Read tsotso TSINGANU 23 Bible Online

TSINGANU 23 - tsotso bible

TSINGANU 23

¹Nuwikhale khulia nu mwamihi, uheenzishitsi mwene ulole ni viina uli naye mwenoyo.

²Niiva uli nu luusa liu khulia shiukhulia shinyishi, uchehitsi khulia.

³Uvuli khwikombakhu shiukhulia shieshie shinuulu, shichila shinyala khukhukaatilitsa.

⁴Uvuli khunyakhana nuchelitsanga khwenya khuva muhinda; vusitsa navwo vwenyekhananga.

⁵Tsisenti tsiotsio tsinyala khukora vwangu vutswa khuli vulavu, khuli tsiameela tsimbaha nu khuraanga khupulukha khuli shilitsa.

⁶Uvuli khuliakhu nu mundu uhuunyanga vukuundu or khwikomba viukhulia vievie;

⁷shichila avalitsanga shiuliitsa mu mwoyo kwekwe. Alakhuvoolela, “Lia, nung'wa!” Navutswa ali ihale wene khurula khu yivi.

⁸Uliitsa khusala viukhulia via walia, lisanditsa liolio liliitsa khuva li shikhaya.

⁹Uvuli khulomolomakhu shindu imbeli wu mundu muyiingwa; shichila alachaya vusitsa vuli mu makhuva koko.

¹⁰Uvuli khusuundakhu mupaka kwali kwa khale inoho khuvukula mulimi kwa vavisandu;

¹¹shichila Nyasaye, uli Muhonyinyi wavo ali ni tsingulu tsiosi, naye aliitsa khukhuyaala shichila vo.

¹²Rumishila vucheli vwovwo khulonda mechitso; rumishila maroyi koko khuhulishitsa makhuva ku vucheli.

¹³Uvuli khulekhakhu khuchelihitsa mwana; niiva ularumishila shivoko khumushuta, shianyala khukhutsa tawe.

¹⁴Niiva unyala khumushuta ni shivoko, ulamuhonyinya khurula mu likhutsa.

¹⁵Yivi mwana wanje, niiva uli nu vusitsa, khali inzi mwene niitsa khusangala.

¹⁶Niitsa khwikhoya mu mwoyo kwanje, lwa nulomolome makhuva ku vulunji.

¹⁷Uvuli khulolela imbotokha vandu vooni; navutswa utsililile khuha Mwami Nyasaye luyali.

¹⁸Ni kilikali, uliitsa khuva ni limenya lilahi mumatukhu kitsanga khandi lisuuvilitswa liolio liliitsa khutsililila khuvaho.

¹⁹Yivi mwana wanje, uhulishitsi, uve nu vusitsa; kanakanakhu khuli mwene wumenyanga.

²⁰Uvuli khuva mulala khu vandu vang'wetsanga idivai, inoho vanyeseli vayaanza khulia inyama;

²¹shichila vatandi nende vanyeseli valakwa vamanani; mundu wurumishilanga vwiyangu vwevwe khukona alifwala vitasi.

²²Hulishitsa tata wowo wa khwivula; nu khuvula khuchaya mama wowo lwa ali mushele.

²³Katoto, vusitsa, khweka, nende vucheli vulahi -- vienyekhanga khurungwa; navutswa vili nu vukuuli vululu muno khu yivi khukuulitswa.

²⁴Tata wu mundu wi likhola liu vulunji ali ni shivune shilahi shinyala khumukhola khuva nu vuyaanzi. Mwana uli nu vusitsa anyala khukhukhola usangale.

²⁵Lekha tata wowo nende mama wowo vasangale; lekha mama wowo wa khwivula ave ni likhoya.

²⁶Mwana wanje, mbulishitsa vulahi vwene, ma ulonde mwiima kwanje.

²⁷Vakhali valaaya nende vakhali vi shifwavi vali khuli mireeko mitamanu muno.

²⁸Vakhukonekhanga vandu khuli vanuuli, nu khulomba vandu vasatsa vanyishi khuvula khuva vasuuvilwa.

²⁹Ni viina wamenya nali mu vutiinyu? Ni viina wavelela mu mwoyo? Ni viina wamenya nakwananga? Ni viina wamenya nalembananga? Ni viina uli ni tsimbala khu mmbili vuchila shivune shiosi? Ni viina wi tsimoni tsietsie tsiamuuchiha?

³⁰Ni yavo vamenya nivang'wetsanga idivai mu vutukhu vwosi; yavo vachelitsanga khung'wa idivai lukanu na lukanu.

³¹Ukhachelitswa ni idivai, khali nikava yamuuchiha papapa, khali niiva ivimbilanga mu shikombe, nisuundulwa hasi vulahi vwene tawe.

³²Litukhu lilondakhu ulahulila mu mmbili khuli shindu shikhulumi khuli inzukha yu vutsiva ilumanga.

³³Ularanga khulola ni tsimoni tsiotsio vindu vicheni, khali ukanakane nuvoola vindu vi shifwavi vi shikhaya.

³⁴Ulalolekha khuli mundu ukoni hakari hi inyanza, khuli woyo wikhale ikulu wu musala kwi ipendera.

³⁵Uliitsa khuvoola, “Vandumula, navutswa mbulakhu ha nasalilitswa; vashiuta, navutswa shinahulilakhu vululu tawe. Niitsa khuvukha mu tsindolo isaa shina? Nzitsanga khukhava shiu khung'wa shindi.”