Read tsotso TSABURI 69 Bible Online

TSABURI 69 - tsotso bible

TSABURI 69

¹Yivi Nyasaye, mbonyinya! Ndi himbi khwiyinikha mu matsi.

²Niyinikhanga mu shitohi, khandi mbulakhu havundu hanyala khusinjila; ndi mu luliiva lwa matsi, khandi maruundu ka matsi kambutsanga iyi neyo.

³Mbwele tsingulu khurulana khu lisaala lianje liu khwenya khukhonywa, khandi ling'ori lianje linumanga. Tsimoni tsianje tsimali khumuuchiha, lwa nindililanga tsikhwili ukhonye.

⁴Vandu vanyishi vahimanga inzi vuchila shivune shiosi khuvira liswi lili khu murwi kwanje. Vatsiku vaanje vavoolanga vuvehi khwinzi; vali ni tsingulu khandi venyanga khunziira. Vanomba nimbana vindu viashili khuhuuvakhu.

⁵Yivi Nyasaye, wamanya vwoni vwanje; Vusilo vwanje shiuvwaviswa khu yivi tawe.

⁶Mwami Nyasaye wi Mikaanda Chiliihe, ukhalekha vandu vali ni lisuuvilitswa mu yivi khuheelwa tsisoni shichila inzi tawe. Nyasaye wa Israeli, ukhambuchilila nomolomele yavo vasaalanga khu yivi makhuva matamanu tawe!

⁷Mali khunyekwa shichila yivi khandi mali khunyola tsisoni.

⁸Nakwa vutswa khuli mundu mucheni khu vamwavo vaanje, khuli mundu urulanga mu vandu vuluhia lundi khu vandu vu munzu mweru.

⁹Vuyaanzi vwanje khu Litempeli liolio vusambanga khuli mulilu; lwa vakhunyekanga vanyekanga inzi khandi.

¹⁰Nzichehitsanga mwene lwambonganga vuchila khulia shiukhulia, navutswa vandu vanyekanga.

¹¹Lwa nzifwalanga tsinguvu tsia makunia, vandu vasekhanga.

¹²Valomolomanga khulondokhana khwinzi mu tsinjila tsi litaala, khandi vatandi vakhuva lukanu lu khukholela shihenye henye.

¹³Navutswa Mwami Nyasaye, inzi nasaala khu yivi; Nyasaye, khonya mu isaa yulolanga ulakhonya. Khonya shichila vuyaanzi vwovwo vwi tsingulu, khandi shichila urweshitsanga lilaaka liolio liu khuhonyinya.

¹⁴Khonya mbuli khwiyinikha mu shitohi; ninda mu milembe khurula mu vatsiku vaanje, khulindwa mu milembe khurula mu matsi ku luliiva.

¹⁵Ukhahuchililakhu matsi ki michelelo kambilane tawe; ukhahuchililakhu nziyinishi mu luliiva inoho khukhutsa tawe.

¹⁶Mwami Nyasaye, khonya khuvirila mu vulahi vu vuyaanzi vwovwo vwi mihika ni mihika; khonya khuvirila mu tsimbavasi tsiotsio tsiu khuchenyinya!

¹⁷Lekha khwivililakhu murumishi wowo; ndi mu vutiinyu muno -- khonya vwangu!

¹⁸Hamba himbi umbonyinyi; khonya khurula khu vatsiku vaanje.

¹⁹Nivi wamanya khuli vanyekanga, khuli mbukulwangwa vutamanu nu khukholwa tsisoni; wamanya vatsiku vaanje voosi.

²⁰Manyeko kamali khumbelelitsa mu mwoyo kwanje, khandi mbendanga mwoyo. Nakanakana nalolelwa tsimbavasi, navutswa shinalolelwa tawe; nakanakana naleminywa mwoyo, navutswa mundu avulakhuho waneminyakhu mwoyo.

²¹Lwa nali ni inzala, vamba isuumu; lwa nali nu vuluhu, vamba idivai indulu ng'wi!

²²Saalanga ndi milukha chiavo chiu khulia chivativitsi; Saalanga ndi milukha chiavo mitakatifu chivamululi.

²³Vavekhulitsi! Vakokhominywi mikongo shia khase khosi!

²⁴Valolele vurima; vasalilitse mu vululu vwovwo.

²⁵Tivitsa maheemo kavo ka vamenyamu; ukhahuchililakhu mundu khumenya mu maheemo kavo tawe.

²⁶Vatambitsanga yavo va wasalilitsa; nivalomoloma khulinyakhana lia yavo va warumula.

²⁷Tsililila khumeeta vwoni vwavo khu vundi; ukhavahonyinyakhu khali hatititi hene tawe.

²⁸Saalanga ndi mira kavo karulitswi mu shitabu shiu vulamu khandi vavuli khuvalitswa mu vandu vi likhola liu vulunji.

²⁹Navutswa salilanga vululu khandi ndi mu vutiinyu; Nyasaye, ninda khandi umbonyinyi!

³⁰Niitsa khwimba lwimbo lu khwitsominya Nyasaye; mamuhe vukhumi nu mwoyo ku khusanditsa.

³¹Yaka kalayaanzitsa Mwami Nyasaye khuvira khumusinzila ing'ombe, khuvira khumukholela musango kwi ichilishi.

³²Lwa vandu vatambitswangwa valola kenako, valasangala; yavo vasaalanga khu Nyasaye valatinyilitswa mioyo.

³³Mwami Nyasaye akhonyanga vandu vavula shindu shiosi khandi shianyala khwivilila vandu veve mucheela tawe.

³⁴Shia shindu shiosi shili mwikulu khandi khulilova, vindu viosi vili mu inyanza, vitsominyi Nyasaye.

³⁵Nyasaye aliitsa khuhonyinya vandu vamenyanga mu Sayoni nu khumbakha khandi vuyia mataala ka Yuda. Vandu veve valiitsa khumenyayo nivavukula shivala shienesho khuva shiavo,

³⁶vitsukhulu va varumishi veve valamenyamu, khandi yavo vamuyaanza valiitsa khumenyayo.