Read tsotso TSABURI 115 Bible Online

TSABURI 115 - tsotso bible

TSABURI 115

¹Mwami Nyasaye, kavuli khwikholekha khu khutsi, kavuli khwikholekha khu khutsi, navutswa khuhaana vukhumi khu lira liolio, shichila vuyaanzi vwovwo nu vwi mihika ni mihika, khandi shichila vusuuvilwa vwovwo.

²Shichila shina vandu vi tsimbia tsindi tsiosi vareevanga khutsi, “Ni hena ha Nyasaye wenyu ali?”

³Nyasaye weru ali mwikulu; akholanga ka muyaanzitsanga.

⁴Misambwa chiavo chialombwa khu ifetsa nende itsahabu, muhinzilu kwa vandu vakhola.

⁵Chili ni minwa, navutswa chiakhaywa khulomoloma; tsimoni, navutswa chiakhaywa khulola.

⁶Chili na maroyi, navutswa chiakhaywa khuhulila; khali muulu, navutswa chiakhaywa khuhuunyishitsa.

⁷Chili na makhono, navutswa chiakhaywa khuhavaritsa khu shindu; chili ni vilenje, navutswa chiakhaywa khuchenda; inoho khulomba liyooko.

⁸Vandu voosi vachilomba vasasananga nachio, nindio khandi vandu vasuuvililanga muchio vali.

⁹Munyi Vaisraeli, mure lisuuvilitsa lienyu mu Mwami Nyasaye! Neye wu mukhonyanga khandi neye ingavo yenyu.

¹⁰Munyi vitsukhulu va Haruni, mure lisuuvilitsa lienyu mu Nyasaye; neye wu mukhonyanga khandi neye ingavo yenyu.

¹¹Munyi voosi vamuheetsanga luyali, mure lisuuvilitsa lienyu mu Mwami Nyasaye, neye wu mukhonyanga khandi neye ingavo yenyu.

¹²Mwami Nyasaye umali khukhwitsushitsa khandi alakhukasitsa; aliitsa khukasitsa Vaisraeli, aliitsa khukasitsa vitsukhulu va Haruni.

¹³Aliitsa khukasitsa vandu vamuheetsanga luyali, aliitsa khukasitsa vakali khu vati.

¹⁴Mwami Nyasaye amukhole khwivulana mu vunyishi, munyi nende vitsukhulu venyu!

¹⁵Mwami Nyasaye walomba likulu nende lilova amukasitse!

¹⁶Likulu ni lia Nyasaye wonyene, navutswa wachila vandu vamenyanga khulilova.

¹⁷Khwitsominyaa Mwami Nyasaye shiukhuli khwa vandu vakhutsa, inoho khwa yavo vayeveelwangwa mu shilindwa tawe;

¹⁸navutswa khutsi, vakhushili mwoyo, vakhuliho nunundi khandi valiitsa khuvaho mihika ni mihika. Mwami Nyasaye yitsominywi!