Read tsotso MWILWATSI 5 Bible Online

MWILWATSI 5 - tsotso bible

MWILWATSI 5

¹Muve vacheli lwa mwinjilanga mu Litempeli lia Nyasaye. Nu vulahi khutsiamu khuhulishitsa nu khweka khuvira khukhola musango khuli vandu vayiingwa vakholanga; shichila vakorwa khumanya vakholanga vindu vitamanu.

²Khutukha ukanakane nushili khulomoloma, khandi uvuli khuva mwangu khuvoolakhu shindu shiosi imbeli wa Nyasaye; shichila Nyasaye neye uli mwikulu, nivi uli mu shivala. Khulwa yako, lekha khwilomolominya makhuva manyishi.

³Mundu uheendanga hali khanyishi mwoyo, neye ulooranga malooro; khandi mundu wilomolominyanga makhuva manyishi, nu muyiingwa.

⁴Lwa ulaakanga khukholela Nyasaye shindu, uvuli khucheleva khurweshitsa; shichila shia yaanzililanga mundu muyiingwa tawe. Khutukha urweshitsi ka walaaka.

⁵Nu vulahi khuvula khulaaka khuvira khulaaka nu khuvula khurweshitsa.

⁶Makhuva koko ka umulomolomanga kavuli khukhwinjilitsa vwoni, khandi uvuli khuvoolelakhu murumwa ukholi shikholwa shitamanu. Shichila shina wenyanga Nyasaye akhuvukulile vurima, lwa ahulila mwoyo kwokwo nu khwononyinya muhinzilu kwokwo?

⁷Lwa malooro katsilililanga khuva manyishi muno, nalwo lwa mundu yilomolominyanga makhuva ki shikhaya vutswa; navutswa khutukha uhe Nyasaye luyali.

⁸Niiva muliitsa khulola mu lusomo vandu vamanani ni vatambitswangwa, khandi katoto nende likhola liu vulunji nivivula khurweshitswa khuli kenyekhanga, muvuli khuchenyela makhuva kenako; shichila mwimilili alindwangwa nu wundi wamuvira.Khuliho na vimilili vandi vi tsingulu va vasinjililanga.

⁹Navutswa khali ndio, mwami wamihanga ali nu vukhala khu vandu voosi mu shivala shia varaakamu vindu.

¹⁰Mundu wayaanza tsisenti, avula tsisenti tsinyala khumutukha. Inoho khali mundu wikombanga khuva ni miandu minyishi, vukhala nu vumeteekha, avula miandu chinyala khumutukha. Khali kenako koosi ni shikhaya vutswa.

¹¹Lwa miandu chishilanga mu vunyishi, vandu vu khuchilia ni vanyishi. Nu vukhala shina khu mwene miandu chienecho, nikakhavele khuchilola vutswa ni tsimoni tsietsie?

¹²Mundu wu kholanga muhinzilu kwekwe akonanga tsindolo tsindahi tsiene, khali kave ali ni shiukhulia shiti inoho shinyishi. Navutswa liheenda mwoyo liu mundu muhinda limunyashitsanga avula khukonakhu tsindolo mu vutukhu vwosi.

¹³Khali ndio, namala khulola shindu shilala shitamanu shiene ni shikholekhanga mu shivala shinu: Miandu chiu mundu yali niyanyola mu vunyishi nichimusalilitsa;

¹⁴khandi miandu chienecho nichikorela mu vikholwa vitamanu. Mundu mwenoyo, khali niiva yali wayivula mwana, navutswa shindu shivulakhuho shia yarikala nashio shiu mwana mwenoyo aliitsa khunyola khuli miandu chiechie.

¹⁵Khuli lwa mama wewe yamwivula shekenye, nindio khandi aliitsa khukalukha khuli lwa yali niyivulwa nali shekenye. Shindu shivulakhuho shialiitsa khutsia nashio shichila muhinzilu kwa yakholanga.

¹⁶Yaka khandi kali vutswa khuli shindu shitamanu shiu khusalilitsa. Khuli lwa yivulwa, nindio khandi aliitsa khutsia; khandi avulakhu vukhala vwosi khurulana khu muhinzilu kwa yakholanga ni tsingulu, narula tsinjeli tsi shikhaya vutswa.

¹⁷Ali vutswa khuli mundu wamenyanga mu shisuundi, nu vuveleli mu mwoyo, muliheenda mwoyo, mu vulwale khandi mu vurima.

¹⁸Khali ndio, mali khulola shindu shilala khuva shilahi. Nu vulahi mundu khulia nu khuva nu vuyaanzi khurulana khu muhinzilu kwa akholanga ni tsingulu nacheemulila mu shivala shinu, khumatukhu mati ka ashili mwoyo, ka Nyasaye yamuha amenye; shichila nako ka yamuviritsila.

¹⁹Niiva Nyasaye aheetsanga mundu miandu nende vuhinda, khandi amuha vulamu vu khwikhoyela, nu vulahi mundu asanditse khandi ave nu vuyaanzi khwikhoyela vindu viachila nakhola muhinzilu. Ni shihanwa khurula khu Nyasaye.

²⁰Nyasaye yamuha vwiyangu vu khuva nu vuyaanzi, khuvula khuheendela mwoyo kakholekhanga khuye nashili mwoyo, shichila vulamu vwayimbiha.