Read tsotso MWILWATSI 1 Bible Online

MWILWATSI 1 - tsotso bible

MWILWATSI 1

¹Yaka nako makhuva ku mwilwatsi, mwana wu Mwami Daudi wamihanga mu Yerusalemi.

²Mwilwatsi yavoola, “Shia shindu shiosi ni shikhaya! Shia shindu shiosi ni shikhaya! Ni shikhaya vutswa!”

³Nu vukhala shina vwa mundu anyolanga ni yakhakhola muhinzilu kwosi ni tsingulu tsiosi mu shivala shinu?

⁴Likhula livetsaho khandi livwaho, navutswa shivala shitsilililanga khuvaho mihika ni mihika.

⁵Liuva lirulilanga nu khuyeela, khandi likalukha vwangu havundu ha lirulilanga.

⁶Vushindu vuhuutsanga nuvutsia khuluveka luli ikuvanda nu vukomokha khutsia ivuluka, vuvotokhananga iyi neyo, nu vukalukha havundu ha vuvetsanga nuvuranjili.

⁷Michela chiosi chitsukhanga mu inyanza, navutswa shiyitsulanga matsi tawe. Havundu ha michela chitsukhanga naho khandi ha chisenushilanga.

⁸Vindu viosi viakwa viteteshele; khali mundu avulakhuho unyala khwivaala makhuva yaka; tsimoni tsilolanga khandi tsikhaywa khulola, inoho maroyi kahulilanga khandi kakhaywa khuhulishitsa.

⁹Shindu shialiho nashio shiliitsa khuvaho, khandi shindu shikholekhakhu nashio shiliitsa khwikholekha. Shindu shivulakhuho shicheni mu shivala yishi.

¹⁰Khulikhuho ni shindu shia mundu anyala khulomoloma, navoola, Lolikhu shindu shicheni yishi! Shialiho khale, khali mumatukhu ka khwali nu khushili khwivulwa.

¹¹Mundu avulakhuho khali mulala uliitsa khwitsushitsa vindu viakholekha mumatukhu kavira khali yavo valiitsa khwivulwa valiitsa khuvula khwitsushitsa vindu vienyekhanga khuvaho.

¹²Inzi, mwilwatsi nali mwami wamihanga shivala shia Israeli, nimenyanga Yerusalemi.

¹³Ninzi mwene nihaana nu mwoyo kwosi khweka khandi khurunishitsa khuvirila khu vusitsa vwanje shia shindu shiosi shikholekhanga mu shivala shinu. Nyasaye watiukha vandu musiko mulitoho muno!

¹⁴Nalola shia shindu shiosi shikholekhanga mu shivala shinu; shia shindu shiosi ni shikhaya; khandi vili vutswa khuli mundu yilukhanyinyanga vushindu.

¹⁵Shindu shiakotoma shishinyala khulunjishitswa, inoho shindu shikhaliho khuvalitswa tawe.

¹⁶Nakanakana mwene, nimbola, “Lolikhu, mali khukwa mundu mukali; khandi ndi nu vusitsa vunyishi muno khuvira shia mundu wosi, wali niyamihakhu Yerusalemi inzi nishili khwamiha. Namanya katoto kene makhuva khu vusitsa nende vucheli.”

¹⁷Nali ni shinani shiu khwenya khumanya makhuva khu vusitsa, makhuva khu vulalu nende vuyiingwa; navutswa nanyola ndi khali kenako kali vutswa khuli mundu wilukhanyinyanga vushindu.

¹⁸Vusitsa vunyishi khuli vwenevo vuheenditsanga mundu mwoyo; khandi mundu utsilililanga khucheliha muno, ameetanga vuveleli vunyishi mu mwoyo kwekwe.