Read tsotso MWILWATSI 6 Bible Online

MWILWATSI 6 - tsotso bible

MWILWATSI 6

¹Mali khulola ndi mu shivala shinu shindu shitamanu shikholekhanga, nishinyashitsa vandu vamenyanga mushio.

²Nyasaye aheetsanga vandu miandu, luyali, nende vuhinda, khandi vuchila khuveha, shia shindu shiosi shia vandu vikombanga; navutswa Nyasaye aviimanga vwiyangu vu khuva nu vuyaanzi. Navutswa mundu mucheni neye wikhoyelanga vindu vienevo. Kenako koosi ni shikhaya vutswa, khandi kanyashitsanga mundu.

³Niiva mundu anyala khuva wayivula vaana imia indala, khandi ahindili, navutswa ave avula vuyaanzi mu limenya lielie, aliitsa khuvula khuyeveelwa mu shilindwa munjila indahi namali khukhutsa. Mbolanga kilikali ndi mwana wahululwa namali khukhutsa umali khuvira mundu mwenoyo.

⁴Ni shindu shikhaya vutswa mwana wahululwa mwenoyo khwivulwa; akorelanga mu shisuundi, nu khwivililwa.

⁵Khali ndio, avulakhu vulavu vwa yalolakhu mbasu inoho khumanyakhu shindu shiosi; navutswa anyolanga lihulukha lia ashili khunyolakhu.

⁶Khali niiva anyala khumenya mihika tsiheelefu tsivili, avula vuyaanzi vwosi mu limenya lielie. Ali vutswa khuli mwana wahululwa mwenoyo, shichila voosi vavili vatsitsanga havundu halala hele.

⁷Muhinzilu kwosi ku mundu akholanga, kukholekhanga vutswa shichila shiukhulia; navutswa khali luusa lwelwe lu khulia luvulanga khumwikuritsa.

⁸Mundu uli nu vusitsa ali nu vulahi shina khuvira mundu muyiingwa? Ni shina shiu mundu mumanani wamanya khuli anyala khukhalavana mu limenya ali nashio?

⁹Nu vulahi khwihulila ni shindu shiulolakhu ni tsimoni tsiotsio mwene, khuvira khwikomba vinyishi viu khali navio. Khali ndio, kenako ni ki shikhaya; kali vutswa khuli mundu yilukhanyinyanga vushindu.

¹⁰Shia shindu shiosi shikholekhanga, shiali shiaviritswa shiliitsa khwikholekha. Liiva liu mundu liamanyikhana vulahi; shichila avula tsingulu tsiu khuhingana nu mundu wamuvira ni tsingulu.

¹¹Makhuva ku mundu yilomolominyanga mu vunyishi ni ki shikhaya. Kavula shia kakhonyanga mundu.

¹²Ni viina wamanya shindu shilahi shiu mundu anyala khunyola mu limenya lielie, mumatukhu kali mwoyo ki shikhaya vutswa mu shivala shinu, vulamu vuli khuli shinini? Ni viina unyala khuvoolela mundu kaliitsa khwikholekha khuye, namali khukhutsa?