Read tsotso LEVI 16 Bible Online

LEVI 16 - tsotso bible

LEVI 16

¹Mwami Nyasaye yalomoloma khu Musa lwa vaana vavili va Haruni himbi khu Mwami Nyasaye.

²Mwami Nyasaye yavoolela Musa, “Voolela amwavo wowo Haruni ndi anyala khutsia isaa yenyekhanga yonyene inyuma wu luvaala khutukha Havundu Hatakatifu Hene, shichila naho havundu ha niitsa khulolekha mu malesi, kali ikulu wi shindu shiu khukhunishila ikulu wi Lisanduku li Lilakano. Niiva aliitsa khwambakhana khulonda malako kenako, aliitsa khwiirwa.

³Haruni aliitsa khwinjila vutswa Havundu Hatakatifu Hene, lwa aliitsa khuva niyakhalera shihunwa shiu khuhaana khuli shihanwa shiu khurulitsaho vwoni nende likondi limiiko liu khuhaana khuli shihanwa shiu khusambwa.

⁴“Mwami Nyasaye yahaana mivaalo yaka. Haruni nashili khwinjila Havundu Hatakatifu Hene, yenyekhanga yisinji na matsi, mayifwale tsinguvu tsiu vusalisi: ikaanzu indavu nende tsisurwali, lukhanda, nende shilemba khu murwi kwekwe.

⁵“Vaisraeli valiitsa khuha Haruni tsimbuli tsikhole tsivili, tsi shihanwa shiu khurulitsaho vwoni nende likondi limiiko li shihanwa shiu khusambwa.

⁶Haruni aliitsa khusinza shihunwa shienesho, khuli musango ku khurulitsaho vwoni vwevwe mwene, khandi vwoni vwa vandu vi inzu yeye.

⁷Haruni aliitsa khuhila tsimbuli tsivili tsienetso mu vwinjililu vwi Liheemo Litakatifu.

⁸Haruni alakhuvila havundu henaho ikura khu tsimbuli tsivili; ikura yu khuraanga iliitsa khuva yu Mwami Nyasaye, khandi yindi ya Azazeli.

⁹Haruni aliitsa khusinza imbuli yarovolwa khuvirila khu ikura khu Mwami Nyasaye, nu khuchihaana khuli shihanwa shiu khurulitsaho vwoni.

¹⁰Imbuli yali niyarovolwa khuvirila khu ikura khu Azazeli, iliitsa khuhaanwa ni shili mwoyo khu Mwami Nyasaye, nu khukhungwa khutsia mu shiangalangwi khu Azazeli, khu vwoni vwa vandu vurulitswiho.

¹¹“Lwa Haruni asinza shihunwa shienesho, khuli musango kwi shihanwa shiu khurulitsaho vwoni vwevwe mwene, khandi vwoni vwa vandu vi inzu yeye,

¹²aliitsa khuvukula lucho nulwitsuli mandaa kakhanga mulilu khurula khu vwaali nende tsikhovi tsivili tsiu vubani, mavilere Havundu Hatakatifu Hene.

¹³Haruni aliitsa khuvikha vubani vwenovo mu mulilu imbeli wu Mwami Nyasaye, khandi liooshi lirulanga khu vubani lilakhunikha shindu shiu khukhunishila Lisanduku li Lilakano, khuvula khulilola nu khukhutsa.

¹⁴Haruni aliitsa khuvukula masahi mati ki shihunwa nu khurumishili shitere shieshie khukamitsa imbeli wi shindu shiu khukhunishila Lisanduku li Lilakano mamitse masahi kandi hali saba imbeli wi Lisanduku li Lilakano.

¹⁵“Lwa aliitsa khuva ni yakhakhola kenako, aliitsa khusinza imbuli yi shihanwa shiu khurulitsaho vwoni vwa vandu, alere masahi kayo Havundu Hatakatifu Hene, khandi akamitse khu shindu shiu khukhunishila Lisanduku li Lilakano, khandi imbeli wi Lisanduku li Lilakano, khuli yakhola na masahi ki shihunwa.

¹⁶Munjila yeneyo, aliitsa khuva nakholanga mulukha ku khukhola Havundu Hatakatifu Hene khuva hanihu khurula mulionekha lia Vaisraeli, khandi khurula mu vwoni vwavo vwosi. Aliitsa khukhola malala mele khu Liheemo Litakatifu, shichila liasinjila hakari mu maheemo ka vandu vamenyamu, lioneshe khulondokhana khu mulukha.

¹⁷Mundu aliitsa khuvula khuvakhu mu Liheemo Litakatifu lwa Haruni, aliitsa khwinjila Havundu Hatakatifu Hene, khukhola mulukha ku khwinihitswa khutukha lwa aliitsa khurulamu; niyakhamala khukhola mwene mulukha ku khuva munihu, kwa vandu vi inzu yeye, khandi kwa Vaisraeli voosi.

