanga mu vutiinyu.

¹⁹Nu khuli khuhingana naye, naye uli ni tsingulu tsinyishi khumbira! Nikali makhuva khu likhola liu vulunji, ni viina unyala khumuhila mushiina?

²⁰Khali niiva mbulakhu vutamanu vwosi vwakholi, makhuva kaanje kambolanga kanyala khukhalachila; Khali niiva ndi mundu mulahi, makhuva kaanje kamanyinyanga ninzi mukoyanu, khandi shia shindu shiosi shiambolanga shikhalachilanga.

²¹Khali niiva mbula vutamanu vwosi vwakholi, shikanyala khumbenditsa mwoyo tawe. Vulamu vwanje vwasiinya.

²²Kosi ni malala mele vutswa; nashio shivune shichilanga nimbola, ‘Nyasaye ativitsanga vandu valahi nende vatamanu.’

²³Lwa matiinyu kachilanga mundu akhutsa vuchila shivune shiosi, Nyasaye akholelanga shihenye henye vandu vavula vutamanu vwosi.

²⁴Lwa vandu vatamanu vamihanga shivala, Nyasaye avekhulitsanga vakhalachi vamenyanga mushio. Niiva shiali Nyasaye wu kholanga ndio tawe, ni viina wu kholanga kenako?

²⁵Matukhu kaanje kali vwangu khuvira mwilukhachi; kilukhanga vwangu, vuchila khunyolakhu vukhala vwosi.

²⁶Kaviranga vwangu khuli liaro lialombwa khu vitundu khu matsi; vwangu muno khuli shilitsa nishiroonyanga khu shiukhulia.

²⁷Niiva navoola, ‘Nalekha khwililila khwanje, nakalukhana mumoni mwanje, mbe nu vuyaanzi,’

²⁸navutswa linyakhana lianje likholanga khuria, shichila manyi ndi Nyasaye alavula khumbukula khuva nu vutamanu.

²⁹Lwa kholi khale vutamanu, shichila shina nzililile khunyakhana mu shikhaya?

³⁰Khali niiva nisinga matsi kashindi, nu khwisava ni isabuni makhono kaanje,

³¹khali ndio, ulandukuura mu vwina vwi indakala, khali tsinguvu tsianje khulolekha ndi mbunyanga vukuundu.

³²Nyasaye shiali mundu khuli lwandi khu muchipi, wa khunyala khutsia khuyaalana neye mushiina tawe.

³³Navutswa mundu avulakhuho unyala khukhulera halala, unyala khukhuvoolela ka khukhola khutsi vavili.

³⁴Nyasaye, nuyaanza lekha khusalilitsa ni indovoshi yoyo! Ukhakhola naria shichila lirishitswa liolio tawe!

³⁵Nalwo lwa nomoloma vuchila khukhuria, navutswa shichila nayimanya mwene, shinyala tawe.