Read tsotso TSINGANU 18 Bible Online

TSINGANU 18 - tsotso bible

TSINGANU 18

¹Mundu wiyenyelanga mwene shindu wayambakhana vandi; alekanga khali naheelwa inganakani indahi yu khulonda.

²Mundu muyiingwa avulakhu shiayaanzililanga mu limanya, yenyanga khuvoola vutswa kali nako mu tsinganakani.

³Lwa vwoni vunyolekhanga, khuchaya khwitsanga khandi; tsisoni tsitsanga numali khukoritsa luyali.

⁴Makhuva ku mundu kali khuli shirula shiu vusitsa, hasi mu luliiva khuli inyanza, khuli muchela kutsukulukhanga matsi.

⁵Nu vutamanu khuyaanzilila mundu mutamanu, khwambakhana khukholela mundu wi likhola liu vulunji katoto ka yenyanga khukholelwa.

⁶Makhuva ku mundu muyiingwa kraanjitsanga lilembana; arumulwangwa khurulana khu lilomoloma lielie.

⁷Lilomoloma liu mundu muyiingwa limutivitsanga mwene; makhuva kavo kamulerelanga vutiinyu.

⁸Makhuva ku mumoonyi kali khuli shiukhulia shilahi; shia mundu anyanyanga nishitsia vulunji munda.

⁹Mundu mukaara nu mutamanu mu muhinzilu kwekwe khuli mundu mutivitsi.

¹⁰Lira liu Mwami Nyasaye lili khuli munaara kwi tsingulu, vandu vi likhola liu vulunji vilushilamu khu vanyole milembe.

¹¹Mundu muhinda ali ninganakani ndi miandu chiechie nachio imbinga yeye; akanakananga ndi chimulindanga khuli lisisi liraambi.

¹²Vwichinjilili vuchilanga litivitswa linyolekha, navutswa khwichehitsa khuchilanga mundu aheelwa luyali.

¹³Khuhaana lichipu mundu nashili khuhulishitsa kali vusitswa khuli vuyiingwa khandi kaleranga tsisoni.

¹⁴Lienya liu mundu khutsililila khuva mwoyo linyala khumwikalila vulwale, navutswa niiva uheendanga mwoyo, ulatsililila khuva mulwale.

¹⁵Vandu vacheliha vali ni lienya liu khuva vacheli, khandi mundu uli nu vusitsa yenyelitsanga vucheli.

¹⁶Shihanwa shiu mundu ali nashio shimwikulilanga injila; nu khumutushitsa khu mundu wi tsingulu.

¹⁷Mundu wu khuraanga khulomoloma mushiina alolekhanga khuva wi likhola liu vulunji; nashili khureevishitswa mareevo nu mundu umuyaalanga.

¹⁸Ikura irulitsaho vutsolani; nakhwo khumala mahingani hakari ha vimilili vi tsingulu.

¹⁹Amwavo wowo wa umali khukhonya ali khuli litaala li tsingulu, navutswa khulembana khuli vutswa khuli milondi chi imbinga.

²⁰Makhuva ku mundu kanyala khumwikuritsa; yihulilanga vulahi nikamali khurweshitsa ka avetsanga navooli.

²¹Lulimi lwolwo lunyala khukhuhonyinya inoho khukhwiira; khandi vandu vayaanza khwilomolominya valiitsa khuvirila mu kenako.

²²Mundu uhili mukhali umali khunyola shindu shilahi, neyo ikhaavi khurula khu Mwami Nyasaye.

²³Mumanani asavanga shindu khuvirila mu vwichehitsi, navutswa muhinda achipanga nu vululu.

²⁴Khuliho na valina vu vuvehi, navutswa mulina watoto nu mulahi muno khuvira amwavo wewe.