Read tsotso TSABURI 111 Bible Online

TSABURI 111 - tsotso bible

TSABURI 111

¹Mwami Nyasaye yitsominywi! Niitsa khusanditsa nu mwoyo kwosi Mwami Nyasaye, mu shikhaalo shia vandu veve.

²Vindu viu Mwami Nyasaye akholanga ni vi tsingulu! Viyaanzitsanga vandu voosi vikombanga khuvimanya.

³Vikholwa vievie ni viu vukhumi nende vunyali; akholanga likhola liu vulunji mihika ni mihika.

⁴Mwami Nyasaye wachila vikholwa vievie viu khuchenyinya vitsushitswangwa; nu mulahi khandi wi tsimbavasi.

⁵Neye uheetsanga vandu vamuheetsanga luyali shiukhulia; arweshitsanga lilakano lielie.

⁶Wamanyinya vandu veve khuli ali ni tsingulu, lwa yavaha vivala via vandu vi tsimbia tsindi.

⁷Mihinzilu chiechie ni chiatoto khandi khusuuvilwa; mechitso keke koosi ni katoto.

⁸Kaviritswa khuvaho mihika ni mihika, kahaanwa khuvirila mu vusuuvilwa khandi katoto.

⁹Neye wakhola vandu veve khuva vavoholole; nakhola navo lilakano li mihika ni mihika. Neye mutakatifu uli ni lira liu khurishitsa!

¹⁰Khuha Mwami Nyasaye luyali nashio shirula shiu vusitsa; vandu voosi vali navwo valondanga malako keke. Aliitsa khwitsominywa mihika ni mihika.