Read tsotso LEVI 21 Bible Online

LEVI 21 - tsotso bible

LEVI 21

¹Mwami Nyasaye yavoolela Musa, “Lomoloma khu vasalisi, nivali vaana va Haruni, uvavoolele ndi khali mulala khuvo, avuli khuva woneshe, lwa asanganga mu milukha chi likhutsa chikholekhanga mu vandu veve;

²nikakhali mwiikho wewe wa hahimbi, ave ni mama wewe inoho tata wewe, mwana wewe wi shiyayi inoho mwana wi shikhana, amwavo wewe,

³inoho mbotso wewe muchima, ushili khutsia lukhali, ushili mu inzu yavo.

⁴Mundu mwenoyo, aliitsa khuvula khuva woneshe, khuvirila khu likhutsa liu mwiikho wewe.

⁵“Musalisi aliitsa khuvula khuvekakhu luhale khu liswi lielie, inoho khu tsindulu tsia matelu keke inoho khwisalaaka mmbili kwekwe, khumanyinya ndi yikhulanga.

⁶Valiitsa khuva vatakatifu khu Nyasaye wavo; nu khuvula khwononyinya lira lia Nyasaye wavo; shichila navo vahaananga vihanwa vi viukhulia, khuvirila khu mulilu khu Mwami Nyasaye. Khulwa yako, valiitsa khuva vatakatifu.

⁷Musalisi aliitsa khuvula khuhilakhu mukhali wu kholanga vulaaya, inoho mukhali wonoshe. Khali aliitsa khuvula khuhilakhu mukhali walekhana nu musatsa wewe, shichila musalisi nu mundu mutakatifu khu Nyasaye wewe.

⁸Muliitsa khumuvukula khuva mutakatifu; shichila neye uhaananga vihanwa vi viukhulia khu Nyasaye wenyu. Mwami Nyasaye, neye mutakatifu khandi neye uchilanga munyi numuva vatakatifu.

⁹Niiva mwana wi shikhana wu musalisi, aliitsa khukwa mulaaya lwa akholanga vulaaya, mwana wi shikhana mwenoyo, yononyilanga tata wewe lira. Aliitsa khusambwa nu mulilu.

¹⁰“Mukali wa vasalisi voosi, wavekhwa makura khandi wakholwa khuva mutakatifu, khwifwala tsinguvu tsiu vusalisi, aliitsa khuvula khuyumbitsakhu liswi lielie, inoho khurandula tsinguvu tsietsie, khumanyinya ndi yikhulanga.

¹¹Aliitsa khuvula khwinjilakhu havundu wu mmbili ku mukhutsu kuli. Aliitsa khuvula khwiyononyinywa mwene, khali shichila likhutsa lia tata wewe inoho mama wewe;

¹²inoho khali khurula Havundu Hatakatifu inoho khwononyinya Havundu Hatakatifu ha Nyasaye wewe; shichila wakholwa khuva mutakatifu, lwa yavekhwa makura ku Nyasaye wewe. Ninzi Mwami Nyasaye.

¹³Musalisi, aliitsa khuhila mwana wi shikhana muchima.

¹⁴Shialiitsa khuhilakhu mukhutsakhali, inoho mukhali walekhana nu musatsa inoho mukhali wu kholanga vulaaya tawe; navutswa aliitsa khuhila mwana wi shikhana muchima khurula mu vandu vu lwivulu lwelwe,

¹⁵nikanyalikha khuvula khwononyinya vaana veve mu vandu veve. Ninzi Mwami Nyasaye, uchilanga nava mutakatifu.”

¹⁶Mwami Nyasaye yavoolela Musa,

¹⁷avoolele Haruni, “Mundu avulakhuho, mu vitsukhulu vovo khumatukhu koosi kaliitsa khuvaho uli ni imbala yosi khu mmbili kwekwe uliitsa khuhaanakhu shihanwa shi shiukhulia khu Mwami Nyasaye.

¹⁸Mundu avulakhuho uli ni imbala khu mmbili kwekwe, ave wavekhula, walema, wasulunya mu moni inoho washiamakana;

¹⁹ave wafokoya mukhono inoho shilenje;

²⁰inoho ave ali ni shikukhu inoho wayimbiha muno inoho ave walwala tsimoni inoho walwala vuchele inoho ave khali ni shitsili uliitsa khuvula khuhaanakhu vihanwa vi viukhulia khu Nyasaye wewe.

²¹Avulakhuho mwitsukhulu wu musalisi Haruni, uli ni imbala khu mmbili kwekwe, uliitsa khuhaana shihanwa shi shiukhulia khu Mwami Nyasaye. Lwa ali ni imbala khu mmbili kwekwe, aliitsa khuvula khutsiakhu khu vwaali khuhaana shihanwa shi shiukhulia khu Nyasaye wewe.

²²Mundu khuli mwenoyo, anyala khulia shiukhulia shi shihanwa, shia vahaananga khu Nyasaye wewe, kave ni shihanwa shi shiukhulia shitakatifu inoho shihanwa shi shiukhulia shitakatifu shiene muno;

²³navutswa shichila ali ni imbala khu mmbili kwekwe, aliitsa khuvula khwisuundakhu khali himbi khu luvaala lutakatifu inoho khu vwaali. Aliitsa khulekha khwononyinya Havundu Hatakatifu hanje; shichila inzi Mwami Nyasaye njilanga vindu vienevo niviva vitakatifu.”

²⁴Khulwa yako, Musa yalomoloma khu Haruni nende vaana va Haruni, halala na Vaisraeli voosi.