Read tsotso ISAYA 25 Bible Online

ISAYA 25 - tsotso bible

ISAYA 25

¹Mwami Nyasaye, nivi Nyasaye wanje; nakhuha vukhumi, ninzitsominya lira liolio; shichila wakhola vindu viu khuchenyinya; vindu via waloshitsa khurula khale, viu vusuuvilwa khandi viatoto.

²Nivi wakhola mataala makali khuva lichiinga, nu wononyinya tsimbinga tsiako. Inzu yu vwami ya vandu vi tsimbia tsindi yapomolanyinywa, iliitsa khuvula khumbakhwa vuyia.

³Khulwa yako, vandu vi tsingulu valiitsa khukhuha vukhumi; mataala ka vandu vi tsimbia tsindulu valiitsa khukhuha luyali;

⁴shichila nivi wali khuli imbinga ya vamanani, imbinga ya vandu vanyakhananga mu matiinyu vavula khwavatiila, shindu shiu khukhushinga khurula khu imbula yi imbuutsa inditoho, khandi khuli shiniikha khurula khu mbasu; shichila vikholwa viu khusalilitsa via vandu valulu vili khuli imbuutsa ihuutsanga nikwa khu lisisi,

⁵inoho khuli luya mu shivala shiumakanu. Navutswa yivi, Mwami Nyasaye wahonjelitsa liyooko lia vandu vi tsimbia tsindi; khuli malesi kashinditsanga mbasu mululu, nindio khwichinjilila khwa vandu valulu khushinditswangwa.

⁶Mwami Nyasaye wi Mikaanda Chiliihe aliitsa khukholela vandu veve voosi mulukha kwi lilia li vindu vi vivana, mulukha kwi idivai indahi, mulukha kwi vindu vi vivana vi vindu viu vuhaale, mulukha kwi idivai inuulu yene muno khu Shikulu shia Sayoni.

⁷Aliitsa khutivitsila khu shikulu yishi shia shikhunikho shiosi shiavakhunishila vandu voosi, shitambaya shiavimba vandu vi tsimbia tsiosi.

⁸Nalwo lwu Mwami Nyasaye aliitsa khweeya miliika mu tsimoni tsia vandu voosi, aliitsa khurulitsaho tsisoni tsia vandu veve vanyolanga shia havundu hosi mu shivala. Mwami Nyasaye umali khuvoola.

⁹Khulitukhu lienelo, vandu valiitsa khuvoola, “Uyu neye Nyasaye weru! Neye wa khwalindililanga khwenya akhuhonyinyi. Neye Mwami Nyasaye; wa khwalindililanga! Chendi khusangale makhwikhoyele mu vuhonyinyi vwevwe.”

¹⁰Mwami Nyasaye aliitsa khulinda shikulu yishi; nikhali Vamoabu valiitsa khutuuvachilwa havundu havo, khuli vatuuvachilanga hasi vunyasi mu vwina vwa masiingo ki imboleya.

¹¹Valiitsa khuvambuula makhono kavo khuli vachelitsanga khweleema khu matsi; navutswa Mwami Nyasaye aliitsa khuvaha tsisoni, mavakorwi khuli vanyala khweleema khu matsi na makhono kavo.

¹²Aliitsa khupomolanyinya masisi kenyu karaambiha, nu khukakwishitsa hasi, khutukha lwa karikala lukuushi.