Read tsotso TSABURI 32 Bible Online

TSABURI 32 - tsotso bible

TSABURI 32

¹Ali ni ikhaavi mundu wasemehwa vutamanu vwevwe, mundu wu vwoni vwevwe vumali khurulitswaho.

²Ali ni ikhaavi mundu wu Mwami Nyasaye yalekha khuvukulila vutamanu, mundu uli muvoholole khurula mu vuvehi.

³Lwa nali nambakhana khuvoola havulavu vwoni vwanje, naraanga khuteteshela shichila nalilanga khulitukhu liosi.

⁴Wali wamenya nusalilitsanga mbasu nu vutukhu; tsingulu tsianje tsiosi tsiavwa, khuli luya mumatukhu ki shimiyu.

⁵Nalwo lwa nakhuvoolela vwoni vwanje, shinali navisa vutamanu vwanje tawe; Navutswa niyama vwoni vwanje havulavu khu yivi Mwami Nyasaye, khali nusemeha vwoni vwanje vwosi.

⁶Khulwa yako, shia mundu wosi uli musuuvilwa khutukha asaale khu yivi; khali mumatukhu ku vutiinyu, inoho michelelo chia matsi, valiitsa khuvula khukhusalilitswa.

⁷Uli khuli havundu hanje ha nzivisanga, nivi unindanga khurula mu vutiinyu; khali numbotokhana nu vuhonyinyi vwovwo.

⁸Nyasaye avoolanga, “Niitsa khukhwivaalila khandi khwechitsi injila yulondakhu; Niitsa khukhuvoolela ka ukhola khandi khuchelihitsi.

⁹Uvuli khuva nu mwiima khuli kwi ifarasi inoho isushili, tsinyama tsivula limanya, tsimililwangwa nu mukoye inoho tsivikhwa shindu mu munwa, nikakhavele kario, shitsinyala khwisuunda himbi khu yivi tawe.”

¹⁰Vandu vatamanu valiitsa khuvirila mu matiinyu manyishi, navutswa vandu vali ni lisuuvilitsa mu Mwami Nyasaye valiitsa khulindwa nu vuyaanzi vwi mihika ni mihika.

¹¹Munyi vamuli vandu vi likhola liu vulunji, mwikhoye numusangala mu Mwami Nyasaye; Munyi vamuli ni mioyo milahi, mulaanjilile nu vuyaanzi!