Read tsotso TSINGANU 29 Bible Online

TSINGANU 29 - tsotso bible

TSINGANU 29

¹Niiva ulatsililila khuva muhaaka shia khase khosi lwa uchelihitswangwa, litukhu lilala uliitsa khutivitswa, ulivula khuhona.

²Lwa mundu wi likhola liu vulunji yamihanga, vandu vali nu vuyaanzi; navutswa lwa mundu mutamanu yamihanga, vandu valilanga tsikhwili.

³Mwana wayaanza vusitsa achilanga tata wewe asangala, navutswa mundu uchendanga na vakhali valaaya amalanga miandu chiechie.

⁴Lwa mwami aheendelanga katoto mwoyo, shivala shili ni tsingulu, navutswa niiva ahuchililanga khuheelwa asoya, alativitsa shivala shieshie.

⁵Mundu wurumishilanga vupele khu mureende wewe, yilombelanga mureeko kukhukwamu mwene.

⁶Mundu mutamanu akwitsanga mu mureeko ku vwoni vwevwe mwene; navutswa mundu wi likhola liu vulunji yimbanga nu vuyaanzi.

⁷Mundu wi likhola liu vulunji wamanya katoto ka vandu vamanani venyekhanga vakholelwi, navutswa mundu mutamanu avulakhu shindu shia yamanya.

⁸Vandu vi shihenye henye varaanjitsanga shileeche mu litaala; navutswa vandu vu vusitsa vikalilanga vurima.

⁹Lwa mundu uli nu vusitsa atsitsanga khuyaala mundu muyiingwa mushiina, mundu muyiingwa akumilwa nu vurima vululu, atsililila khusekha, vuchila khuhonjela.

¹⁰Vandu valumindi vahima vandu vasuuvilwa, navutswa vandu vi likhola liu vulunji valindanga vulamu vwa vandu khuli venavo.

¹¹Mundu muyiingwa amanyinyanga vurima vwevwe havulavu, navutswa mundu uli nu vusitsa yikhutsilanga nahonjela.

¹²Niiva mwamihi alahulishitsa makhuva ku vuvehi, varumishi veve voosi valiitsa khuva vatamanu.

¹³Mundu mumanani nende mundu utambitsanga vandi vasanganga shindu shilala - Mwami Nyasaye wavaha voosi tsimoni tsiu khulola.

¹⁴Niiva mwami alakhalachila vamanani vuchila khuvihonela, aliitsa khwamiha khumihika minyishi.

¹⁵Shivoko nende khuchelihitsa khuhaananga vusitsa, navutswa mwana walekhwa alerelanga mama wewe tsisoni.

¹⁶Lwa vandu vatamanu vamihanga, vutamanu vumeetekhanga, navutswa vandu vi likhola liu vulunji valindililanga khulola nivativitswi.

¹⁷Chelihitsa mwana wowo, akhukhole khuvula khuheenda mwoyo; Alakhukhola khuva nu vuyaanzi mu mwoyo kwokwo.

¹⁸Havundu ha khuvula malolo ka vaprofeti, vandu vali ni limenya litamanu; navutswa ali ni ikhaavi mundu utsilililanga khulonda malako.

¹⁹Murumishi shianyala khuchelihitswa na makhuva ka vavoolanga vutswa tawe; khali nikava wakamanya, aliitsa khwambakhana khukahulishitsa.

²⁰Khuliho ni lisuuvilitswa linyishi khu mundu muyiingwa khuvira mundu ukungukhanga mu makhuva vuchila khukanakanakhu.

²¹Niiva ulaha murumishi wowo shia shindu shiosi shia yenyanga khuraanjila muvwana vwevwe, litukhu lindi aliitsa khuvukula miandu chiochio chiosi.

²²Mundu uli nu vurima vwangu achilanga lilembana livaho, mundu uli nu vurima achilanga matiinyu manyishi nikikholekha.

²³Vwiloli vu mundu vumutivitsanga mwene, navutswa vwichehitsi vumulerelanga luyali.

²⁴Mulina wi shihuuvi nu mutsiku mutamanu khu vulamu vwevwe; aliitsa khusalilitswa niiva alavoola katoto mushiina, khandi Nyasaye alamulaama navula khukhola ndio.

²⁵Khuria vandu vandi nu khwireeka mwene; navutswa khusuuvilila mu Mwami Nyasaye nu khumenya mu vulindi vulahi.

²⁶Shia mundu wosi yenyanga mwamihi amuvukule vulahi, navutswa katoto kakholwangwa nu Mwami Nyasaye.

²⁷Vandu vatamanu vasiinya vandu vi likhola liu vulunji; navutswa vandu valahi vasinya vandu vatamanu.