Read tsotso TSABURI 35 Bible Online

TSABURI 35 - tsotso bible

TSABURI 35

¹Mwami Nyasaye, hinganyinya vandu vambinganyinyanga, ukwane na yavo vangwananga!

²Wiyavaale ingavo yoyo nende shindu shiu khwishinga, khwitsa khukhonya!

³Vukula lirimu liolio nende shivavi ukwane yavo vambitsanyinyanga, suuvilitsa utsitsanga khumbonyinya.

⁴Vandu vachelitsanga khunziira vakuurwi nu khuheelwa tsisoni; vanzikhalilanga khusalilitsa vilukhanyinywi nu khukoyana!

⁵Vave khuli ikhulio yu vushindu vuhuutsanga, lwa injelosi yu Mwami Nyasaye ivahitsanyinyanga!

⁶Vachendele khunjila yaswelelekha mu shisuundi, lwa injelosi yu Mwami Nyasaye ivahitsanyinyanga!

⁷Vandeka nu mureeko vuchila shivune shiosi; vuchila shivune shiosi vanzeveela vwina vwangwamu.

⁸Navutswa valiitsa khutivitswa nivakorelwi; valiitsa khukumilwa mu mireeko chia vene vareeka, khali vene valiitsa khukwamu valitivitswa!

⁹Nalwo lwa niitsa khwikhoya mu Mwami Nyasaye; niitsa khuva nu vuyaanzi shichila neye wambonyinya.

¹⁰Niitsa khuvoolela Mwami Nyasaye nu mwoyo kwanje kwosi, “Mwami Nyasaye, ni viina unyala khulekhanyinywa khu yivi, yivi uhonyinyanga vateteshele khurula khu vandu vi tsingulu, vandu vamanani nende vavula khwavatiila khurula khu vanuuli.”

¹¹Vashiahidi valulu valolekhanga; vandevanga mareevo khu vindu via nakorwa.

¹²Vambanzilanga vutamanu khu vulahi vwanje, khali mbe ni livelela mu mwoyo kwanje.

¹³Navutswa khali ndio, lwa vali nivalwala, nifwala inguvu ya makunia, khali nimbonga vuchila khulia mu vwichehitsi. Lwa nasaala nimbula khuchipwa,

¹⁴khuli nalilanga shichila mulina inoho amwavo wanje. Nachenda chenda iyi neyo nimbelele mu mwoyo, khuli mundu wikhulanga mama wewe.

¹⁵Navutswa lwa nisikarila vikhala yhasi nivikhoya, khali nivakhumbila; vandu va nali ninakorwa vatsililila khunyashitsa.

¹⁶Vatsililila khukholela shihenye henye, khuli vakholelanga mundu wafwokoya.

¹⁷Yivi Mwami Nyasaye, nuluhono shina lwa uliitsa khutsililila khuheenza vuchila khukhonya? Ndulitsa mu mahe kavo; mbonyinya khurula mu tsisimba tsienetso!

¹⁸Nalwo lwa niitsa khukhusanditsila mu shikhaalo shia vandu vanyishi; khukhwitsominyila imbeli wavo voosi.

¹⁹Uvuli khulekhakhu vatsiku vaanje, nivali vandu vavehi yavo, khwikhoya shichila inzi, uvuli khuhuchililakhu vandu vahimanga inzi vuchila shivune shiosi khuyaanzilila vutiinyu vwanje.

²⁰Lilomoloma liavo livulamu milembe, navutswa vakaatanga vandu vahonjela mu makhuva kavo ku vuvehi.

²¹Valomolomanga vindu vitamanu khwinzi, nivalaanjilila, “Shioo! Shioo! Khuloli vene ka wakhola!”

²²Yivi Mwami Nyasaye, umali khulola kenako; lekha khuhonjela! Mwami Nyasaye, uvuli khuva ihale wene khwinzi.

²³Mwami Nyasaye, manyinya vunyali vwovwo, nushinga khurula khu vatsiku vaanje; Nyasaye wanje, ngwanila, ungurili.

²⁴Mwami Nyasaye, nivi wi likhola liu vulunji, mbukula khuli mundu uvula vutamanu vwosi; uvuli khuhuchililakhu vatsiku vaanje khunzikhoyela.

²⁵Vavuli khuvoolelana vene, “Nu vulahi, khunyoli shia khwenyanga! Khumali khumutivitsa khuli khwenyanga!”

²⁶Vandu vikhoyelanga vutiinyu vwanje, vaheelwi tsisoni nu khukoyanyinywa; Nu vulahi nivanyoli tsisoni nu khukuurwa.

²⁷Vandu venyanga valole nimbula vutamanu vwosi, valaanjilile nu vuyaanzi nivasangala, nivatsilila khuvoola, “Mwami Nyasaye ali ni tsingulu tsinyishi! Wayaanzitswa mu vulahi vu murumishi wewe!”

²⁸Niitsa khuvoolakhu shindu khulondokhana khu vikholwa viovio viu vulunji; khali khukhwitsominya khulitukhu liosi.