Read tsotso TSABURI 49 Bible Online

TSABURI 49 - tsotso bible

TSABURI 49

¹Munyi vandu voosi, muhulile! Vandu voosi vamenyanga mu shivala, muhulishitsi,

²muhulishitsi munyi vakali khu vati, vahinda na vamanani.

³Nzitsanga khulomoloma makhuva kahaananga vusitsa; tsinganakani tsianje tsilamuha limanya.

⁴Niitsa khurumishila tsinganu; nzivaale shivune shiatsio mu tsinyimbo tsi shilili.

⁵Shichila shina nyala khuria mumatukhu ku vutiinyu, lwa vandu vatamanu vandambitsanga?

⁶Vandu vatamanu vasuuvililanga mu miandu chiavo, nu khwichinjilila mu vunyishi vu vuhinda vwavo.

⁷Toto, mundu avulakhuho unyala khwihonyinya mwene; inoho khurunga Nyasaye murungu ku vulamu vwevwe,

⁸shichila murungu ku vulamu vu mundu nu vululu muno. Avula vunyali vukhurunga,

⁹khutsililila khuva mwoyo, khuvula khukhutsa.

¹⁰Toto, wamanya vulahi ndi khali vandu vu vusitsa vakhutsanga; khali vandu vayiingwa nende vasilo vativanga, valeshela vandi miandu chiavo.

¹¹Vilindwa viavo navio tsingo tsiavo mihika ni mihika; vamenyamu khumatukhu koosi, khali niiva vali vamenya mu milimi chiavo vene.

¹²Miandu chiu mundu ali nachio shichinyala khumwikalila khukhutsa tawe; aliitsa khukhutsa vutswa khuli tsinyama tsiumbulimu.

¹³Yaka nako kaliitsa khwikholekha khu vandu vali ni lisuuvilitsa liu vuvehi, limalilikha lia vandu vichinjililanga mu miandu chiavo.

¹⁴Valiitsa khuhilwa khuli makondi mu shihatisi, likhutsa nalio liliitsa khuvimilila khuli mwayi wavo. Valiitsa khuyeveelwa shia mulala mu shilindwa. Mivili chiavo chiliitsa khukuundilayo, shihatisi shiliitsa khuva khuli hango havo.

¹⁵Navutswa Nyasaye aliitsa khumbonyinya khurula mu shihatisi, shichila aliitsa khunzinjilitsa imbeli wewe.

¹⁶Uvuli khuria lwa ulolanga mundu nakwili muhinda, lwa atsilililanga khuva ni miandu mu vunyishi;

¹⁷shichila namali khukhutsa shindu shivulakhuho shialiitsa khuchinga; shialiitsa khuyeevelwa ni miandu chiechie tawe.

¹⁸Khali niiva lwa ashili mwoyo yivukulanga mwene khuli wakasitswa, khali nikava mundu yitsominywangwa nakholi shikholwa shilahi,

¹⁹aliitsa khukhutsa khuli vakuuka veve vakhutsa, valiitsa khuvula khulolakhu khandi vulavu.

²⁰Miandu chiu mundu ali nachio chiliitsa khuvula khumwikalila khukhutsa; aliitsa khukhutsa vutswa khuli tsinyama tsiumbulimu.