Read tsotso TSABURI 62 Bible Online

TSABURI 62 - tsotso bible

TSABURI 62

¹Mwoyo kwanje kunyolanga lihulukha mu Nyasaye wonyene, neye wonyene umbonyinyanga.

²Neye wonyene uli lwanda lu khuninda khandi umbonyinyanga; neye imbinga yanje, shinyala khukuurwa tawe.

³Nuluhono shina lwa munyi voosi mutsililila khukwana mundu, khumusiuva hasi, muteteshele uli khuli lukaka lwakwa hasi?

⁴Mwenyanga khumutahula khurula havundu hehe hali nu luyali; mwayaanzilila khuvoola vuvehi. Lilomoloma lienyu ni liu khukasitsa, navutswa vilaamo vili mu mioyo chienyu.

⁵Nyolanga lihulukha mu Nyasaye wonyene; shichila lisuuvilitswa lianje lirulanga muye.

⁶Neye wonyene uli lwanda lu khuninda khandi umbonyinyanga; neye imbinga yanje, shinyala khukuurwa tawe.

⁷Vuhonyinyi vwanje nende luyali virulanga khu Nyasaye; neye uli khuli lwanda lu khuninda, nzilushilanga mu Nyasaye.

⁸Munyi vandu, mure lisuuvilitsa lienyu mu Nyasaye khumatukhu koosi; mumuvoolele vutiinyu vwenyu vwosi, shichila neye wa khwilushilamu.

⁹Vandu voosi vali khuli miuya; voosi, vave vahinda nende vamanani ni shindu tawe. Nuvara khu tsilaatili, vavulakhu vulitoho vwosi; vayanguha khuvira miuya.

¹⁰Muvuli khura lisuuvilitsa lienyu mu miandu chia mwivila vandi; inoho khura lisuuvilitswa mu vindu via mwanuula vandi, khali niiva miandu chienyu nichive minyishi muno, leshi khusuuvilila muchio.

¹¹Nahulila Nyasaye navoolanga hali khanyishi ndi tsingulu tsirulanga khuye

¹²khandi vuyaanzi nu vu Mwami Nyasaye, shichila neye urunganga shia mundu wosi khulondokhana khu vikholwa vievie.