Read tsotso TSABURI 89 Bible Online

TSABURI 89 - tsotso bible

TSABURI 89

¹Mwami Nyasaye, niitsa khukhwimbila shia khase khosi shichila vuyaanzi vwovwo vwi mihika ni mihika; niitsa khukhulanditsa khu vandu ndi uli musuuvilwa mihika ni mihika.

²Vuyaanzi vwovwo vwi mihika ni mihika vwakholwa khuvaho mihika ni mihika, khali vusuuvilwa vwovwo vwasinjila ni tsingulu khuli likulu.

³Nivi wavoola, “Mali khukhola lilakano nu mundu wa narovola, mali khwisuuhila murumishi wanje Daudi,

⁴‘Niitsa khwamihitsa mwitsukhulu wowo mihika ni mihika, khandi khulinda shisoko shioshio shiu vwami mihika ni mihika.’ ”

⁵Mwami Nyasaye, lekha vilombe vili mwikulu vikhwitsominyi shichila vindu viu khuchenyinya via wu kholanga; vatakatifu vakhwitsominyanga khuli uli musuuvilwa!

⁶Mwami Nyasaye, ni viina unyala khusasanyinywa khu yivi mwikulu? Ni viina mu vilombe vili mwikulu uli khuli yivi Mwami Nyasaye,

⁷nivi Nyasaye waheelwa luyali mu shikhaalo shia vatakatifu; yavo voosi vakhuvotokhananga va khuheetsanga luyali, shichila uli ni tsingulu tsinyishi khandi varitsanga yivi.

⁸Yivi Mwami Nyasaye, uli Nyasaye wi Mikaanda Chiliihe, ni viina unyala khukhuvira nu vunyali, yivi uli musuuvilwa mu tsimbeka tsiosi?

⁹Nivi wamihanga inyanza ya matsi manyishi ki tsingulu; lwa maruundu ku mu inyanza karulilanga, nu kahonjelitsa.

¹⁰Nivi wakuura Rahabu manumwiira; wakuura vatsiku vovo khuvirila mu vunyali vwi tsingulu tsiotsio.

¹¹Likulu ni liolio, khali lilova khandi; nivi walomba shivala ni vindu viosi vili mushio.

¹²Nivi waloonga luveka luli ivuluka nende luveka luli ikuvanda; Shikulu shia Tabori nende Shikulu shia Hamoni vikhwimbilanga nu vuyaanzi, khuli vandu vakhwimbilanga.

¹³Uli nu vunyali vunyishi muno! Uli ni tsingulu tsiu khuchenyinya!

¹⁴Vwami vwovwo vurulananga khu likhola liu vulunji khandi katoto; vindu viosi viukholanga vimanyinyanga ndi uli musuuvilwa khandi uli nu vuyaanzi vwi mihika ni mihika.

¹⁵Mwami Nyasaye, vali ni ikhaavi yavo vimbanga tsinyimbo tsiu khukhwitsominya, vamenyanga mu vulavu vu vulahi vwovwo.

¹⁶Vikhoyanga mbasu kwosi shichila yivi, khandi vakhwitsominyanga shichila uli mulahi khuvo.

¹⁷Nivi ukhuheetsanga tsingulu tsiu khuchenyinya tsiu khukuura; khandi uchilanga khuheelwa luyali shichila wakhuyaanza.

¹⁸Mwami Nyasaye, nivi uli ingavo yeru yu khukhulinda; yivi Nyasaye Mutakatifu wa Israeli, nivi wakhuha mwami weru.

¹⁹Litukhu lindi walomolomela mu malolo, khu vandu vovo vasuuvilwa nuvoola, “Mbele musikali wamanya khukwana tsingulu; mbele wa narovola mu vandu shisoko shiu vwami.

²⁰Mali khukhola murumishi wanje Daudi khuva mwami lwa nakhamuvekha makura matakatifu.

²¹Natsililila ni tsingulu tsianje khumulinda shia khase khosi, ni kilikali, tsingulu tsianje tsialamulomba khuva ni tsingulu.

²²Vatsiku veve shivanyala khumunyala tawe; vandu vatamanu shivanyala khumukuura tawe.

²³Niitsa khumulula vatsiku veve nu khwiira shia mundu wosi ukhamwenyanga tawe.

²⁴Niitsa khuva musuuvilwa khuye khutsililila khumukholela malahi; khandi nzililile khumuha tsingulu tsiu khukuura shia khase khosi.

