Read tsotso TSABURI 135 Bible Online

TSABURI 135 - tsotso bible

TSABURI 135

¹Mwami Nyasaye yitsominyi! Munyi varumishi vu Mwami Nyasaye, mwitsominye lira lielie, mumwitsominye

²munyi vamurumikhanga mu inzu yeye, mu lwanyi lwi inzu ya Nyasaye weru.

³Mwitsominye Mwami Nyasaye, shichila nu mulahi; mumwitsominyile mu tsinyimbo, shichila kayaanzitsanga.

⁴Mwami Nyasaye umali khurovola Yakobo khuva wewe, Vaisraeli khuva veve mwene.

⁵Manyi ndi Mwami Nyasaye, uli Nyasaye weru ali ni tsingulu tsinyishi; neye uli ni tsingulu khuvira vanyasaye vandi voosi.

⁶Mwami Nyasaye akholanga shiosi shia yenyanga, mwikulu, khulilova, mu inyanza nende luliiva lwi inyanza.

⁷Neye uleranga malesi ki imbula khurula khundulu khwi lilova; neye ulombanga tsimbeni tsi imbula, khali alera vushindu khurula mu livishilu lielie.

⁸Neye wiira vindu viu khuraanga khwivula mu shivala shia Misri, vaana vakhulundu va vandu nende vimeme vi miruku.

⁹Neye wakholayo viloleshitsu nende vindu viu khuchenyinya, khusalilitsa Mwami wa Misri nende varumishi veve voosi.

¹⁰Neye wativitsa vandu vi tsimbia tsinyishi, nu khwiira vami vi tsingulu.

¹¹Neye wiira Mwami Sihoni wa Vaamori, Mwami Ogu wa Bashani nende vami voosi va Vakanaani.

¹²Yavukula vivala viavo naha vandu veve; yahaana khu Vaisraeli.

¹³Mwami Nyasaye, lira liolio liliho mihika ni mihika, vandu vi likhula liosi valiitsa khukhwitsushitsa.

¹⁴Mwami Nyasaye aliitsa khulinda vandu veve; aliitsa khuvela tsimbavasi varumishi veve.

¹⁵Misambwa chia vandu vi tsimbia tsindi chialombwa khu ifetsa nende itsahabu; nu kuli muhinzilu kwa vandu vakhola.

¹⁶Chili ni minwa, navutswa chiakhaywa khulomoloma; chili ni tsimoni, navutswa chiakhaywa khulola.

¹⁷Chili na maroyi, navutswa chiakhaywa khuhulila; khali chiakhaywa khweselana.

¹⁸Vandu vachilomba vakwi khuli chio, ni kilikali, shia mundu wosi uli ni lisuuvilitsa muchio!

¹⁹Munyi Vaisraeli, mwitominyi Mwami Nyasaye; munyi vasalisi, mwitsominye Mwami Nyasaye!

²⁰Munyi vandu vu lwivulu lwa Levi, mwitsominye Mwami Nyasaye; munyi voosi vamuheetsanga Mwami Nyasaye luyali, mumwitsominye!

²¹Mwami Nyasaye yitsominyilwi mu Sayoni, mwitsominye woyo wumenyanga mu litaala likali lia Yerusalemi. Mwitsominye Mwami Nyasaye!