Read tsotso YEREMIA 2 Bible Online

YEREMIA 2 - tsotso bible

YEREMIA 2

¹Mwami Nyasaye yambolela

²nzi khwilwatsa likhuva khu shia mundu wosi mu Yerusalemi, nimbola, “Nzitsushitsanga khuli wali musuuvilwa khwinzi nushili muvukha, khuli wali nu wanyanza mumatukhu ka wali nuli mwiiha, khuli wanondanga mu shiangalangwi, mu shivala shia vali nivashili khuraakamu shindu.

³Israeli, nivi wali mutakatifu khwinzi; wali khuli shiraakwa shiukhuraanga khucheswa mu mulimi. Shia mundu wosi washiliakhu, neye wa nasalilitsa; khali matiinyu kamukwila. Inzi Mwami Nyasaye mali khuvoola.”

⁴Munyi vandu va Yuda, muhulishitsi likhuva liu Mwami Nyasaye, munyi vandu vi tsimbia tsia Israeli, muhulishitsi.

⁵Mwami Nyasaye avoolanga, “Ni shindu shina shitamanu shia vakuuka venyu valola khwinzi khali nivanzivilila nivasaala khu vindu vi shikhaya, nivavula khuva nu vukhonyi vwosi?

⁶Khali shivareevanakhu ali hena Mwami Nyasaye, wa khurulitsa mu shivala shia Misri akhukalushile, woyo w akhwimilila mwichendanyama, mu shivala shi viangalangwi nende miina, mu shivala shi inzala nende shisuundi titi, mu shivala shiu mundu avula khukhalakanyilamu, mwa mundu akhamenyamu tawe.

⁷Ninzi wamulera mu shivala shi lilova linuulu, khwikhoyela viraakwa viashio nende vindu vindi vilahi. Navutswa munyi mwononyinya shivala shianje lwa mwinjilamu, khandi numukhola shifwavi hango ha nali nimuheele munyi.

⁸Khali vasalisi shivareevakhu, ‘Ni hena wu Mwami Nyasaye ali?’ Khali yavo valindanga malako vanzivilila; vamihi vakholela vindu vitamanu; Vaprofeti vaprofeta khuvirila mu lira lia Baali nivasaala khu vindu vi shikhaya.”

⁹Mwami Nyasaye avoolanga, “Nu munyi navo vanzalanga, khandi nzalanga vitsukhulu venyu.

¹⁰Yambushi inyanza mutsi imbo khu shisuulu shia Saipurasi mulole, rumi mundu mu shivala shia Kedari khurunishitsa vulahi muno; nikava shindu khuli shienesho shinyala khuva shiakholekhakhu.

¹¹Shivala shivulakhuho shia kalukhanyinya nyasaye washio, navutswa vandu vaanje vakalukhanyinya inzi, nindi vukhumi vwavo khulonda yeshio shi shikhaya vutswa.

¹²Yivi likulu, heendela mwoyo yaka, uve ni lichenya, ukoyane muno. Inzi Mwami Nyasaye mali khuvoola,

¹³shichila vandu vaanje vakholi vwoni hali khavili; khali vanzivilila inzi, uli khuli shirula shia matsi ku vulamu, vayiyeveela vene tsisieveye, tsisieveye tsialikuukha tsikhanyala khutiila matsi tawe.

¹⁴Kanyala khuva kilikali Israeli nu murukwa, inoho wayivulwa mu vurukwa? Niiva shikali kario tawe, shichila shina ahitsanyinywangwa?

¹⁵Tsisimba tsihuma humanga shichila ye; shivala shieshie shiarikala shiangalangwi, mataala keke kakwa lichiinga, vuchila vandu khumenyamu.

¹⁶Khumeeta khu kenako, vandu khurula Memufisi nende Tapanihesi vasionola shihaanga shieshie.

¹⁷Israeli, nivi wilerela mwene kenako koosi! Nivi wanzambakhana inzi Mwami Nyasaye, uli Nyasaye wowo lwa ya khwimilila khu injila?

