Read tsotso TSABURI 91 Bible Online

TSABURI 91 - tsotso bible

TSABURI 91

¹Woyo wosi utsitsanga khu Mwami Nyasaye khu amenye mu milembe, woyo wa Nyasaye Uli Ikulu khu Viosi atsilililanga khulinda,

²anyala khumuvoolela, “Nivi wanzilushilakhu khandi uli imbinga yanje. Nivi Nyasaye wanje; suuvilanga mu yivi.”

³Aliitsa khukhuhonyinya khurula mu maraava kaviswa khurula mu lukhutsu lukanu lwosi luleranga likhutsa.

⁴Aliitsa khukhukhunikha na mavaha keke; aliitsa khukhulinda mu vulindi vulahi; aliitsa khukhulinda ni ingavo yeye nu khukhushinga, shichila neye musuuvilwa.

⁵Uliitsa khuvula khuria maraava koosi mu vutukhu inoho khukwanwa mbasu vuchila khumanya

⁶inoho lukhutsu lwinjililanga vandu mu shisuundi inoho vindu vitamanu viiranga vandu mbasu nu kwakhanga.

⁷Vandu iheelefu vanyala khukhutsila himbi uli, vandu tsiheelefu likhomi nivakhuvotokhane, navutswa shiuliitsa khusalilitswa tawe.

⁸Uliitsa khuheenza khandi ulole khuli vandu vatamanu vasalilitswangwa.

⁹Umali khukhola Mwami Nyasaye khuva shivisilu shioshio, Nyasaye Uli Ikulu khu Viosi neye ukhulindanga,

¹⁰khu matiinyu shikanyala khukhunyola, inoho visalilitsu khuva himbi hango hoho tawe.

¹¹Nyasaye aliitsa khuvoolela tsinjelosi tsietsie tsikhusinjilile khukhulinda shia havundu hosi ha utsitsanga.

¹²Tsiliitsa khukhuchinga ikulu mu makhono katsio khukhukhola khuvula khwituuya khu lichina shilenje shioshio.

¹³Uliitsa khutuuvakanyinya tsisimba nende tsinzukha, tsisimba tsindulu muno nende tsinzukha tsiu vutsiva.

¹⁴Nyasaye avoolanga, “Niitsa khuhonyinya yavo vanyanza nu khulinda yavo vahuchililanga inzi neye Mwami Nyasaye.

¹⁵Lwa valiitsa khunaanga, navachipa; lwa valiitsa khuva mu vutiinyu, nava navo. Niitsa khuvahonyinya nu khuvaha luyali.

¹⁶Niitsa khuvakhola nivamenye khumatukhu manyishi; niitsa khuvahonyinya.”