Read tsotso TSINGANU 11 Bible Online

TSINGANU 11 - tsotso bible

TSINGANU 11

¹Tsilaatili tsiu vuvehi ni shifwavi imbeli wu Mwami Nyasaye, navutswa vipimu viatoto vichilanga ava nu vuyaanzi.

²Vwiloli vwimililanga tsisoni; navutswa vwichehitsi vuleranga vusitsa.

³Vandu valahi vimililwangwa ni vikholwa viavo vilahi; Navutswa vukoyanu vwa vandu vanyala khuvula khusuuvililwa vuliitsa khuvativitsa.

⁴Vuhinda vuvula vukhonyi vwosi khulitukhu liu khusalilitswa; navutswa vikholwa viu vulunji virulitsanga mundu mu likhutsa.

⁵Vikholwa viu vulunji viu mundu musuuvilwa vichilanga amenya limenya lilahi; navutswa mundu mutamanu aliitsa khwitivitsa mwene khurulana khu vikholwa vievie vitamanu.

⁶Vikholwa viu mundu wi likhola liu vulunji vimuhonyinyanga, navutswa mundu unyala khuvula khusuuvililwa akumilwangwa mu likomba lielie.

⁷Lwa mundu mutamanu akhutsanga, lisuuvilitswa lielie litivanga naye, shichila wasuuvilila mwene mu tsingulu tsietsie.

⁸Vandu vi likhola liu vulunji varulitswangwa mu vutiinyu, vandu vatamanu vakwitsanga muvwo.

⁹Makhuva matamanu kativitsanga mureende; navutswa makhuva ku vucheli kahonyinyanga vandu vi likhola liu vulunji.

¹⁰Lwa vandu vi likhola liu vulunji vakholelwa ka venyanga, litaala likali likhoyanga; navutswa lwa vandu vatamanu vativitswangwa, vandu vasangalanga nivalaanjilila liyooko liu vuyaanzi.

¹¹Khuvirila khu tsikhaavi tsia vandu vi likhola liu vulunji, litaala likali linyolanga vuhinda; navutswa litivitswangwa khuvirila khu lilomoloma lia vandu vatamanu.

¹²Mundu uchayanga mureende wewe avula vucheli vwosi, navutswa mundu uli ni limanya atsilililanga khuhonjela.

¹³Mundu mumoonyi achendanga navoolela vandu makhuva ku muvwivisi, navutswa mundu unyala khusuuvililwa alekhanga khuvoola kaviswa.

¹⁴Ha vwimilili vu vusitsa vuvula, shivala shitivitswangwa; navutswa nu khuli na mechitso manyishi, milembe chinyolekhaho.

¹⁵Mundu wirulitsanga khusinjilila mundu mucheni uli ni likoovi, aliitsa khukwa mu maraava; navutswa woyo wambakhananga khuva musinjilili wi likoovi aliitsa khuva mu vulindi vulahi.

¹⁶Mukhali wi tsimbavasi aheelwangwa luyali, navutswa musatsa wu kholanga muhinzilu kwekwe ni tsingulu akwitsanga muhinda.

¹⁷Mundu mulahi khu vandi yinyolelanga vukhala; navutswa mundu mululu yisalilitsanga mwene.

¹⁸Mundu mutamanu anyolanga mirungu chiu vuvehi, navutswa mundu wi likhola liu vulunji anyolanga shihanwa shiatoto.

¹⁹Mundu utsilililanga khuva wi likhola liu vulunji mu likhola aliitsa khuva mwoyo, navutswa woyo ulondelelanga vindu vitamanu aliitsa khukhutsa.

²⁰Mwami Nyasaye wayambakhana vandu vi tsinganakani tsindamanu, navutswa wayaanza yavo vakholanga likhola liu vulunji.

²¹Ni kilikali, vandu vatamanu valiitsa khusalilitswa, navutswa vandu vi likhola liu vulunji valiitsa khuhonyinywa.

²²Mukhali wakaasa likoondo, uvula vucheli ali khuli ibete yalombwa khu itsahabu muliulu li ingulume.

²³Likomba liu mundu wi likhola liu vulunji lichilanga vindu vilahi nivikholekha; ka vandu vatamanu valindililanga khunyola, kachilanga nivasalilitswa.

²⁴Mundu uhaananga nu mwoyo mulala, ameetwangwa; navutswa mwimani, anuulwangwa ava mumanani.

²⁵Mundu uhaananga nu mwoyo mulala, alakholwa khuva muhinda; navutswa woyo usuminyanga wundi, aliitsa khusuminywa.

²⁶Vandu valaamanga mundu uvisanga imu vuchila khukuulitsa, nalindililanga vukuuli khumeetekha, navutswa vakasitsanga mundu ukuulitsanga.

²⁷Niiva ka ukanakananga khukhola ni malahi, uliitsa khuheelwa luyali, navutswa niiva wukhavanga vindu vitamanu, navio via atsitsanga khunyola.

²⁸Mundu wasuuvilila mu miandu chiechie aliitsa khuvungulukha, navutswa vandu vi likhola liu vulunji valiitsa khuneera khuli masambu maviisi.

²⁹Mundu ulerelanga vandu vi inzu yeye vutiinyu aliitsa khuvula shianyola. Vandu vayiingwa navo valiitsa khurumishila vandu vu vusitsa.

³⁰Vandu vi likhola liu vulunji vali khuli misala chiamanga litunda lihaananga vulamu, navutswa likhola litamanu lirulitsaho vulamu.

³¹Niiva mundu wi likhola liu vulunji aheelwangwa shihanwa khulilova khunu, ni vianga vitamanu via vandu vatamanu nende vooni vatushili khuheelwa!