Read tsotso TSABURI 119 Bible Online

TSABURI 119 - tsotso bible

TSABURI 119

¹Vali ni ikhaavi vandu vavula vutamanu vwosi mu limenya liavo, vamenyanga khulondokhana khu malako ku Mwami Nyasaye.

²Vali ni ikhaavi vandu valondanga mivaalo keke, vamukhavanga nu mwoyo kwosi,

³valekhana nu vutamanu, navutswa vamenyanga khulondokhana khu lienya lielie.

⁴Mwami Nyasaye, nivi wakhuha malako koko khukalonde nu mwoyo kwosi.

⁵Nzikombanga khuva musuuvilwa lwa nondanga mivaalo koko!

⁶Nalwo lwa nilivula khunyola tsisoni, nimenya khulondokhana khu malako koko.

⁷Niitsa khukhwitsominya nindi nu mwoyo mulahi, lwa manyakhu shindu khu malako koko likhola liu vulunji.

⁸Niitsa khulonda mivaalo koko; uvuli khunzivililakhu khali hati hene!

⁹Ni shina shiu muyayi muvukha anyala khukhola khu amenye limenya lilahi? Nu khumenya khulondokhana khu likhuva liolio.

¹⁰Njelitsanga khukhukhava nu mwoyo kwosi; unzikalile khukoyana mu malako koko!

¹¹Mali khuvikha likhuva liolio mu mwoyo kwanje, nikanyalikha mbuli khukhukholela vwoni.

¹²Yivi Mwami Nyasaye, khutukha uheelwi vukhumi! Unzechitsi mechitso koko.

¹³Ngalushilanga nimbola nu mwoyo mukali malako koosi ka wamba.

¹⁴Nyanzililanga mu mivaalo koko, khuvira khuva ni miandu minyishi.

¹⁵Niitsa khuparakhu mivaalo koko, khukhola ka wenyanga.

¹⁶Niitsa khuyaanzilila mu mechitso koko; shinyala khwivilila likhuva liolio tawe.

¹⁷Mwami Nyasaye, kholela malahi, khu mbe mwoyo; nikanyalikha nonde mechitso koko.

¹⁸Unzikule tsimoni tsianje, khu ndole, vindu viatoto viu khuchenyinya mu malako koko.

¹⁹Ndi vutswa mundu mucheni mu shivala shinu; uvuli khumbisakhu malako koko.

²⁰Mwoyo kwanje kuminikhanga nu khwenya khumanya khumatukhu koosi mivaalo koko.

²¹Nivi ukondeshelanga vandu vilola, valaamwa; vambakhananga khulonda malako koko.

²²Ukhole khuva muvoholole khurula mu lichaya nende manyeko, shichila nondanga mivaalo koko.

²³Khali niiva vimilili vikhalanga nivavoolelana khuli vanziira, inzi murumishi wowo nzitsanga khuparakhu mechitso koko.

²⁴Mivaalo koko nako kanyanzitsanga! Nako kakhonyanga inganakani.

²⁵Ndi himbi khukhutsa; umbonyinyi khuvirila mu likhuva liolio.

²⁶Lwa navoola havulavu ka nali nikholi, nivi wanjipa; unzechitsi mechitso koko.

²⁷Umbe limanya khulondokhana khu mechitso koko; ninzi mparekhu shindu khu vikholwa viovio viu khuchenyinya.

²⁸Ndi nu vuveleli mu mwoyo kwanje; ndinyilitsa khuvirila khu likhuva liolio!

²⁹Unzikalile khuvoola vuvehi; unzechitsi khulonda malako koko mu tsimbavasi tsiotsio.

³⁰Mali khurovola injila yatoto; mivaalo koko kali mu mwoyo kwanje.

³¹Mwami Nyasaye, mbandanga khu mivaalo koko; undulitsi mu tsisoni!

³²Ndi nu mwoyo kukhweka shia shindu shiosi mu malako koko; shichila nivi uchilanga mba ni limanya linyishi.

³³Mwami Nyasaye, unzechitsi khuli nyala khulonda mechitso koko; nzililile khukalonda khutukha mulimalilikha.

³⁴Nzivaalilakhu shindu khu malako koko, kalonde; niitsa khukalonda nu mwoyo kwosi.

³⁵Unzimilile mu likhola khuli malako koko kenyanga, shichila ka nombanga mba nu vuyaanzi.

³⁶Umbe lienya liu khulonda malako koko, khuvira khuva ni miandu.

³⁷Unzikalile khukorela khu vindu vi shikhaya; ukholele malahi khuvirila mu lira liolio.

