Read tsotso TSABURI 42 Bible Online

TSABURI 42 - tsotso bible

TSABURI 42

¹Nyasaye wanje, khuli impongo ili nu vuluhu vu khung'wa matsi mu muchela, nindio khandi mwoyo kwanje kuli nu vuluhu khu yivi.

²Mwoyo kwanje kuli nu vuluhu khu Nyasaye, nali Nyasaye uli mwoyo. Ni litukhu shina lia niitsa khutsia khukhulola yivi Nyasaye?

³Ndilanga vutukhu nu mbasu, miliika chianje chiakwa khuli shikhulia shianje; vatsiku vaanje vatsilililanga khundeva shia litukhu, “Ni hena ha Nyasaye wowo ali?”

⁴Ndi nu vuveleli mu mwoyo kwanje, lwa nzitsushitsanga vindu via matukhu kavira, khuli ninjilanga ni shituma shia vandu vanyishi, nivimilila khutsia khwinjila mu inzu ya Nyasaye nivalaanjilila nivasangala khwitsominya Nyasaye, shituma shia vandu vanyishi nivakholanga mulukha!

⁵Shichila ndunyi mu mwoyo munjila yeneyo Shichila shina nyakhananga ndio mu mwoyo kwanje? Nzitsanga khura lisuuvilitswa lianje mu Nyasaye, shichila naraanga khumwitsominya khandi, lwali mukhonyani wanje

⁶khandi Nyasaye wanje. Ndunyi mu mwoyo kwanje, nzitsanga khukhwitsushitsa yivi Nyasaye, khuraanjila mu lusomo lwa Yorodani khutsia khutukha khu Shikulu shia Mizari.

⁷Ndi nu vuveleli mu mwoyo kwanje lwandi mu shivala shiu vurukwa, khandi nakharaanga khumukanakana. Nivi wanderela vuveleli mu mwoyo kwanje khuli maruundu ka matsi; ndi mu vukoyanu khuli michela chia matsi, khuli matsi kahilikananga nikakholomokha khutsia mu Muchela kwa Yorodani khuraanjila mu Shikulu shia Hamoni khandi mu Shikulu shia Mizari.

⁸Mwami Nyasaye aliitsa khutsililila khunyanza mbasu kwosi; ninzi niitsa khumwimbila lwimbo lu khwitsominya mu vutukhu, nilili lisaala khu Nyasaye uchilanga nimba mwoyo.

⁹Mbolelanga Nyasaye, uli khuli lwanda lwanje, “Shichila shina wanzivilila? Shichila shina nzilililanga khunyakhana vululu lwa vatsiku vaanje vandambitsanga?”

¹⁰Vang'ahitsi lwa vanyekanga, lwa vatsilililanga khundeva shia litukhu, “Ni hena ha Nyasaye wowo ali?”

¹¹Shichila shina ndunyi mu mwoyo kwanje? Shichila shina nyakhananga mu mwoyo kwanje? Niitsa khuvikha lisuuvilitswa lianje mu Nyasaye, niitsa khuraanga khandi khumwitsominya, nali mukhonyani wanje, uli Nyasaye wanje.