¹⁸Haruni aliitsa khutsia khandi khu vwaali vuli imbeli wu Mwami Nyasaye, nu khuvukhola khuva vunihu. Aliitsa khuvukula masahi mati ki shihunwa, khandi masahi kandi ki imbuli akaveshe koosi khu misala chiasinjilitswa mu tsimbeka tsiu vwaali.

¹⁹Aliitsa khumitsa hali saba masahi mati khu vwaali narumishilanga shitere shieshie. Munjila yeneyo aliitsa khuva navukholanga khuva vunihu, khurula mu vwoni vwa Vaisraeli, nu khuvukhola khuva vutakatifu.

²⁰“Lwa Haruni ava niyakhamala khukhola mulukha ku khunihitsa Havundu Hatakatifu Hene, havundu handi hi Liheemo Litakatifu liu khuvaho khu Mwami, halala nu vwaali, aliitsa khuhaana imbuli ishili mwoyo khu Mwami.

²¹Aliitsa khuvikha makhono keke kavili khu murwi kwi imbuli yeneyo, nu khuvooka havulavu vutamanu vwosi khuyo, vwoni, khandi mahingani ka Vaisraeli, mavusiuvi khu murwi kwi imbuli. Imbuli yeneyo iliitsa khukhungwa khutsia mu shiangalangwi, nu mundu warovolwa khukhola muhinzilu kwenoko.

²²Imbuli yeneyo, iliitsa khuchinga vwoni vwosi khutukha havundu ha vandu vakhamenyanga tawe. Aliitsa khulekha imbuli yeneyo, khutsia mu shiangalangwi.

²³“Haruni aliitsa khutsia mu Liheemo Litakatifu, anavulilimu tsinguvu tsiu vusalisi, tsia yifwala nashili khwinjila Havundu Hatakatifu Hene, nu khutsilekhamu.

²⁴Aliitsa khwisinjila Havundu Hatakatifu, mayifwale tsinguvu tsietsie tsia khase khosi. Niyakhamala khukhola kenako, aliitsa khutsia ilwanyi khuhaana shihanwa shiu khusambwa shiu khurulitsaho vwoni vwevwe mwene, khandi vwoni vwa vandu.

²⁵Haruni aliitsa khusambila khu vwaali shivana shiu muruku kwa vahaani, khuli shihanwa shiu khurulitsaho vwoni.

²⁶Mundu wakhunganyinya imbuli nitsia mu shiangalangwi khu Azazeli, aliitsa khufuya tsinguvu tsietsie, nu khwisinga na matsi, nashili khukalukha mu maheemo ka vandu vamenyamu.

²⁷Shihunwa nende imbuli yahaanwa khuli shihanwa shiu khurulitsaho vwoni, miruku chia masahi kachio kahilwa Havundu Hatakatifu Hene, khurulitsaho vwoni, chiliitsa khuhilwa ihale wene khurula mu maheemo ka vandu vamenyanga, nu khusambilwayo. Liseelo, inyama, nende maala viosi, viliitsa khusambwa nu mulilu.

²⁸Mundu uliitsa khuvisamba, aliitsa khufuya tsinguvu tsietsie, nu khwisinga na matsi; niyakhamala khukhola kenako, aliitsa khwinjila mu maheemo ka Vaisraeli vamenyamu.

²⁹“Malako yaka kaliitsa khutsililila khulondwa, khumatukhu koosi kaliitsa khuvaho. Khulitukhu li likhomi mweli wa saba, Vaisraeli nende vacheni vamenyanga muvo valiitsa khuhonga vuchila khulia, nu khuvula khukholakhu muhinzilu kwosi.

³⁰Khulitukhu lienelo, valiitsa khukhola mulukha ku khurulitsho vwoni vwa vandu khu vave vanihu khulondokhana khu mulukha.

³¹Litukhu lienelo, liliitsa khuva litakatifu muno; litukhu lia valiitsa khuhonga vuchila khulia, khandi vuchila khukholakhu muhinzilu kwosi.

³²Mukali wa vasalisi voosi, wavekhwa makura khuva musalisi nu khukholwa khuva musalisi khuvukula havukono ha tata wewe, aliitsa khukhola mulukha ku khwinihitswa. Aliitsa khufwala tsinguvu tsiu vusalisi

³³nu khukhola mulukha ku khunihitsa Havundu Hatakatifu Hene, havundu handi hi Liheemo Litakatifu, vwaali, vasalisi, nende Vaisraeli vandi voosi.

³⁴Malako yaka, kaliitsa khutsililila khulondwa, khumatukhu koosi kaliitsa khuvaho. Mulukha yuku kuliitsa khukholwa lulala lwonyene vutswa khumuhika, khukhola Vaisraeli, khuva vanihu khurula mu vwoni vwavo vwosi.” Nalwo lwa Musa yakhola khuli Mwami Nyasaye yali namuvoolele akhole.