³⁸Ndweshitsila inzi murumishi wowo lilako liolio, lia walaaka khukholela vandu vakhuheetsanga luyali.

³⁹Undulitsi mu manyeko ka naria; shichila mivaalo koko ni malahi!

⁴⁰Nzikombanga khulonda mechitso koko; umbe vulamu vuyia, shichila likhola liolio liu vulunji.

⁴¹Mwami Nyasaye, manyinya vuyaanzi vwovwo, umbonyinyi khuli walaaka uliitsa khumbonyinya.

⁴²Nalwo lwa niitsa khuchipa vandu vanyekanga shichila suuvililanga mu likhuva liolio.

⁴³Ukhonye nomolome katoto khumatukhu koosi, shichila lisuuvilitswa lianje lili mu mivaalo koko.

⁴⁴Natsililila khuhulishitsa malako koko, mihika ni mihika.

⁴⁵Niitsa khumenya mu vuvoholole vwatoto, shichila njelitsanga khulonda mechitso koko.

⁴⁶Niitsa khuvoolela vami malako koko, khali mbuli khunyola tsisoni.

⁴⁷Nayaanzilila khulonda malako koko, shichila nakayaanza.

⁴⁸Mbetsanga malako koko ka nayaanza luyali, khali mparakhu mivaalo koko.

⁴⁹Witsushitse lilaaka lia walaaka inzi murumishi wowo; lilaaka lichilanga nimba ni lisuuvilitswa.

⁵⁰Khali nindi mu vutiinyu neminywangwa mwoyo, shichila lilaaka lia wamba lichilanga nimba mwoyo.

⁵¹Vandu vilola vamenya nivanjayanga, navutswa shili khwambakhanakhu khulonda malako koko.

⁵²Mwami Nyasaye, ninganakanakhu mivaalo koko khurula khale, inzi mwene nzileminyanga mwoyo.

⁵³Vurima vululu muno vungumilanga, nindoli vandu vatamanu ni vamenekanga malako koko.

⁵⁴Mechitso koko nako kali khuli tsinyimbo tsianje, mumatukhu mati ka ndi mwoyo khulilova khunu.

⁵⁵Mwami Nyasaye, nzitsushitsanga lira liolio khali mu vutukhu, ninonda malako koko.

⁵⁶Nivi wangasitsa, shichila nondanga mechitso koko.

⁵⁷Mwami Nyasaye, nivi wa nzikombanga wonyene; ndakanga nalonda makhuva koko.

⁵⁸Khureevanga nu mwoyo kwosi umbele tsimbavasi, khuli walaaka ulakholela.

⁵⁹Mali khukanakanakhu shindu khu kakholanga mu liiva lianje, ngalushi khulonda mivaalo koko.

⁶⁰Kholanga vwangu vuchila khucheleva, khutsililila khulonda malako koko.

⁶¹Khali niiva vandu vatamanu vandekanga ni mireeko, navutswa shinyala khwivilila malako koko tawe.

⁶²Muvutukhu hakari mbukhanga mu tsindolo khukhwitsominya, shichila mivaalo koko ku vulunji.

⁶³Ndi mulina wa vandu voosi vakhuheetsanga luyali, wa yavo valondanga mechitso koko.

⁶⁴Mwami Nyasaye, lilova liayitsula vuyaanzi vwovwo; unzechitsi mechitso koko.

⁶⁵Mwami Nyasaye, ukholele inzi murumishi wowo malahi, khuli lwa wali nu walaaka uliitsa khumukholela.

⁶⁶Umbe vusitsa nende vucheli, shichila suuvilanga mu malako koko.

⁶⁷Nishili khusalilitswa, nali nanala khukhola vutamanu, navutswa nunundi nondanga likhuva liolio.

⁶⁸Nivi mulahi, khandi kukholanga ni malahi; nzechitsa khuli nyala khulonda mechitso koko.

⁶⁹Khali niiva vandu vilola valambolela vuvehi, nzilililanga khulonda nu mwoyo kwosi mivaalo koko.

⁷⁰Vayitsula likhola liu vuyiingwa mu mioyo chiavo, navutswa nyanzililanga mu malako koko.

⁷¹Nali nu vukhala lwa nasalilitswa, shichila kanomba khweka mechitso koko.

⁷²Malako ka wamba kali nu vukhonyi khwinzi, khuvira vunyishi vwi ifetsa nende itsahabu.

⁷³Nivi wanoonga na makhono koko; umbe limanya, nikanyalikha manye malako koko.

⁷⁴Yavo vakhuheetsanga luyali valiitsa khusangala nivandoli, shichila ndi ni lisuuvilitswa mu likhuva liolio.

