Read tsotso TSABURI 9 Bible Online

TSABURI 9 - tsotso bible

TSABURI 9

¹Mwami Nyasaye, niitsa khukhwitsominya nu mwoyo kwosi. Niitsa khuvoolakhu shindu khu vikholwa viovio viu khuchenyinya.

²Niitsa khwimba tsinyimbo nu vuyaanzi shichila yivi. Yivi Nyasaye Uli Ikulu khu Viosi, niitsa khwimba tsinyimbo tsiu khukhwitsominya.

³Vatsiku vaanje vilukhanga lwa vakhulolanga; visikarilanga nivativitswa imbeli wowo.

⁴Nivi umali khukhalachila khandi unyoli ndi mbula vutamanu vwosi. Ukholele kali malahi mu vukhalachi vwovwo.

⁵Umali khukondeshela vandu vi tsimbia tsindi, nu khutivitsa vandu vatamanu; nivi wativitsa mira kavo khumatukhu koosi.

⁶Vatsiku veru vamali khutivitswa khumatukhu koosi; wamala khutivitsa mataala kavo, mundu avulakhuho uliitsa khuvitsushitsakhu.

⁷Navutswa Mwami Nyasaye yamihanga mihika ni mihika; wayikhala khu shisoko shieshie shiu vwami khukhalachila vandu.

⁸Aliitsa khukhalachila vandu voosi mu shivala mu likhola liu vulunji; akhalachilanga vandu shilala.

⁹Mwami Nyasaye, ali khuli imbinga ya vandu vanyashitswangwa, imbinga mumatukhu ku vutiinyu.

¹⁰Mwami Nyasaye, vandu vamanya yivi, navo vakhusuuvilila; shichila ushili khulekhakhu vandu vakhukhavanga.

¹¹Mwimbile Mwami Nyasaye wumenyanga Sayoni, tsinyimbo tsiu khwitsominya Vooleli vandu makhuva shichila vikholwa vievie!

¹²Nyasaye uvanzilanga shisahi shiasuundulwa avitsushitsanga; shianyala khwivilila khulila khwa vandu vanyashitswangwa tawe.

¹³Mwami Nyasaye, undolele tsimbavasi! Lolakhu khuli vatsiku vaanje vanyashitsanga! Mwami Nyasaye, umali khuhonyinya khurula mu likhutsa,

¹⁴khu sinjili imbeli wa vandu va Sayoni khuvavoolela vindu viosi vichilanga nikhwitsominya. Nzitsanga khwikhoya shichila wambonyinya.

¹⁵Vandu vi tsimbia tsindi vakwili mu vwina vwa vene vayeva; mureeko kwa vene vali nivareeka kuvakumile.

¹⁶Mwami Nyasaye umali khwimanyinya mwene khuli ali; khuvirila mulikhalaka lielie liu vulunji. Vandu vatamanu vareekwa ni vikholwa viavo vene.

¹⁷Vandu vatamanu valiitsa khukorela mu shihatisi, khali vandu vi tsimbia tsindi vivilila Nyasaye.

¹⁸Vandu vavula khwavatiila shivaliitsa khwivililwa khumatukhu koosi tawe; lisuuvilitswa lia vamanani liliitsa khuvula khutivitswa.

¹⁹Hamba, Mwami Nyasaye! Ukhahuchililakhu mundu wakuura tawe; lekha vandu vi tsimbia tsindi vakhalachilwi imbeli wowo!

²⁰Mwami Nyasaye, varishitse; lekha vandu vi tsimbia tsindi vamanye ndi ni vandu vutswa!