Read tsotso TSABURI 132 Bible Online

TSABURI 132 - tsotso bible

TSABURI 132

¹Yivi Mwami Nyasaye, witsushitse Daudi, uvuli khwivililakhu matiinyu koosi ka yavirilamu.

²Mwami Nyasaye, uvuli khwivililakhu lilaaka lia yakhulaaka, khuli yakhwisuuhila yivi Nyasaye Uli Ikulu khu Viosi wa Yakobo,

³navoola, “Shinzitsanga khwinjilakhu mu inzu yanje inoho khukona tsindolo khu shitali shianje tawe.

⁴Shinzitsanga khuhulukhakhu inoho khukona tsindolo,

⁵nishili khuha Mwami Nyasaye havundu, hango ha Nyasaye Uli Ikulu khu Viosi wa Yakobo anyala khumenya.”

⁶Khwahulila makhuva khulondokhana khu Lisanduku li Lilakano mu Efuratsa, khwalinyola mu milimi chia Yeharimu.

⁷Khwavoola, “Hambi khutsi havundu hehe hamenyanga; leshi khutsi khusaalila imbeli wi shisoko shieshie shiu vwami.”

⁸Yivi Mwami Nyasaye, hamba winjile mu Litempeli liolio nuli ni Lisanduku li Lilakano, lili khuli shimanyilu shi tsingulu tsiotsio ma umenye mulio.

⁹Lekha vasalisi vovo vakhole shia khase khosi likhola liu vulunji; khali vandu vovo valaanjilile nu vuyaanzi.

¹⁰Nivi walaaka murumishi wowo Daudi; Mwami Nyasaye, uvuli khwambakhanakhu mwami wa yivi mwene wavekha makura.

¹¹Nivi walomba lilaaka liatoto na Daudi lilaaka lia uliitsa khuvula khumunuula: “Niitsa khwamihitsa mulala khu vaana vovo, naye aliitsa khwamiha numali khukhutsa.

¹²Niiva vaana vovo valatsilila khulonda lilakano lianje khali valonde mechitso kaanje ka vaha, vaana vavo khandi valiitsa khwikhala khu shisoko shioshio shiu vwami mihika ni mihika.”

¹³Mwami Nyasaye umali khurovola litaala likali lia Sayoni; yikombanga live hango hehe hanyala khumenya,

¹⁴“Hanu naho hambulishilanga mihika ni mihika; naho ha niitsa khumenya, shichila hanyanzitsi.

¹⁵Niitsa khuha litaala likali lia Sayoni shia shindu shiosi mu vunyishi; niitsa khwikuritsa vamanani vali mulio ni shiukhulia.

¹⁶Niitsa khukasitsa vasalisi vi litaala likali lia Sayoni mu shia shindu shiosi shia vakholanga, khali vandu vasuuvilwa mulio valiitsa khulaanjilila nu vuyaanzi.

¹⁷Niitsa khwamihitsilamu mulala khu vitsukhulu va Daudi khuva mwami wi tsingulu; niitsa khulomba mwami wanje khutsililila khwamihamu.

¹⁸Niitsa khuvikha vatsiku veve mu tsisoni, navutswa vwami vwevwe vuliitsa khuva nu vuhinda khandi khukasitswa.”