⁷⁵Mwami Nyasaye, manyi ndi ukhalachilanga vandu khuvirila mu vulunji, khandi wasalilitsa shichila uli musuuvilwa.

⁷⁶Lekha vuyaanzi vwovwo vuneminyi mwoyo; khuli lwa wandaka inzi, uli murumishi wowo.

⁷⁷Mbela tsimbavasi, nikanyalikha mbe mwoyo; shichila nyanzililanga mu malako koko.

⁷⁸Vandu vilola vanyole tsisoni, shichila vanyashitsanga vuchila shivune shiosi; navutswa khulwanje naparakhu mivaalo koko.

⁷⁹Vandu vakhuheetsanga luyali vakalushi khwinzi, vamanye khuli vanyala khulonda mivaalo koko.

⁸⁰Nzikombanga khulonda mechitso koko munjila yatoto, nikanyalikha mbuli khunyola tsisoni!

⁸¹Mwami Nyasaye, mbwele tsingulu ninindililanga umbonyinyi; mbikhanga lisuuvilitswa lianje mu likhuva liolio.

⁸²Khayilwi khulola ninindililanga shia walaaka ulamba. Ndevanga, “Ni litukhu shina lia uliitsa khwitsa ukhonye?”

⁸³Khali niiva ndi khuli liseelo li idivai liu mwooshi kwatuumakhu; shili khwivililakhu mechitso koko.

⁸⁴Nu luhono shina lwa inzi murumishi wowo nzililila khulindilila? Ni litukhu shina lia uliitsa khusalilitsa vandu vandambitsanga?

⁸⁵Vandu vilola vanzeveela vwina ngwimu, vandu valekhana na malako koko.

⁸⁶Malako koko koosi ni ku khusuuvilwa; ukhonye, shichila vandu vandambitsanga vuchila shivune shiosi.

⁸⁷Vali nivali himbi khunziira, navutswa shili khwivililakhu mivaalo koko

⁸⁸Umbe vulamu shichila vuyaanzi vwovwo vwi mihika ni mihika, nikanyalikha nonde mechitso koko.

⁸⁹Mwami Nyasaye, likhuva liolio lihindilanga mihika ni mihika; liasimiikhwa mwikulu.

⁹⁰Vusuuvilwa vwovwo vuliho khu likhula liosi; nivi wasinjilitsa lilova mu makono kalio, nalio litsilililanga khuvaho.

⁹¹Malako koko kashiliho nunundi, shichila vindu viosi vikhurumishilanga yivi.

⁹²Niiva malako koko kakhavuli khunyanzitsa, khani nakhutsila mu vutiinyu vwanje.

⁹³Mbulakhu khuli niitsa khwivilila mivaalo koko, shichila wachila ndi mwoyo khuvirila muko.

⁹⁴Ninzi wowo -- umbonyinyi! Njelitsanga khuli nyala khulonda malako koko.

⁹⁵Vandu vatamanu vangonekhanga khundivitsa, navutswa nzitsanga khuparakhu mechitso koko.

⁹⁶Manyi vulahi ndi shia shindu shiosi shilitsa khutukha khushihakamo; navutswa malako koko ni maseletse.

⁹⁷Nayaanza muno malako koko! Nako kamparakhu khulitukhu liosi.

⁹⁸Malako koko kachilanga mba nu vusitsa vunyishi khuvira vatsiku vaanje, shichila namenya nako khumatukhu koosi.

⁹⁹Ndi ni limanya linyishi khuvira veechitsi vaanje voosi; khali mivaalo kaanje nako kamparakhu.

¹⁰⁰Ndi ni limanya linyishi khuvira vasakhulu, shichila nondanga malako koko.

¹⁰¹Nalekhana nu mwiima mutamanu, shichila nyenyanga nonde likhuva liolio.

¹⁰²Shili khwambakhanakhu mivaalo koko, shichila nivi mwene wanzechitsa.

¹⁰³Mechitso koko ni malahi khwinzi, ni malahi muno khuvira vushi vwi tsinzushi.

¹⁰⁴Nyolanga vusitsa khurula mu malako koko; khulwa yako, nayambakhana mwiima mutamanu.

¹⁰⁵Likhuva liolio lili khuli itaaha yu khunzimilila, khuli vulavu munjila yanje.

¹⁰⁶Niitsa khurweshitsa ka nalaaka, niitsa khulonda mivaalo koko ku vulunji.

¹⁰⁷Mwami Nyasaye, nyakhananga vululu muno; umbe vulamu, khuli lwa walaaka ulamba.

¹⁰⁸Mwami Nyasaye, uhuchilile lisaala lianje liu khusanditsa, unzechitsi mivaalo koko.

