Read tsotso TSABURI 25 Bible Online

TSABURI 25 - tsotso bible

TSABURI 25

¹Mwami Nyasaye, nivi wasaalakhu.

²Nyasaye wanje, nivi wasuuvililanga, uvuli khunzivala nyole tsisoni; vatsiku vaanje vavuli khungura.

³Ni kilikali, uvuli khulekhakhu mundu usuuvililanga mu yivi anyole tsisoni; navutswa tsisoni tsikwili vandu vahinganyinya yivi.

⁴Mwami Nyasaye, nuyaanza umanyinye injila yoyo; khandi unzechitsi ka wenyanga khole.

⁵Unzimilile mu katoto koko, nu khunzechitsa, shichila nivi Nyasaye wanje, umbonyinyanga. Mbikhanga lisuuvilitswa lianje mu yivi shia litukhu.

⁶Mwami Nyasaye, witsushitse tsimbavasi tsiotsio nende vuyaanzi vwovwo, shichila vialiho khurula khale.

⁷Uvuli khwitsushitsakhu vwoni nende vindu vitamanu via nakholanga nindi muvukha. Mwami Nyasaye, unzitsushitse shichila wanyanza khandi uli mulahi shia khase khosi!

⁸Mwami Nyasaye neye mulahi khandi wi likhola liu vulunji; khulwa yako, yivaalilanga vooni khuli vanyala khumenya.

⁹Yimililanga vandu vichehitsi mu likhola liu vulunji khali aveechitsa khukhola lienya lielie.

¹⁰Shiosi shiu Mwami Nyasaye akholanga, akholanga khuvirila mu vuyaanzi nende vusuuvilwa, yavo voosi valondanga lilakano lielie khandi lienya lielie.

¹¹Mwami Nyasaye, nuyaanza khuvirila mu lira liolio, usemehe vwoni vwanje lwa vuli vunyishi.

¹²Ni viina uheetsanga Mwami Nyasaye luyali? Neye mundu wa yechitsanga khukhola ka yenyanga.

¹³Mundu khuli mwenoyo aliitsa khuva ni limenya liu vuhinda, khali vitsukhulu veve valiitsa khunyola shivala shiu khumenyamu.

¹⁴Mwami Nyasaye neye mulina wa vandu vamuheetsanga luyali; avivaalilanga kali mu lilakano lielie.

¹⁵Namenya nimbenzanga khu Mwami Nyasaye akhonye; shichila neye wonyene unyala khundulitsa mu maraava.

¹⁶Mwami Nyasaye, nuyaanza unzishevushi, umbele tsimbavasi, shichila ndi wonyene khandi nyakhananga.

¹⁷Ndulitsilaho liheenda mwoyo liandi nalio; ukhonye khurula mu vutiinyu vwanje vwosi.

¹⁸Lolakhu vutiinyu vwambirilamu nende linyakhana; usemehe khurula mu vwoni vwanje vwosi.

¹⁹Lolakhu khuli vatsiku vaanje vali vanyishi; lolakhu khuli vanzambakhana.

²⁰Ninda ma ukhonye; shinga mbuli khukuurwa, nzilushilanga mu vulindi vwovwo.

²¹Vulahi vwanje nende katoto kaanje katsililile khuninda, shichila lisuuvilitswa lianje lili mu yivi.

²²Nyasaye, nuyaanza honyinya Vaisraeli, khurula mu vutiinyu vwavo voosi!