Read tsotso TSABURI 21 Bible Online

TSABURI 21 - tsotso bible

TSABURI 21

¹Mwami yikhoyanga shichila yivi Mwami Nyasaye umuheele tsingulu; ali nu vuyaanzi vunyishi khurulana khu vukhonyi vwovwo.

²Umali khumurweshitsila ka yikombanga khukholelwa; khali ushili khumwambakhanila lienya lia yenyanga akholelwi.

³Nivi wamwinjilitsa ni tsikhaavi tsiu khuchenyinya; khali nu mufwala khu murwi kwekwe itaachi yalombwa khu itsahabu.

⁴Yakhureeva vulamu, numuha -- matukhu ku khumenya manyishi, mihika ni mihika.

⁵Vukhumi vwevwe nu vwi tsingulu khuvirila mu vukhonyi vwovwo; nivi wachila ninyola vukhumi nende vunyali.

⁶Ni kilikali, nivi wamuha tsikhaavi tsi mihika ni mihika, khandi khuvaho khwokhwo khwachila nasangala nu vuyaanzi.

⁷Mwamihi wara lisuuvilitsa lielie mu Mwami Nyasaye; khandi shichila tsimbavasi tsia Nyasaye Uli Ikulu khu Viosi, aliitsa khumenya mu milembe.

⁸Yivi mwamihi uliitsa khukumila vatsiku veve voosi; uliitsa khukumila ni tsingulu shia mundu wosi ukhuhimanga.

⁹Lwa uliitsa khulolekha, nalwo lwa uliitsa khuvalaalitsa khuli mulilu kwi lijiko. Mwami Nyasaye aliitsa khuvamulula mu vululu vu vurima vwevwe, mulilu kwekwe kuliitsa khuvalaalitsa voosi.

¹⁰Nivi uliitsa khutivitsa vitsukhulu vavo khulilova khunu, khali vaana vavo valiitsa khuvula khwihonolokha.

¹¹Niiva valiitsa khuloshitsa khukhukhola vindu vitamanu, khali nivavoolelana khukhukhola vindu viu khukhusalilitsa, valiitsa khuvula khukuura;

¹²shichila uliitsa khuvakhunga vilukha, uliitsa khuvalesa ni mivanu chiochio.

¹³Mwami Nyasaye, uheelwi vukhumi shichila tsingulu tsiotsio! Khuliitsa khwimba nu khwitsominya vunyali vwovwo.