¹⁰⁹Khali niiva vulamu vwanje vuli mu maraava shia litukhu, mbulakhu khuli nyala khwivilila malako koko.

¹¹⁰Vandu vatamanu vandeka nu mureeko, navutswa shili khwambakhanakhu malako koko.

¹¹¹Mechitso koko kali mwinzi mihika ni mihika; nako kanyanzitsanga mu mwoyo.

¹¹²Ndovole khulonda mechitso koko khutukha khulitukhu lia niitsa khukhutsa.

¹¹³Nayambakhana vandu vahaya hayanga shichila yivi, navutswa nayaanza malako koko.

¹¹⁴Yivi uli khuli shivisilu shianje nende ingavo yanje; ndi ni lisuuvilitswa mu likhuva liolio.

¹¹⁵Munyi vandu vooni, mulekhane ninzi, nikanyalikha nonde malako ka Nyasaye wanje.

¹¹⁶Mbe tsingulu, khuli lwa wali nu walaaka, mbe mwoyo; mbuli khunyolakhu tsisoni mu lisuuvilitswa lianje.

¹¹⁷Uninde vulahi, menye mu vulindi vulahi, khali nzililile khuhulishitsa mivaalo koko.

¹¹⁸Nivi wambakhana vandu vambakhananga khulonda mivaalo koko; vupele vwavo nu vwi shikhaya.

¹¹⁹Vandu vatamanu voosi khulilova vali khuli indakala khu yivi; khulwa yako, nayaanza mivaalo koko.

¹²⁰Mmbili kwanje kutechelanga shichila nakhuria yivi; khali naria lwa ukhalachilanga vandu.

¹²¹Mali khukhola katoto khandi likhola liu vulunji; lekha khunzivala mu vatsiku vaanje.

¹²²Uninde vulahi vwene inzi murumishi wowo, uvuli khuha vandu vilola vwiyangu vukhundambitsa.

¹²³Khayilwi khulola shichila ninindililanga umbonyinyi, khurweshitsa lilaaka liolio lia walaaka khuvirila khu likhola liu vulunji.

¹²⁴Ukholele ka inzi murumishi wowo nyenyanga shichila vuyaanzi vwovwo vwi mihika ni mihika, unzechitsi mechitso koko.

¹²⁵Ninzi murumishi wowo; umbe limanya, nikalikha manye mechitso koko.

¹²⁶Mwami Nyasaye, ukholekhu shindu isaa yinu, shichila vandu vameneka malako koko.

¹²⁷Nayaanza muno malako koko khuvira itsahabu, khali khuvira itsahabu indahi yene.

¹²⁸Khulwa yako, nondanga mivaalo koko koosi; shinayaanza khukhola vindu vitamanu tawe.

¹²⁹Mechitso koko nu ku khuchenyinya; kalondanga nu mwoyo kwosi.

¹³⁰Khwivaala khwi likhuva liolio khuhaananga vulavu; khuchilanga vandu vakorwa shindu vanyola limanya.

¹³¹Neselananga ning'avuli munwa, shichila nzikombanga khumanya malako koko.

¹³²Ngalushila khali undolele tsimbavasi, khuli wu kholelanga yavo voosi vakhuyaanza.

¹³³Unzimilile mbuli khukwa, khuli lwa walaaka; vutamanu vuvuli khunzamiha.

¹³⁴Mbonyinya khurula mu vandu vandambitsanga, nikanyalikha nonde malako koko.

¹³⁵Ungasitsi inzi murumishi wowo, unzechitsi malako koko.

¹³⁶Tsimoni tsianje tsichetulukhanga miliika khuli muchela, shichila vandu vayambakhana khulonda malako koko.

¹³⁷Mwami Nyasaye, nivi wi likhola liu vulunji, malako koko ni katoto.

¹³⁸Malako ka wahaana ni ki likhola liu vulunji; kanyala khusuuvilwa.

¹³⁹Ndi nu vurima vululu mwinzi khuli mulilu, shichila vatsiku vaanje vayivilila makhuva koko.

¹⁴⁰Lilaaka liolio liachelitswa vulahi; khali inzi murumishi wowo naliyaanza.

¹⁴¹Khali niiva mbula vukhonyi khali njaywangwa, shinyala khwivililakhu mechitso koko tawe.

¹⁴²Vulunji vwovwo nu vwi mihika ni mihika, khali malako koko ni katoto.

¹⁴³Vutiinyu nende liheenda mwoyo viangwila, navutswa malako koko nako kambetsanga vuyaanzi.

