Read tsotso TSABURI 86 Bible Online

TSABURI 86 - tsotso bible

TSABURI 86

¹Mwami Nyasaye, mbulila na maroyi koko, ukhonye, shichila ndi mumanani khandi muteteshele.

²Mbonyinya khurula mu likhutsa, shichila nondanga malako koko; umbonyinyi lwa ndi murumishi wowo khandi suuvililanga mu yivi; shichila nivi Nyasaye wanje.

³Mwami Nyasaye, mbela tsimbavasi, shichila saalanga khu yivi mbasu kwosi.

⁴Mwami Nyasaye, lomba mwoyo kwanje kusangale, shichila lisaala lianje litukhanga khu yivi.

⁵Nivi uli mulahi khu khutsi khandi usemehanga vandu, wayaanza yavo vasaalanga khu yivi shia khase khosi.

⁶Mwami Nyasaye, hulila lisaala lianje; uhulishitsi lisaala lianje liu khwenya khukhonywa.

⁷Saalanga khu yivi mumatukhu kandi mu vutiinyu, shichila nivi uchipanga lisaala lianje.

⁸Yivi Mwami Nyasaye, nyasaye wundi avulakhuho unyala khusasanyinywa khu yivi, inoho muhinzilu kuvulakhuho kwikholekha khuli mihinzilu chiochio.

⁹Mwami Nyasaye, vandu vi tsimbia tsindi tsiosi, valiitsa khwitsa khusaala khu yivi, khandi valiitsa khuhaana vukhumi khu lira liolio.

¹⁰Uli ni tsingulu tsinyishi khandi nivi wu kholanga vindu viu khuchenyinya; nivi wonyene uli Nyasaye.

¹¹Yivi Mwami Nyasaye, nzechitsa ka wenyanga khole, kalonde nu mwoyo kwi lisuuvila; nzechitsa khuli nyala khukhuha luyali.

¹²Yivi Mwami Nyasaye, uli Nyasaye wanje, niitsa khukhwitsominya nu mwoyo kwanje kwosi; niitsa khukhuha vukhumi mihika ni mihika.

¹³Vuyaanzi vwovwo vwi mihika ni mihika khwinzi nu vunyishi! Nivi wambonyinya khurula mu likhutsa.

¹⁴Yivi Nyasaye, vandu vilola venyanga khungwana; mukaanda kwa vandu valulu vakhavanga khunziira -- shindu shivulakhuho shia vamanyi khu yivi.

¹⁵Navutswa yivi Mwami Nyasaye, uli Nyasaye nivi wi tsimbavasi khandi uli nu vuyaanzi vwi mihika ni mihika, mwikhutsili, mulahi khandi musuuvilwa shia khase khosi.

¹⁶Nzishevushi, umbele tsimbavasi; mbe tsingulu inzi murumishi wowo, khandi umbonyinyi inzi mwana wu murumishi wowo.

¹⁷Yivi Mwami Nyasaye, manyinya shimanyilu shiu vulahi vwovwo; khu vatsiku vaanje valole, vanyole tsisoni, shichila yivi Mwami Nyasaye, umali khukhonya nu khuneminya mwoyo.