Read tsotso ISAYA 13 Bible Online

ISAYA 13 - tsotso bible

ISAYA 13

¹Yili nalio likhuva lia Isaya mwana wa Amozi yavoolelwa khu shivala shia Babilonia.

²Nyasaye avoolanga, “Sinjilitsi ipendera khu shikulu shiu musala kwosi kushili khumeelakhu. Mulaanjilile nu mwoyo mukali khu vasikali; soneli vandu mukhono vinjile mu vilivwa vi litaala lia vandu vi tsingulu.

³“Inzi mwene namala khuhaana lilako khu vandu vaanje va narovola; mali khulaanga vasikali vaanje vi tsingulu, yavo va khuheetsanga vukhumi nivakhuva isaango, khwitsa khurweshitsa lienya lichilanga nimba nu vurima.

⁴Hulishitsikhu liyooko lili mu vikulu khuli ni shituma shia vandu vanyishi muno! Hulishitsikhu liyooko liu vwami, ni tsi tsimbia tsivunjelitsanga halala! Mwami Nyasaye wi Mikaanda Chiliihe arecheshitsanga vasikali veve vu khutsia khukwana.

⁵Varulanga mu vivala vili ihale wene, khurula mu tsimbeka tsiosi khulilova. Mwami Nyasaye yitsanga khumulula vandu voosi mu shivala khuvirila mu vurima vwevwe.

⁶“Khuvi tsikhwili, shichila litukhu liu Mwami Nyasaye lili himbi khutukha; liliitsa khwitsa khuli ni shiheeli khurula khu Mwami Nyasaye!

⁷Nalwo lwa vandu valiitsa khuteteshela, shia mundu wosi aliitsa khukhutsa mwoyo.

⁸Vandu valiitsa khuhaya haya, valiitsa khuria nu khunyakhana muno; valiitsa khuhulila isaalila khuli yu mukhali ahulilanga niyenya khwivula mwana. Valiitsa khuheenzana nivaheenda mwoyo; valiitsa khulola tsisoni.

⁹Litukhu liu Mwami Nyasaye lili himbi khutukha, liliitsa khuva lilulu, liu vusalilu khandi liu vurima vunyishi. Liliitsa khwononyinya shivala, liliitsa khutivitsa vooni vamenyamu.

¹⁰Tsinyining'ini nende vindu ving'eleng'ananga mwikulu viliitsa khutsima. Liuva liliitsa khukwa shisuundi nilirulanga, mweli kuliitsa khutsima.”

¹¹Mwami Nyasaye avoolanga, “Niitsa khusalilitsa vandu mu shivala shichila vindu vitamanu via vakholanga, khandi vandu vatamanu shichila vwoni vwavo. Niitsa khutivitsa vwiloli vwa vandu vichinjililanga, nu khutivitsa shileeche shia vandu valulu.

¹²Niitsa khukhola vandu valicheha khuvira itsahabu inyukhu, vandu valiitsa khuvula khunyolekha khuli itsahabu ya havundu halaangwangwa Ofiri.

¹³Niitsa khutechelitsa likulu; lilova liliitsa khwinuya nuya mu makono kalio, lwa inzi Mwami Nyasaye wi Mikaanda Chiliihe nitsula vululu khulitukhu lia niitsa khumanyinya vurima vwanje vululu.

¹⁴“Vandu vi tsimbia tsindi vamenyanga Babilonia valiitsa khwilukha vatsia mu vivala viavo vene; valiitsa khusalana khuli impongo ya muhiitsi ahitsanyinyanga; inoho khuli makondi kavula mwayi.

¹⁵Mundu uliitsa khunyolwa aliitsa khurootswa; uliitsa khukumilwa aliitsa khwiirwa ni shivavi.

¹⁶Tsindana tsiavo tsiliitsa khutoonywa mu vitonye vene nivarelekhu tsimoni; tsinzu tsiavo tsiliitsa khuyaaywa, khandi vakhali vavo valiitsa khukumilwa.”

¹⁷Mwami Nyasaye wi Mikaanda Chiliihe avoolanga, “Nzitsanga khuvwanyinya mulilu mu Vamedi khuvakwana, vandu vambakhananga khulolakhu ifetsa khuli ni shindu, vavulakhu itsahabu yu khwikomba.

¹⁸Vura vwavo vuliitsa khumulula vayayi vavukha; valiitsa khuvula khuvela tsimbavasi vaana inoho khulolela tsindana.

¹⁹Navutswa Babilonia, shivala shu vukhumi mu vivala vindi viosi, shivala shia Vababilonia vilolelamu; shiliitsa khukwa khuli mataala ka Sodomu nende Gomora, lwa Nyasaye yakativitsa!

²⁰Mundu avulakhuho uliitsa khwikhala muko inoho khumenyamu khumatukhu koosi; Vaharabu valiitsa khulekha khusimiikha maheemo kavo muko; khali vayi khwayitsamu makondi kavo.

²¹Navutswa tsinyama tsiumbulimu tsiliitsa khumenyamu, khandi vindu vitsiula tsiulanga viliitsa khwitsula mu tsinzu tsiliyo; mayahutu kaliitsa khumenyayo, khandi makondi kasasanga matimoni kaliitsa khuhuya huyayo.

²²Tsisiimbwa tsiumbulimu tsiliitsa khusamasamila mu minaara chiako, khandi vivwe mu tsinzu tsiu vwami tsindahi. Matukhu ka Babilonia kamali khutukha, khandi matukhu kandi kaliitsa khuvula khumeetwakhu.”