¹⁴⁴Mivaalo koko ni ku vulunji mihika ni mihika; umbe limanya nikanyalikha nzililile khuva mwoyo.

¹⁴⁵Khulililanga nu mwoyo kwosi; Mwami Nyasaye, unjipi, saalanga khu yivi nu mwoyo kwanje kwosi ukhonye, manonde malako koko.

¹⁴⁶Khulililanga, nuyaanza umbonyinyi; nikanyalikha nonde mivaalo koko.

¹⁴⁷Liuva nilishili khwakha saalanga khu yivi ukhonye; mali khura lisuuvilitswa lianje mu makhuva koko.

¹⁴⁸Ndeminyanga tsimoni tsianje mu vutukhu vwosi, nikanyalikha mbe nimparakhu lilako liolio.

¹⁴⁹Mwami Nyasaye, shichila vuyaanzi vwovwo vwi mihika ni mihika, umbulili; umbonyinyi khuvirila mu vwatoto vwovwo.

¹⁵⁰Vandu venyanga khunyashitsa vuchila shivune shiosi visuundanga himbi khwinzi, vayambakhana khulonda malako koko.

¹⁵¹Navutswa Mwami Nyasaye, nivi uli himbi khwinzi, malako koko koosi ni katoto.

¹⁵²Khurula khale, nayeka khurula mu mivaalo koko; ka walomba khuvaho mihika ni mihika.

¹⁵³Lolakhu khuli nyakhananga, umbonyinyi, shichila shili khwambanakhu khulonda malako koko.

¹⁵⁴Ulinde vulamu vwanje, ukhole khuva muvoholole; umbonyinyi, khuli yivi mwene walaaka.

¹⁵⁵Vandu vatamanu valiitsa khuvula khuhonyinywa, shichila vayambakhana khulonda malako koko.

¹⁵⁶Navutswa Mwami Nyasaye, nivi uli ni tsimbavasi tsinyishi; undolele tsimbavasi, umbonyinyi!

¹⁵⁷Ndi na vatsiku vanyishi vanyashitsanga, navutswa shili khulekhakhu mivaalo koko.

¹⁵⁸Sinyishilanga vandu vambakhana khuva vasuuvilwa, shichila vayambakhana khulonda malako koko.

¹⁵⁹Mwami Nyasaye, lolakhu khuli nayaanza mivaalo koko! Ulinde vulamu vwanje, shichila vuyaanzi vwovwo.

¹⁶⁰Makhuva koko koosi ni katoto; mivaalo koko koosi ni katoto, khali kaliho mihika ni mihika.

¹⁶¹Vamihi vanyashitsanga vuchila shivune shiosi, navutswa khuheetsanga luyali shichila likhuva liolio.

¹⁶²Nzikhoyanga shichila likhuva liolio, khuli mundu uyaayanga miandu minyishi.

¹⁶³Nayambakhana vuvehi vwosi khandi vuvehi vwasiinya, navutswa nayaanza malako koko.

¹⁶⁴Khwitsominyanga hali saba khulitukhu, shichila malako koko ni ki likhola liu vulunji.

¹⁶⁵Vandu vayaanza malako koko vali ni milembe chiatoto; shindu shivulakhuho shinyala khuvisikaritsa.

¹⁶⁶Mwami Nyasaye, nivi wa nindililanga umbonyinyi, ndweshitsanga malako koko.

¹⁶⁷Nondanga mechitso koko; nakayaanza nu mwoyo kwanje kwosi.

¹⁶⁸Nondanga malako koko nende mivaalo koko; wamanya shia shindu shiosi shia kholanga.

¹⁶⁹Mwami Nyasaye, khulila khwanje khukhutushili! Umbe limanya, khuli lwa yivi mwene walaaka.

¹⁷⁰Uhulishitsi lisaala lianje, umbonyinyi khuli walaaka uliitsa khumbonyinya.

¹⁷¹Niitsa khukhwitsominya khumatukhu koosi, shichila unzechitsanga mechitso koko.

¹⁷²Niitsa khukhwimbila lwimbo khu malako koko, shichila malako koko ni ki likhola liu vulunji.

¹⁷³Wirecheshe shia khase khosi khukhonya, shichila nondanga malako koko.

¹⁷⁴Mwami Nyasaye, nivi wa nindililanga umbonyinyi, khali nyanzililanga mu malako koko.

¹⁷⁵Lekha mbe mwoyo, nikanyalikha khwitsominyi yivi; lekha mivaalo koko kakhonye.

¹⁷⁶Mbaya hayanga iyi neyo khuli likondi liakora; ukhave inzi murumishi wowo, shichila shili khwivililakhu malako koko.