Read tsotso TSABURI 96 Bible Online

TSABURI 96 - tsotso bible

TSABURI 96

¹Numuyaanza mwimbile Mwami Nyasaye lwimbo luyia! Munyi vandu vosi khulilova, mwimbile Mwami Nyasaye!

²Mwimbile Mwami Nyasaye, mwitsominye lira lielie! Mulanditsenje shia litukhu vikholwa vievie viu vuhonyinyi.

³Mulanditsile vandu vi tsimbia tsiosi vukhumi vwevwe, vikholwa vievie viu khuchenyinya via yakholela vandu voosi.

⁴Mwami Nyasaye nu wi tsingulu tsiosi, utushili khwitsominywa; aliitsa khuheelwa luyali khuvira vanyasaye vandi voosi.

⁵Vanyasaye va vandu vi tsimibia tsindi tsiosi ni misambwa; navutswa Mwami Nyasaye neye walomba likulu.

⁶Luyali nende vunyali viamuvotokhana; tsingulu nende vulahi viayitsula havundu hehe hatakatifu.

⁷Munyi vandu voosi khulilova, muhe Mwami Nyasaye luyali; toto, mumuhe luyali shichila vukhumi vwevwe nende tsingulu tsietsie!

⁸Muhe lira lielie luyali shichila litushili khuheelwa vukhumi; mumulerele shihanwa, numwinjila mu Litempeli lielie.

⁹Musaale khu Mwami Nyasaye havundu hehe hatakatifu; munyi voosi khulilova, mutechele imbeli wewe!

¹⁰Muvoolele vandu vi tsimbia tsindi, “Mwami Nyasaye yamihanga! Ni kilikali, shivala shiasinjilitswa ni tsingulu, shinyala khuvula khusuundiwa; aliitsa khukhalachila vandu shilala.”

¹¹Leshi likulu lisangale, khali lilova likhoye; leshi inyanza ihilikane, khandi shia shindu shiosi shili muyo;

¹²khali nu vulahi milimi nichisangali, khali shia shindu shiosi shiaraakwamu! Nalwo lwa misala chiosi mu muliru chiliitsa khwimba tsinyimbo tsiu vuyaanzi;

¹³chiliitsa khwimba imbeli wu Mwami Nyasaye, shichila yitsanga, khwitsa khukhalachila vandu voosi khulilova. Aliitsa khukhalachila vandu voosi mu shivala khuvirila mu likhola liu vulunji.