Read tsotso TSINGANU 6 Bible Online

TSINGANU 6 - tsotso bible

TSINGANU 6

¹Yivi mwana wanje, nu wirulitsa khusinjilila likoovi liu mureende wowo, nu walaaka uliitsa khurunjila mundu wundi wa yivi mwene wakorwa,

²yivi mwene wayikumilwa na makhuva koko ka walomoloma, wareekwa ni lilaaka lia wahaana.

³Mwana wanje, uve numanyi ndi uli hasi wu weshie; nu wenyi khwihonyinya khurulamu, ukhole likhuva yili, Khola vwangu utsi khuye, umusaye nayaanza akhukhole khuva muvoholole.

⁴Uvuli khukonakhu khali hati hene tsindolo tsiosi, inoho khurenjetsakhu nushili khukhola kenako.

⁵Wihonyinyi khuli impongo yihonyinyanga khu muhiitsi, khuli linyonyi lihonyinyanga khurula mu makhono ku mureechi.

⁶Munyi vandu vakara! Yeechikhu shindu khurula khu mavalu, kanakanikhu shindu khuli kamenyanga munyole vusitsa.

⁷Mavalu kavula mwimilili ukimililanga, inoho musinjilili inoho mwamihi ukamihanga;

⁸navutswa kavikhanga shiukhulia shiako mumatukhu ki shimiyu, khandi kavunjitsanga shiakalia mumatukhu ki lichesa.

⁹Yivi mundu mukaara, uliitsa khukona yaho khutukha lina? Ni litukhu shina lia uliitsa khuvukha khurula mu tsindolo tsiotsio?

¹⁰Uvoolanga, “Lekha ngonekhu, narenjetsakhu hati vutswa; Nilinga makhono kaanje nimbulukhakhu hati vutswa.”

¹¹Navutswa lwa uliitsa khuva nushikonanga, nonoho lwa vumanani vu khwinjilila khuli mundu munuuli, vutakha vuliitsa khukhuseera khuli mundu wiyavaale viuchi.

¹²Mundu uvula vukhala vwosi, mundu mutamanu, ahuya huyanga shia havundu hosi ni yilomolominya vindu viu vuvehi.

¹³Atemula temula tsimoni tsietsie, nu khuchela chela na makhono keke, khutsililila khukaata vandi,

¹⁴nakanakananga khuli anyala khukhola vindu vitamanu, khurulana khu tsinganakani tsietsie tsingoyanu tsiu khuraanjitsa vutiinyu.

¹⁵Khulwa yako, nonoho lwa matiinyu kaliitsa khumunyolishitsa vuchila khumanyakhu shindu shiosi; aliitsa khutivitswa vwangu, vuchila lisuuvilitswa liu khuhonyinywa.

¹⁶Khuliho ni vindu sita viu Mwami Nyasaye yaleka; ni kilikali, vindu saba viamusiinya:

¹⁷Mundu khulolekha khuva nu vwiloli, khulomoloma makhuva ku vuvehi, vulumindi vu khwiira vandu vavula vutamanu vwosi,

¹⁸tsinganakani tsiu khuloshitsa khukhola vindu vitamanu, mundu wilukhachilanga khukhola vindu vitamanu,

¹⁹mushiahidi uhaananga vushiahidi vu vuvehi, khandi mundu uraanjitsanga tsimbemba mu vamwavo.

²⁰Mwana wanje, ulonde malako ka tata wowo, uvuli khwivilila mechitso ka mama wowo yakhwechitsa.

²¹Utsililile khulonda makhuva kavo shia khase khosi, nu kavikha mu mwoyo kwokwo.

²²Mechitso kavo kaliitsa khukhwimilila nuli khu luchendo, lwa uliitsa khuva nuli mu tsindolo, kaliitsa khukhuchelihitsa mbasu mu mavwevwe, numali khuvukha.

²³Malako kenako kali khuli itaaha yakhanga vulavu; mechitso kali khuli vulavu, lichelihitswa lienelo lili khuli injila yu khukhukhola khutsililila khuva mwoyo.

²⁴Kaliitsa khukhwikalila khuva ihale wene khurula khu mukhali mutamanu, khuvula khuvoolitswa na vakhali vandi.

²⁵Uvuli khwikombakhu mu mwoyo kwokwo khuli yakaasa likoondo; inoho khukorela khu liheenza lielie.

²⁶Mundu anyala khukuula mukhali mulaaya khu mukati kwonyene, navutswa vuheeyi vulamala shia shindu shiosi shiu mundu ali nashio.

²⁷Mundu anyala khuchingakhu mulilu khu shiliru shieshie vuchila tsinguvu tsietsie khuyia?

²⁸Mundu anyala khuchendakhu khu mandaa ku mulilu, vuchila khuyia vilenje vievie?

²⁹Nako kakholekhanga khu mundu utsitsanga khu mukhali wu mureende wewe; shia mundu wosi utiilanga khuye aliitsa khusalilitswa.

³⁰Vandu vambakhananga khuchaya shihuuvi, niiva alahuuva shiukhulia lwa inzala ivetsanga nimali khumuleka.

³¹Navutswa khali ndio, niiva alakumilwa, alarunga hali saba, khali niiva alakoritsa miandu chiosi chiali nachio munzu mwemwe.

³²Navutswa mundu wu kholanga vuheeyi avula vucheli vwosi. Ye mwene yitivitsanga vutswa.

³³Aliitsa khurumulwa tsinguma nu khuchaywa; aliitsa khuheelwa tsisoni khumatukhu koosi.

³⁴Musatsa witsula imbotokha ali nu vurima mu vunyishi; khuvanzila vuchila khuvela tsimbavasi.

³⁵Yambakhananga khuhuchililakhu murungu kwosi; inoho khuheelwa asoya, khali nikava iliitsa khuva inyishi.