Read tsotso ISAYA 9 Bible Online

ISAYA 9 - tsotso bible

ISAYA 9

¹Navutswa vandu vanyashitswangwa valiitsa khuvula khutuunya. Tsisomo tsia vandu vi tsimbia tsia Zabuloni nende Nafutali vali vaheelwa tsisoni; navutswa valiitsa khuheelwa luyali mumatukhu kaliitsa khuvaho, khuraanjila khu Inyanza ya Meditarenia khutsia khutukha khu shivala khuluveka lundi lu Muchela kwa Yorodani, khali mu lusomo lwa Galilaya, wa vandu vi tsimbia tsindi vamenyanga.

²Vandu vachendelanga mu shisuundi valoli vulavu vukali; yavo vamenyanga mu shivala shi shisuundi shikali tititi vulavu vumali khuvwashila.

³Nyasaye, nivi wa vambalitsa luhia khali wachila vali nu vuyaanzi vunyishi; vikhoyelanga imbeli wowo, vali nu vuyaanzi khuli nu mumatukhu ki lichesa, khuli vandu vavetsanga nu vuyaanzi lwa vakavananga vindu via vayaaya;

⁴shichila muchochi kwa valitohitsanga, khandi indovoshi ya va vashiutilanga khu maveeka kavo, shivoko shia vandu va vatambitsanga, nivi watong'olanyinya khuli wakhola lwa wakuura vasikali va Midiani.

⁵Shia likambuti liosi liu musikali akwanilanga, khandi shia inguvu yosi yitivanila masahi iliitsa khusambwa khuli tsikhuyi tsiu khuvwanila mulilu;

⁶shichila mwana umali khwivulwa mu khutsi, khumali khuheelwa mwana wi shiyayi; neye alitsa khuva mwami. Neye aliitsa khulaangwa, “Mukhonyani wu Khuchenyinya,” “Mwami Nyasaye”, “Tata wi Mihika ni Mihika”, “Mwami wi Milembe.”

⁷Vunyali vwevwe muliamiha shivala vulatsililila khuhindila, milembe chiliitsa khutsililila khuvaho shichila aliitsa khwikhala khu shisoko shiu vwami shiali shia kuuka wewe Daudi, nu khwamiha shivala shieshie; Aliitsa khushiamiha narweshitsanga katoto nende likhola liu vulunji, khuraanjila nunundi khandi mihika ni mihika. Mwami Nyasaye wi Mikaanda Chiliihe ali ni shinani shiu khukhola kenako.

⁸Mwami Nyasaye uvooli likhuva shichila Yakobo, nalio liliitsa khukwila Israeli;

⁹nalwo lwa vandu voosi valiitsa khumanya, vandu vuluhia lwa Efurahimu khandi litaala lia Samaria -- vilola khandi vi shileeche. Vavoolanga,

¹⁰“Matofari ki lisisi kamala khukwa hasi, navutswa khuliitsa khumbakha na machina kakhongwa; misala chi mikhuyu chimali khureemelwa hasi, navutswa khuliitsa khuvikha misala milahi chia ceda havukono hachio.”

¹¹Navutswa Mwami Nyasaye umali khusona vatsiku vavo khuvakwana nu khuvwanyinya mulilu muvo.

¹²Vasiria khuluveka luli ivukwi khandi Vafilisti khuluveka luli imbo, valaaminyi minwa khumiila Israeli. Khali ndio, vurima vu Mwami Nyasaye vuliitsa khuvula khucheha; ali ni lienya liu khutsililila khuvasalilitsa.

¹³Khali niiva yasalilitsa vandu, vambakhana khukhava Mwami Nyasaye wi Mikaanda Chiliihe.

¹⁴Mwami Nyasaye aliitsa khureemela hasi shirwi nende mushiila mu Israeli; lusia lu musala kwa mashindu nende shitundu khulitukhu lilala.

¹⁵Shirwi navo vasakhulu nende vandu vaheelwa luyali; vaprofeti veechitsanga vandu vuvehi, navo mushiila;

¹⁶shichila vimilili va vandu venavo va vakoritsa, khandi vandu va vimililanga vakoyanyinywa.

¹⁷Nashio shivune shichilanga Mwami Nyasaye navula khuvela tsimbavasi vaana vavo vavukhu, khandi shichila shia mundu wosi nu mwoni, khandi akholanga vindu vitamanu, khandi shia mundu wosi alomolomanga vindu viu vuyiingwa. Khali ndio, vurima vu Mwami Nyasaye vuliitsa khuvula khucheha; ali ni lienya liu khutsililila khuvasalilitsa.

¹⁸Ni kilikali, vutamanu vwakhanga khuli mulilu, kulaalitsanga maraakalu nende mavwa, khali kuyeelitsanga muliru kwosi, ma mwooshi kulanda nu kutuuma mwikulu.

¹⁹Shivala shisambwangwa khuvirila khu vurima vu Mwami Nyasaye wi Mikaanda Chiliihe; khandi vandu vakwa khuli tsikhuyi tsiu khuhaambitsila mulilu; mundu avulakhuho ulolelanga amwavo wewe tsimbavasi.

²⁰Vanuulanga vandu vindu viavio, navutswa vishili khuvatukha, valiitsanga shiukhulia, navutswa vakhaywa khwikura. Shia mulala khuvo akwananga weshie.

²¹Vandu vuluhia lwa Manaase valiitsa khukwana vandu vuluhia lwa Efurahimu, vandu vuluhia lwa Efurahimu valiitsa khukwana vandu vuluhia lwa Manaase; ma tsimbia tsiosi tsilikwana vandu va Yuda. Khali niiva kaliitsa khwikholekha kario, vurima vu Mwami Nyasaye vuliitsa khuvula khucheha; aliitsa khutsililila khuvasalilitsa.