Read tsotso LWIMBO LULAHI LWENE 6 Bible Online

LWIMBO LULAHI LWENE 6 - tsotso bible

LWIMBO LULAHI LWENE 6

¹Yivi mukhali wakaasa likoondo, ni hena wa muyaanze wowo yatsia? Ni hena wa yavirila natsia, khukhukhonye khukhava?

²Muyaanze wanje yakholomokha natsia mu mulimi kwekwe, havundu ha tsipila pili tsili, khutsia khwayitsa makondi keke mu mulimi, nu khuvunjelitsa liise.

³Ndi muyaanze wewe, na ye nu wanje; yayitsanga makondi keke mu liise.

⁴Muyaanze wanje, wakaasa muno likoondo khuli Tiriza, uyaanzitsanga khuli Yerusalemi, urishitsanga khuli vasikali vachinganga tsipendera.

⁵Ukhambenzakhu tawe; numbenza nalwo lwa nyakhananga. Liswi liolio lili khuli li shiayo shi tsimbuli, ni tsikholomokhanga hasi hi vikulu via Gileadi.

⁶Uli na miino malavu khuli shiayo shia makondi, nikarula khusingwa, koosi kayivula makhwaane, khali lilala khuko shiliakhutsilwa tawe.

⁷Tsiseye tsiotsio tsili khuli vitonye vivili via matunda ka pomenguraneti nu wifwali shitambaya.

⁸Khuliho na vakhali makhomi sita, voosi ni varuchi vi shikhali, khandi vakhali vamenyinywa makhomi munane, nende vaana vi shikhana vanyishi!

⁹Yivi shituti shianje, museletse wanje, neye mulala vutswa wonyene, muyaanze wa mama wewe, mwana wa mama wewe yayaanza. Vakhali voosi vamulola nivamuvukula khuva wakasitswa; khali vami vi shikhali nende vakhali vamenyinywa vamuvukula wakasitswa, manivamwitsominya.

¹⁰Ni viina uyu alolekhanga khuli mavwevwe, mulahi khuli mweli, wang'ang'anga khuli liuva, wu khurishitsa khuli vasikali achinganga tsipendera?”

¹¹Mali khukholomokha ndi mu mulimi kwi minaasi, khwitsa khuheenzakhu viraakwa viseevukhanga mu luhoongo, khulola niiva misabibu chimeeli masambu, inoho masambu kameeli khu misala chia matunda ka pomenguraneti.

¹²Khali nishili khumanya shikholekhanga, nanyolekhana ngoni khu shitali shiu luyali nu muyaanze wanje.

¹³Yivi mwana wi shikhana Mushulamu, kalukha, kalukha, khukhulolekhu. Shichila shina mwenyanga khulola inzi mukhali Mushulamu nisievanga na vandi?