Read tsotso ISAYA 41 Bible Online

ISAYA 41 - tsotso bible

ISAYA 41

¹Nyasaye avoolanga, “Munyi vandu varulanga mu visuulu, mumbulishitsi numuhonjeli! Munyi vandu vi tsimbia tsindi, nyoli tsingulu vuyia! Leshi vasinjile mavalomolome; hambi khwakane halala khukhalachilwa.

²Ni viina wa vwanyinya mu mulilu mu mukwani wa khukwana khurula khuluveka luli ivukwi, nu khumuha tsingulu tsiu khukuura shia havundu hosi ha atsitsanga? Ni viina umuheetsanga tsingulu tsiu khukuura vami nende vandu vi tsimbia tsindi? Shivavi shieshie shivamalanga khuli nu lukuushi. Mivanu chiechie chivasalanyinyanga khuli nu vunyasi vwa vushindu vuhuutsanga.

³Avahitsanyinyanga nu khuvavira mu milembe, vwangu muno vuchila khuseenakhu hasi!

⁴Ni viina wachila kenako koosi nikakholekha, narunishitsa vindu viakholekhanga khuraanjila muliraanga? Inzi, Mwami Nyasaye neye waliho muliraanga khandi mulimalilikha; khandi niitsa khuvaho mihika ni mihika.”

⁵Vandu vi visuulu vamala khulola kakholekha khandi varia; tsimbeka tsiosi tsi shivala tsitechelanga; vamala khwisuunda himbi, vitsanga.

⁶Shia mulala akhonyanga wundi khali avoolela amwavo wewe, “Utinye mwoyo!”

⁷Mufundi wi tsimbaho atinyilitsanga mwiraanyi wi itsahabu, khandi mundu ukhonganga musambwa kuve munyiukhu atinyilitsanga mundu ukhong'ondanga nu musumari. Vavoolanga, “Kwayunganyinywa vulahi” -- mayunganyinya musambwa nu musumari.

⁸“Navutswa munyi, Vaisraeli vamuli varumishi vaanje, yivi Yakobo, wa narovola, munyi vitsukhulu va Aburahamu wali mulina wanje,

⁹ninzi wamurulitsa mu tsimbeka tsiosi mu shivala, nimulaanga khurula ihale wene, nimuvoolela, ‘Nivi murumishi wanje,’ ninzi wakhurovola, navutswa shili khukhwambakhana;

¹⁰lekha khuria, shichila ndi nivi! Lekha khuheenda mwoyo, shichila ndi Nyasaye wowo! Niitsa khukhutinyilitsa, niitsa khukhukhonya; niitsa khukhulinda nu khukhuhonyinya.

¹¹“Lola, yavo voosi vakhuvukulilanga vurima ni kilikali valiitsa khuheelwa tsisoni nu khukuurwa; yavo vakhukwananga valiitsa khuva shindu shikhaya, navutswa valiitsa khutivitswa.

¹²Khali niiva uliitsa khukhava vatsiku vovo, shiuliitsa khuvanyola tawe. Yavo vakhukwananga valiitsa khuva shindu shikhaya;

¹³shichila ninzi Mwami Nyasaye, uli Nyasaye wowo, Ninzi ukhutinyilitsanga nimbola, ‘Lekha khuria; shichila niitsa khukhukhonya.’ ”

¹⁴Mwami Nyasaye avoolanga, “Yivi Yakobo uli khuli inyende, munyi Vaisraeli, muvuli khuria; shichila niitsa khumukhonya. Inzi Mwami Nyasaye mali khuvoola. Ninzi Nyasaye Mutakatifu wa Israeli, uli Muhavini wenyu.

¹⁵Loli, niitsa khumukhola muve khuli shindu shiu khwilulilakhu, nu vuuma vuyia khandi vuuchi. Muliitsa khwilula vikulu nu khuviononyinya; vikulu viliitsa khutuuvukhanamu khuli lukuushi.

