Read tsotso TSINGANU 2 Bible Online

TSINGANU 2 - tsotso bible

TSINGANU 2

¹Mwana wanje, nikava ulahuchilila makhuva kaanje nu khuvula khwivilila mivaalo kaanje,

²uve muhulili khu vindu vilondokhananga nu vusitsa, nu khuchelitsa khuva nu mwoyo ku khwenya limanya;

³katoto, reeva unyole vucheli; chelitsa khwenyelitsa limanya.

⁴Niiva uliitsa khuvwenyelitsa khuli ifetsa, lwa khuvukhava khuli livishilu liaviswa;

⁵nalwo uliitsa khumanya khuha Mwami Nyasaye luyali ni shina khandi unyole vucheli vu khumanya Nyasaye.

⁶Mwami Nyasaye neye uhaananga vusitsa, khandi neye wu vucheli nende limanya virulakhu.

⁷Neye ukhonyanga vandu vi likhola liu vulunji, nivali vandu vatoto, khandi ali khuli ingavo yu khulinda yavo vali vasuuvilwa khuye.

⁸Alindanga vandu vakholanga katoto, khandi ashinga vasuuvilwa veve mu ka vakholanga.

⁹Niiva uliitsa khumbulishitsa, nalwo lwa uliitsa khumanya likhola liu vulunji, katoto, khandi shia shindu shiosi shilahi. Uliitsa khumanya shia utushili uve nukholanga;

¹⁰shichila uliitsa khuva nu vusitsa, khandi vucheli vuliitsa khuyaanzitsa mwoyo kwokwo.

¹¹Vucheli vwovwo vuliitsa khukhulonda; limanya liliitsa khukhulinda;

¹²Vuliitsa khukhwikalila khukhola shindu shitamanu; khurula khu vandu valomolomanga vindu viu vukoyanu;

¹³vandu valekhana ni limenya liu vulunji khukorela mu vindu vi shisuundi,

¹⁴vandu vayaanzililanga khukhola vindu vitamanu khandi vikhoyelanga mu vindu vitamanu vi shikhaya;

¹⁵vandu vakoyanu mu limenya liavo, vanyala khuvula khusuuvilwa mu vikholwa viavo.

¹⁶Uliitsa khuhonyinywa khurula khu mukhali muheeyi, khurula mu vuheeyi vwa makhuva keke ku khukaatilitsa,

¹⁷mukhali walekhana nu musatsa wewe wali niyamuhila, khandi wivilila lilakano lia yakhola na Nyasaye wewe.

¹⁸Niiva uliitsa khwinjila munzu mwemwe, kali khuli uli khunjila ikhuhilanga mu likhutsa. Khutsiayo nu khwisuunda khu likhutsa.

¹⁹Mundu utsitsanga khuye, aliitsa khuvula khukalukha, inoho khukalukha nashili mwoyo.

²⁰Khulwa yako, ulonde mwiima kwa vandu valahi, umenye limenya liu vulunji.

²¹Vandu vi likhola liu vulunji navo valiitsa khunyola shivala, khandi vasuuvilwa valiitsa khutsililila khuva mwoyo mushio.

²²Navutswa Nyasaye aliitsa khurulitsa vandu vatamanu mu shivala khandi aliitsa khurinyuula vooni khurula mushio khuli viraakwa virinyuulwa mu mulimi.