²⁵Niitsa khuvambalalitsa mipaka chi shivala shia yamihanga khuraanjila khu Inyanza ya Meditarenia khutsia khutukha khu Muchela kwa Efurate.

²⁶Aliitsa khumbolela, ‘Nivi tata wanje khandi Nyasaye wanje; nivi unindanga khandi muhonyinyi wanje.’

²⁷Niitsa khumukhola khuva mwana wanje wimbeli, mwami wi tsingulu tsinyishi muno mu vami vandi voosi.

²⁸Niitsa khurweshitsa shia khase khosi lilaaka lianje khuye, khandi lilakano lianje halala naye liliitsa khuva li mihika ni mihika.

²⁹Vwamihi vwevwe vuliitsa khuvaho khumatukhu koosi khuli malesi; mwitsukhulu wewe aliitsa khuva mwami shia khase khosi.

³⁰“Navutswa niiva vitsukhulu veve valiitsa khwambakhana khulonda lilako lianje ma vavuli khumenya khulondokhana khu malako kaanje,

³¹niiva valachiaya mivaalo kaanje khandi vambakhane khulonda malako kaanje,

³²niitsa khuvasalilitsa shichila vwoni vwavo; niitsa khuvakhola vanyakhane shichila vindu vitamanu viavo.

³³Navutswa natsililila khuyaanza Daudi inoho shinyala khwambakhana khurweshitsa lilaaka lianje naye tawe.

³⁴Shinyala khumeneka lilakano lianje naye tawe. Inoho ngalukhanyinyi khali lilaaka lilala khu ka namulaaka tawe.

³⁵“Lukhuraanga khandi lukhumalilikha namala khulaaka khuvirila mu lira lianje litakatifu: shinyala khukaata Daudi tawe.

³⁶Aliitsa khutsililila khuva na vitsukhulu, khandi natsililila khulinda vwami vwevwe khumatukhu koosi ka liuva liliitsa khuva niliakhanga.

³⁷Vwamihi vwevwe vulitsa khuvaho khumatukhu koosi khuli mweli, mweli kuli mu malesi kwa khulolanga.”

³⁸Navutswa uli nu vurima khu mwami wowo wa warovola; wamwivala khandi wamulekha vutswa.

³⁹Nivi wameneka lilakano liolio lia walomba nu murumishi wowo nushiuva itaachi yeye mu lukuushi.

⁴⁰Nivi wapomola masisi ki litaala lielie khandi nusambulanyinya tsimbinga tsietsie.

⁴¹Vandu voosi vavirangaho himbi vahuuvanga vindu vievie; vareende veve voosi vamukholelanga shihenye henye.

⁴²Nivi wakhonya vatsiku veve khumukuura; wavalomba voosi khhuva nu vuyaanzi.

⁴³Nivi watuhitsa viuchi vievie viu khukwanila khandi wachila nakuurwa muliihe.

⁴⁴Nivi wamunuula indovoshi yeye yu vwami manumukwishitsa khurula mu shisoko shiu vwami.

⁴⁵Nivi wamukhola musakhulu nashili khusakhula khandi numuha tsisoni.

⁴⁶Yivi Mwami Nyasaye, uliitsa khwivisa khuluhono shina? Unyala khutsililila khuvula khukhwishevukha? Nuluhono shina lutsililila khukhulolela vurima vululu khuli mulilu?

⁴⁷Yivi Mwami Nyasaye, witsushitse khumanya ndi vulamu vwanje vwayimbiha; shichila vandu va waloonga khutukha vave ni vakhutsanga!

⁴⁸Ni viina unyala khutsililila khuva mwoyo alivula khukhutsa, inoho khwihonyinya mwene khurula mu likhutsa?

⁴⁹Mwami Nyasaye, ni hena ha vindu viu vuyaanzi vwovwo vwi mihika ni mihika vili? Lilaaka lia wali nu walaaka Daudi khuvirila mu vusuuvilwa vwovwo lili hena?

⁵⁰Uvuli khwivililakhu khuli inzi, murumishi wowo nyekwangwa! Khuli nzikhutsilanga mu mwoyo kwanje manyekano ka vandu vi tsimbia tsindi tsiosi.

⁵¹Yivi Mwami Nyasaye, vatsiku vovo vanyekanga mwami wu warovola! Vamunyekanga shia havundu hosi hatsitsanga.

⁵²Mwitsominye Mwami Nyasaye mihika ni mihika! Amina! Amina!