Read tsotso TSINGANU 7 Bible Online

TSINGANU 7 - tsotso bible

TSINGANU 7

¹Yivi mwana wanje, tsililila khulonda makhuva kaanje; uvuli khwivilila malako kaanje.

²Ulonde malako kaanje, uve mwoyo; utsililile khulonda mechitso kaanje khuli ulindanga indolelo yi imoni yoyo.

³Ukavohe khu makhono koko; ukare mu mwoyo kwokwo.

⁴Uvukule vusitsa khuli ni mbotso wowo, khandi vucheli khuli nu mulina wowo wa hahimbi.

⁵Viliitsa khukhukhola khuva ihale wene khurula khu vakhali va vasatsa vandi, khurula khu vakhali vamanya khuvoolitsa vasatsa.

⁶Litukhu lindi, lwa nali nimbenzelanga ilwanyi khurulila mu litirisha li inzu yanje,

⁷nalola vasatsa vavukha vanyishi nivavula vucheli, navutswa naheenza nindolamu muvukha mulala wonyene uli muyiingwa.

⁸Yali nachendanga khu muhaanda kwenoko, himbi mumbeka havundu ha mukhali wundi yamenyanga, natsitsanga hango wu mukhali mwenoyo;

⁹mu tsisaa tsiu khulukolovo, shisuundi nende vutukhu nuvuli himbi khutukha.

¹⁰Nalwo lwa mukhali wundi yitsa khumwakanila, niyifwali khuli mukhali wu kholanga vulaaya, naloshitsanga kanyala khukhola.

¹¹Yali mukhali wi liyooko lilahi khandi winjinia; yali wamenya nachendanga khu muhaanda kwenoko,

¹²tsisaa tsindala khu muhaanda, tsindi mu tsisokoni, nasinjile nalindililanga mu shia mumbeka mwosi.

¹³Mukhali mwenoyo yakumila musatsa muvukha, khumutsunzuna, yamuheenza vulunji mu tsimoni, navoola,

¹⁴“Mbani vihanwa vianje nunundi, khandi nyoli inyama khurula mu misango,

¹⁵nakhitsa hanu khukhukhava yivi, mbele ni lienya liu khunyola yivi, makhunyoli!

¹⁶Mali khwala vulahi shitali shianje, ni tsimbala tsi tsilaanji lukanu khurula mu shivala shia Misri.

¹⁷Mali khuvekha shitali shianje makura kahuunyanga vulahi ka manemane, udi, nende Kinamoni.

¹⁸Hamba khukone nivi khutukha mu mavwevwe; khwihulile vulahi nu khukumilane.

¹⁹Musatsa wanje avula ingo; watsia ihale wene khu luchendo.

²⁰Watsiayo ni shisiko shi tsisenti tsinyishi; aliitsa khuvula khukalukha masitsa kavili nikashili khuvwa.”

²¹Yamukoyanyinya na makhuva keke ku khukaatilitsa; yamuvoolitsa khurulana khu lilomoloma lielie lilahi.

²²Nonoho lwa yasimukha natsia naye khuli ihili ihilwangwa khusinzwa, khuli impongo ikwitsanga mu mureeko;

²³ha muvanu kulivirilanga mwoyo kwayo. Yali khuli linyonyi lipulukhanga nilikwa mu ineti, vuchila khumanya ndi atsitsanga khukhutsa.

²⁴Khulwa yako, vaana vaanje, mumbulishitsi. Muhulile vulahi vwene makhuva kaanje kambolanga.

²⁵Muvuli khulekhakhu mukhali khuli mwenoyo amwimilili; muvuli khuhuya huyakhu shia havundu hosi nu mwenyanga khumulola.

²⁶Neye wachila vasatsa vanyishi nivakhutsa, vandu vayiira khale ni vanyishi.

²⁷Inzu yeye ili khuli injila ikhwinjilitsanga mu shihatisi, ni havundu hakholomokhanga nakhuhila mu likhutsa.