Read tsotso ISAYA 43 Bible Online

ISAYA 43 - tsotso bible

ISAYA 43

¹Navutswa Mwami Nyasaye waloonga munyi vandu va Yakobo, walomba munyi Vaisraeli, avoolanga, “Muvuli khuria, shichila ninzi wamuhonyinya; ninzi wamulaanga lira lienyu; munyi navo vandu vaanje.

²Lwa mukhalakanyila mu matsi ku luliiva, niitsa khuva na munyi; khandi khukhalakanyila mu michela, shichiliitsa khumuhilanyinya tawe. Lwa muchenda khuvirila mu mulilu, kuliitsa khuvula khumusamba. Khali tsimemo tsiliitsa khuvula khumulaalitsa;

³shichila ninzi Mwami Nyasaye, uli Nyasaye wenyu, Nyasaye, uli Mutakatifu wa Israeli, uli Muhonyinyi wenyu. Niitsa khuhaana Misri khuva khuli shindu shinyala khumuvoholola, Etsopia nende Seba khuva havukono henyu.

⁴Khali lwa muli nu vukuuli vululu imbeli wanje, khandi shichila mwaheelwa luyali khandi shichila namuyaanza, niitsa khuhaana vandu havukono henyu, vandu vi tsimbia tsindi havukono wu vulamu vwenyu.

⁵Muvuli khuria, shichila ndi halala na munyi; niitsa khurulitsa vaana venyu khurula ivukwi nu khuvavunjelitsa khurula imbo.

⁶Niitsa khuvoolela vandu vamenyanga ivuluka vamuleshe mutsi khandi ikuvanda vavuli khumwikalila. Leshi vandu vaanje vakalushi khurula mu vivala vi ihale wene, shia havundu hosi khulilova.

⁷Navo vandu vaanje mwene, khandi ninzi wavaloonga shichila vukhumi vwanje.”

⁸Nyasaye avoolanga, “Leri imbeli wanje vandu vavekhu, khali niiva vali ni tsimoni, vikala maroyi, khali niiva vali na maroyi!

⁹Nu vulahi numuvunjelitsi halala vandu vi tsimbia tsiosi, vandu voosi khwakanila halala. Ni viina khu vanyasaye vavo unyala khuvoola havulavu kaliitsa khwikholekha mumatukhu kaliitsa khuvaho, nu khukhumanyinya kakholekhanga nunundi?”

¹⁰Mwami Nyasaye avoolanga, “Munyi Vaisraeli muli vashiahidi vaanje; ninzi wamurovola muve varumishi vaanje, nikanyalikha mumanye khandi musuuvile mwinzi ndi ninzi Nyasaye wenyu. Avulakhuho nyasaye wundi waliho imbeli wanje, inoho khali aliitsa khuvula khuvaho.

¹¹“Ninzi Mwami Nyasaye wonyene, muhonyinyi wundi avulakhuho unyala khusasanyinywa khwinzi.

¹²Ninzi wavoola havulavu kaliitsa khwikholekha, nalwo lwa niitsa nimuhonyinya, mumatukhu ka mwali numuvula nyasaye wundi; khandi munyi navo vashiahidi vaanje.

¹³Ninzi Nyasaye, khandi niitsa khuva Nyasaye khumatukhu koosi. Avulakhuho unyala khumuhavina khurula khwinzi; kholanga muhinzilu, ni viina unyala khunzikalila?”

¹⁴Mwami Nyasaye, uli Muhavini wenyu khandi Mutakatifu wa Israeli avoolanga, “Niitsa khuruma vasikali khukwana Babilonia, khuhonyinya munyi; niitsa khumenekanyinya milondi chiavo, khandi liyooko lia Vababilonia valaanjililanga liliitsa khukalukhana khukwa liu khwikhula.

¹⁵Ninzi Mwami Nyasaye, uli Mutakatifu wenyu, Muloonji wa Israeli, uli Mwami wenyu.”

¹⁶Khale muno, Mwami Nyasaye yalomba muhaanda khukhalakanyila mu inyanza, injila khuvirila mu maruundu ki inyanza,

¹⁷Neye yali mwimilili wa makaare kiliihe nende tsifarasi, mukaanda kwa vasikali nende vandu vamanya khukwana; vakwa hasi, nivakhaywa khusinjila, khali nivavwa tsingulu khuli itaaha itsimanga.

¹⁸Navutswa Mwami Nyasaye avoolanga, “Muvuli khwitsushitsakhu vindu viavira khale, inoho khukanakanakhu vindu viakholekha khale.

¹⁹Loli, ndi himbi khukhola shindu shiyia; khali shikholekhanga, navutswa mwakhaywa khulola! Niitsa khulomba injila mwichendanyama, khali michela mu shiangalangwi.

²⁰Tsinyama tsiumbulimu tsiliitsa khumba luyali, khali vivwe nende mayahutu kaliitsa khunzitsominya, shichila niitsa khulera matsi mwichendanyama, khandi michela mu shiangalangwi, vandu vaanje va narovola valinyola matsi ku khung'wa,

²¹nivali vandu va mwene naloonga, nikanyalikha vanzitsominyi.”

²²Mwami Nyasaye avoolanga, “Munyi vandu vu lwivulu lwa Yakobo, mwayambakhana khusaala khwinzi; navutswa namuteteshitsa munyi Vaisraeli!

²³Mushili khunderela likondi lienyu li shihanwa shiu khusambwa, inoho khumba luyali shichila misango chienyu. Khali shili khumunyashitsa khwenya munderele vihanwa vienyu, inoho khumuteteshitsa lwa mureevanga mumbe vubani.

²⁴Mushili khungulilakhu makura ku musayituni ni tsisenti tsienyu, inoho khunyanzitsa ni misango chi vivana chia muhaananga. Nikhali mwanditohitsa nu vwoni vwenyu; mwandeteshitsa nu vutamanu vwa mukholanga.

²⁵Khali ndio, ninzi Nyasaye usemehanga vwoni vwenyu shichila luyali lwanje mwene; khandi niitsa khulekha khwitsushitsakhu vwoni vwenyu.

²⁶“Mboleli niiva muli ni likhuva ninzi, leshi khuhulishitsane; mboleli kachilanga numunzala kaloleshe mukholanga katoto.

²⁷Kuuka wenyu wu khuraanga yakhola vwoni, khali vimilili venyu vamuleraanga khwinzi vakholela vutamanu.

²⁸Khulwa yako, ninzi wononyinya vimilili venyu vakholanga muhinzilu Havundu Hatakatifu; ninzi wachila vandu va Yakobo nivativitswa, khandi Vaisraeli nivanyekwa.”