Read tsotso TSINGANU 8 Bible Online

TSINGANU 8 - tsotso bible

TSINGANU 8

¹Hulishitsi! Vusitsa vulaanjililanga. Limanya lihulilikhananga ihale wene.

²Vuli khu vikulu ikulu himbi khu muhaanda; khandi ha masanganjila.

³Vulaanjililanga mu vwinjililu vwi litaala likali himbi ha vilivwa:

⁴“Munyi vandu voosi khulilova, ninzi umulaanganga! Nanjililanga khu mundu wosi uli mwoyo.

⁵Munyi vayiingwa, mweche khuva nu vucheli; Muhulishitsi vulahi munyi va muli vayiingwa.

⁶Muhulishitsi, shichila ndi ni vindu vilahi viu khumuvoolela; shichila nomolomanga ku vulunji.

⁷Ka mbolanga ni katoto; nayambakhana vuvehi.

⁸Makhuva koosi kambolanga ni ku vulunji; shindu shivulakhuho shiu vuvehi inoho shiu khukoyanyinya.

⁹Makhuva kaanje kali havulavu khu mundu uli ni limanya, ku vulunji khu mundu uli nu vucheli.

¹⁰Murovole mivaalo kaanje vukhala vwi ifetsa, khandi vucheli khuvira itsahabu inyukhu.

¹¹“Ninzi vusitsa, navira machina ku vukuuli vululu, shindu shivulakhuho shia mwenyanga shinyala khusasanyinywa khwinzi.

¹²Ninzi vusitsa, khandi ndi limanya, ndi nu vucheli khandi namanya vulahi kakholanga.

¹³Khuha Mwami Nyasaye luyali nakhwo khwambakhana vindu vitamanu; shinayaanza khwilola nu khwichinjilila, miima mitamanu, nende lilomoloma liu vuvehi tawe.

¹⁴Ndi ninganakani indahi nende vusitsa vwatoto; ndi ni limanya khandi ni tsingulu.

¹⁵Khonyanga vami khwamiha, khandi vamihi khulomba malako katoto.

¹⁶Khonyanga shia mwamihi wosi khulilova khwamiha, khandi vimilili nende vami vamihanga munjila inunji.

¹⁷Nayaanza vandu vanyanza, khandi yavo vakhavanga nu mwoyo kwosi vanyolanga.

¹⁸Vuhinda nende luyali ni vianje, miandu chikhavwetsanga nende vuhinda.

¹⁹Ka munyolanga khurula khwinzi ni malahi khuvira itsahabu inyukhu, khandi murungu kwanje kwavira ifetsa.

²⁰Menyanga limenya liu vulunji, khandi nondanga injila yatoto.

²¹Ninzi uhaananga miandu khu vandu vanyanzanga, nzitsulitsanga vindu mu livishilu liavo.

²²“Ninzi wu Mwami Nyasaye yaraanga khuloonga mu viosi, shindu shiukhuraanga mu mihinzilu chiechie, khurula khale.

²³Ninzi walombwa muliraanga, lukhuraanga lwene, shivala nishishili khuloongwa.

²⁴Nalombwa tsinyanza nitsishili khuvaho, lwa khwali nu khuvula tsisieveye tsia matsi.

²⁵Ninzi walombwa vikulu nivishili khuloongwa vikulu vitititi nivishili khuvikhwa mu makono kavio,

²⁶Nyasaye nashili khuloonga lilova nende milimi chialio, inoho khali nashili khulombakhu malova mati.

²⁷Naliho lwa yavikha likulu mu makono kalio, lwa yachora ingara ikulu wi inyanza,

²⁸lwa yatinyilitsa malesi mwikulu, lwa yikula tsisieveye tsi inyanza

²⁹nahaana lilako ndi matsi ki inyanza kavuli khusumeela khuvira khuli yali navooli. Naliho lwa yaraanga khwala misinji chi lilova.

³⁰Nali himbi khuye khuli mundu wechela khulomba vindu, ninzi nali khuli shirula shiu khwikhoya khwekhwe, nu vuyaanzi shia khase khosi imbeli wewe --

³¹nindi nu vuyaanzi shichila shivala khandi ninyanzitswa na vandu.

³²“Khulwa yako, vaana vaanje, mumbulishitsi; vali ni ikhaavi yavo vatsilililanga khukhola ka vavoolelanga vakhole.

³³Mulonde mivaalo kaanje khandi muve nu vusitsa; muvuli khwambakhana khukalonda.

³⁴Ali ni ikhaavi mundu umbulishitsanga, uheenzelelanga shia litukhu ha muliango kwanje, nalindililanga mu vwinjililu vu muliango kwanje.

³⁵Mundu unyolanga inzi anyolanga vulamu, khandi Mwami Nyasaye ayaanzitswangwa naye.

³⁶Navutswa wambakhananga khunyola inzi yisalilitsanga mwene; vandu voosi vanzambakhananga vayaanza likhutsa.”