Read tsotso YEREMIA 16 Bible Online

YEREMIA 16 - tsotso bible

YEREMIA 16

¹Mwami Nyasaye yalomoloma khwinzi navoola,

²“Yeremia, shiuliitsa khuhila mukhali inoho khwivula vaana vi shiyayi nende vi shikhana havundu hanu tawe;

³shichila inzi Mwami Nyasaye mbolanga makhuva yaka khulondokhana khu kakholekhanga khu vaana vi shikhana nende vi shiyayi, khandi khu vamama vavivula nende vatata vachila nivivulilwa havundu hanu.

⁴Valiitsa khulwala khandi valikhutsa shichila vulwale vutamanu. Mundu avulakhuho uliitsa khuvikhula inoho khuyeveela mivili chiavo mu vilindwa. Mivili chienecho chiliitsa khuhuunya nu khulaakalala hasi khuli mavi ka vandu vanietsanga. Chiliitsa khuva khuli shiukhulia shia manyonyi nende tsinyama tsiumbulimu.

⁵“Inzi Mwami Nyasaye mbolanga, Lekha khwinjilakhu mu inzu ya vandu vikhulilanga inoho khumanyinya vuveleli vwovwo mu mwoyo; shichila mali khurulitsaho tsikhaavi tsianje, vuyaanzi vwanje nende tsimbavasi tsianje khu vandu yava.”

⁶Vandu voosi, vave vahinda nende vamanani valiitsa khukhutsila mu shivala shinu; navutswa mundu avulakhuho uliitsa khuyeveela mivili chiavo mu vilindwa, inoho khwikhula inoho khuvavela tsimbavasi inoho khuveeka liswi khumanyinya yikhulanga.

⁷Mundu avulakhuho uliitsa khulia nu mundu wikhulanga mukhutsu wewe, khwenya khumuleminya mwoyo lwa yakhutsilwa, shichila likhutsa lia mama wewe inoho tata wewe.

⁸“Lekha khwinjilakhu mu inzu ya vandu vali khu mulukha kwi lilia khandi wikhale nulia nung'wa navo;

⁹shichila inzi Mwami Nyasaye wi Mikaanda Chiliihe, uli Nyasaye wa Israeli mbolanga, ‘Niitsa khutivitsa havundu hanu liyooko liu khulaanjilila liu vuyaanzi nende lisangala, khandi likhoya liu khuhilana liu musatsa nende mwiiha wewe.’

¹⁰“Lwa uliitsa khuvoolela vandu venavo makhuva kenako koosi, khandi vakhureeve, ‘Shichila shina inzi Mwami Nyasaye nivalerela matiinyu yaka koosi? Ni shindu shina shitamanu shia khwakhola? Nu vwoni shina vwa khwakhola imbeli wu Mwami Nyasaye, uli Nyasaye weru?’

¹¹Nalwo lwa uliitsa khuvavoolela, ‘Shivune shili ndi vakuuka venyu vali vayivilila inzi, nivalonda vanyasaye vandi. Varumishila vanyasaye venavo, khandi nivasaala khuvo. Vanzivilila nivavula khulonda malako kaanje.

¹²Navutswa munyi mwamanyinya mwiima mutamanu khuvira kwa vakuuka venyu vakholanga. Lolikhu khuli shia mulala khu munyi ali muhaaka, khandi akholanga vindu vitamanu, vucheli vu khulonda malako kaanje.

¹³Khulwa yako, niitsa khumukhunga khurula mu shivala shinu khutsia khumenya mu shivala shia munyi inoho vakuuka venyu vali nivakorwa. Muliitsa khurumishilayo vanyasaye vandi mbasu nu vutukhu, khandi shiniitsa khumuvelakhu tsimbavasi tawe.’ ”

¹⁴Mwami Nyasaye avoolanga, “Ni kilikali, matukhu katsitsanga khutukha ka vandu valiitsa khuvula khwisuuha khwinzi, khuli Nyasaye uli mwoyo warulitsa Vaisraeli mu shivala shia Misri;

¹⁵Navutswa valiitsa khwisuuha khuvirila khwinzi khuli Nyasaye uli mwoyo warulitsa Vaisraeli mu shivala shili ivuluka khandi khurula mu vivala vindi, wa nali ninavasalanyinya. Niitsa khuvakalushitsa mu shivala shiavo vene, nishili shivala shia nali ninaha vakuuka vavo. Inzi Mwami Nyasaye mali khuvoola.”

¹⁶Mwami Nyasaye avoolanga, “Loli! Ndumanga likhuva khu valuvi, navo valiitsa khukumila vandu yava khuli valuvanga tsisutsi. Nimali khukhola ndio, niitsa khuruma likhuva khu vahiitsi khwitsa; navo valiitsa khuvahitsanyinya khu shia shikulu shiosi nende rukulu khandi khurula mu tsimbangaywa tsi tsinyanda.

¹⁷Ndoli shia shindu shiosi shia vakholanga; shindu shivulakhuho shiaviswa khurula khwinzi; vwoni vwa vakholanga nu vwa havulavu.

¹⁸Niitsa khuvakhola khurunga hali khavili khu vutamanu vwavo nende vwoni vwa vakhola, lwa vononyinya shivala ni misambwa chivula vulamu vwosi chilolekhanga khuli ni mivili chia vandu vakhutsa; khandi vayitsulitsa mu shivala shianje shifwavi shiavo.”

¹⁹Mwami Nyasaye, nivi uli khuli tsingulu tsianje khandi imbinga yanje; shivisilu shianje mumatukhu ku vutiinyu, vandu vi tsimbia tsiosi valiitsa khwitsa khu yivi khurula shia havundu hosi khulilova, nivavoola, “Vakuuka veru shivanyolakhu shindu shiosi tawe, navutswa vanyasaye vu vuvehi, misambwa chi shikhaya, chivulakhu vukhala vwosi khuvo.

²⁰Mundu anyala khwilombela mwene vanyasaye? Vindu khuli vienevo shivali ni vanyasaye tawe!”

²¹Khulwa yako, Mwami Nyasaye yachipa, “Ni kilikali, nzitsanga khuveechitsa, khukhola vandu vi tsimbia tsindi tsiosi, khumanya tsingulu tsianje nende vunyali vwanje lulala nalwo lwene. Valiitsa khumanya lira lianje ndi ninzi Mwami Nyasaye.”