¹⁶Muliitsa khuvilula, ma vushindu vuvihuutsanyinyi; imbuutsa iliitsa khuvihuutsanyinya. Muliitsa khwikhoya khwinzi Mwami Nyasaye; khandi muve nu vukhumi mu Nyasaye Mutakatifu wa Israeli.

¹⁷“Lwa vandu vamanani nende vavula shindu vakhavanga matsi ka vang'wa, navutswa vavula shia vang'wa; minwa chiavo chiahangalala. Navutswa inzi Mwami Nyasaye navachipa; inzi Mwami Nyasaye shinzitsanga khuvalekha tawe.

¹⁸Nzitsanga khukhola michela chikholomoshe khu vikulu viahangalala khandi tsisieveye tsinyoleshe mu tsihoongo. Niitsa khukalukhanyinya shiangalangwi khukwa litivwi lia matsi, shivala shiumakanu khukalukhana khukwa shivala shi michela chikholomokhamu.

¹⁹Niitsa khuraaka mwichendanyama musala kwa ceda munyenye, manimane nende musayituni. Niitsa khuraaka mitarakwa mu shiangalangwi, misiyenze nende chi tsipainati.

²⁰Vandu valiitsa khulola nikanyalikha vamanye nu khwekakhu shindu ndi inzi Mwami Nyasaye neye ukholi kenako, Nyasaye, uli Mutakatifu wa Israeli neye wakhola kenako.”

²¹Yaka nako ku Mwami Nyasaye, Mwami wa Israeli, avoolanga, “Munyi vanyasaye va vandu vi tsimbia tsindi, vooli kachilanga nu mukhuyaala; khakhuvooleli vulahi vwene!

²²Leshi vavalere, vakhuvoolele kaliitsa khwikholekha. Khuvoolelikhu vindu viakholekhanga khale, nikanyalikha khuvimanye, khandi khumanye kaliitsa khwikholekha; inoho khuvoolelikhu havulavu katsitsanga khwikholekha.

²³Khuvoolelikhu kaliitsa khwikholekha yaka nikamali khwikholekha, nikanyalikha khumanye ndi nu munyi vanyasaye; kholikhu shindu, shive shilahi inoho shitamanu, nikanyalikha khutechele nu khuria.

²⁴Navutswa lolikhu, munyi muli shindu shikhaya, khandi muvula muhinzilu kwa munyala khukhola; mundu usaalanga khu munyi akholanga shifwavi.

²⁵“Mali khusona mundu khurula ivuluka, naye umali khwitsa; mulala khurula ivukwi wa liuva lirulanga usaalanga khwinzi. Aliitsa khutuuvachila vamihi hasi khuli ni malova, khuli muloonji wi tsinyungu aswaalanga litohi.

²⁶Ni viina wavoola havulavu kenako khurula muliraanga, nikanyalikha khukamanye, khandi nikashili khwikholekha, nikanyalikha khuvoole yavoola likhola liu vulunji? Mundu avulakhuho khali mulala khu munyi wavoola havulavu makhuva kenako, avulakhuho wavoola makhuva kenako nikashili khwikholekha, avulakhuho khali mulala wahulilakhu likhuva liosi khurula khu munyi.

²⁷Ninzi waraanga khuvoola havulavu kenako mu Sayoni; Ninzi waruma mu Yerusalemi murumwa khutsia khwilwatsa makhuva malahi.

²⁸Navutswa lwa naheenza vulahi, nimbula khulolakhu mundu; avulakhuho khali mulala khu vanyasaye venavo wakhonya inganakani, avulakhuho khali mulala wanjipakhu shindu lwa na vareevanga.

²⁹Loli, vanyasaye vavo voosi ni vavehi, muhinzilu chiavo ni chi shikhaya; misambwa chiavo chia valomba ni miteteshele khandi chivula tsingulu tsiosi.”