Read tsotso TSABURI 81 Bible Online

TSABURI 81 - tsotso bible

TSABURI 81

¹Mwimbile Nyasaye tsinyimbo tsiu vuyaanzi lwa akhulindanga; mwitsominyile Nyasaye wa Yakobo mu tsinyimbo!

²Mumwimbile lwimbo numukhuva manyanga; mumwimbile tsinyimbo tsindahi ni shilili nende vukhana.

³Khuvi shisiliva khuraanga mulukha, lwa mweli kulolekhanga khali mweli nu kuli kwosi.

⁴Yili nalio lilako mu Israeli, lirulanga khu Nyasaye wa Yakobo.

⁵Nyasaye neye waha Vaisraeli lilako yili, lwa yachila matiinyu nikakwila Vamisri. Mbulilanga mwoyo kwa nali nishili khuhulilakhu, nu kuvoola,

⁶“Ninzi wamurula vulitoho vwa mwali numuchinji khu maveeka kenyu, nachila numuvula khuchinga matofari.

⁷Numuli mu vutiinyu, mwananga, nimuhonyinya. Namuchipa nindi havundu hanje ha nali ninzivisi mu imbuutsa inditoho; Namuchelitsila ha tsisieveye tsia Meriba.

⁸Munyi vandu vaanje, muhulishitsi lwa muchelihitsanga! Yivi Israeli, nzikombanga umbulishitsi!

⁹Musambwa kwa nyasaye mucheni shiukuliitsa khuva mu munyi, inoho khusikamila musambwa kwa nyasaye wa vandu vi tsimbia tsindi tawe.

¹⁰Ninzi Mwami Nyasaye, uli Nyasaye wenyu, wamurulitsa mu shivala shia Misri. Reevi shia mwenyanga khulia, ninzi namwikuritsa.

¹¹“Navutswa vandu vaanje vambakhana khumbulishitsa, Vaisraeli valekhana ninzi.

¹²Navalekha vakorele mumahaaka kavo ku khulonda ka vikombanga khukhola.

¹³Nakhikombi vandu vaanje vambulishitsi, Vaisraeli valonde mwiima kwanje!

¹⁴Niitsa khukuura vatsiku vavo vwangu yuvu, nu khutivitsa vatsiku vavo venavo voosi.

¹⁵Vandu vambukulanga khuva mutamanu valiitsa khusikamila nivaria; khali valiitsa khusalilitswa mihika ni mihika.

¹⁶Navutswa niitsa khumuliishitsa inganu indahi yene, nu khumwikuritsa nu vushi vumbulimu vwi tsinzushi.”