¹⁸Nu vukhala shina vwa uliitsa khunyola nukalukha Misri, khutsia khung'wa matsi ku Muchela kwa Naili? Inoho nu vukhala shina vwa uliitsa khunyola nutsia mu shivala shia Ashuria, khutsia khung'wa matsi ku Muchela kwa Efurate?

¹⁹Vutamanu vwovwo mwene navwo vuliitsa khukhusalilitsa, mahingani koko khwinzi kaliitsa khuchila wakhalachilwa. Uliitsa khumanya khuli kasalilitsanga khandi khuli shili shindu shitamanu khulekhana ninzi; khali wayambakhana khumba luyali. Inzi Mwami Nyasaye wi Mikaanda Chiliihe, uli Nyasaye wowo mali khuvoola.”

²⁰Mwami Nyasaye avoolanga, “Yivi Israeli, khurula khale wayambakhana inzi khukhwamiha; wali wayambakhana khulonda malako kaanje nu khusaala khwinzi. Wali wamenya nutsitsanga khu shia shikulu khandi hasi ha shia musala kwosi muviisi khusaala khu vanyasaye vu vunuulu vwi lilova khandi vu lwivulu.

²¹Khali ndio, ninzi wakhuraaka yivi khuli musabibu mulahi khurula mu tsinzoli tsindahi, nikhali lolakhu khuli wonekha khandi wakwa musabibu kumbulimu?

²²Khali niiva unyala khwisinga nu munyu kwi likooshe, nurumishila isavuni inyishi muno, vutamanu vwa wakhola vulolekhanga imbeli wanje. Inzi Mwami Nyasaye mali khuvoola.

²³“Unyala khuvoola munjila shina, ‘Shili khwonekha; shili khusaalakhu khu Mabaali?’ Lolakhu khuli wakhola vwoni mu luhoongo; yitsushitsakhu ka wakhola -- wali khuli ingamia ikhali, nishiamanga iyi neyo lwa yilukhanga,

²⁴khuli ipunda yumbulimu yayaanzilila mu shiangalangwi. Lwa ivetsanga niyenyi khukona ni yindi, ni viina uli nu vunyali vu khuchikalila? Isatsa yosi ichikhavanga khutukha inyakhane muno; inyolekhanga mumatukhu ka ivetsanga niyirecheshe.

²⁵“Yivi Israeli, uvuli khwilukhaka waluhilila vilenje, inoho vuluhu vunyala khukhuvuha. Navutswa wavoola, ‘Mbula lisuuvilitswa, shichila nayaanza vanyasaye vi tsimbia tsindi, khandi navo va niitsa khulondelela.’”

²⁶Mwami Nyasaye avoolanga, “Khuli shihuuvi shinyolanga tsisoni nishimali khukumilwa, nindio khandi munyi Vaisraeli muliitsa khunyola tsisoni, munyi voosi, vami venyu, vimilili venyu, vasalisi venyu nende vaprofeti venyu,

²⁷munyi vamuvoolelanga musala, ‘Uli tata wanje,’ nu muvoolela lichina, ‘Nivi wanzivula.’ Kaliitsa khwikholekha lwa mwanzivilila inzi Mwami Nyasaye, vukhala vu khwisuunda khwinzi. Navutswa numunyoli vutiinyu muvoolanga, ‘Hamba ukhuhonyinye!’

²⁸“Navutswa ni hena ha vanyasaye vamwalomba vene vali? Leshi vitsi, niiva vanyala khumuhonyinya numuli mu vutiinyu! Yivi Yuda, uli na vanyasaye vanyishi khuli mataala ka uli nako.

²⁹Shichila shina wilililanga shichila inzi? Munyi voosi mwambinganyinya. Inzi Mwami Nyasaye mali khuvoola.

³⁰Ninzi wasalilitsa vandu venyu mu shikhaya; khali nivambakhana khuchelihitswa. Munyi vene navo vamwiira vaprofeti venyu khuli isimba indulu ilumakanyinyanga shindu.

³¹Munyi Vaisraeli, muhulishitsi ka Inzi Mwami Nyasaye mbolanga, Ndolekhanga khu munyi khuli shiangalangwi, inoho khuli shivala shi shisuundi tititi? Shichila shina munyi vandu vaanje muvoolanga, ‘Khuli vavoholole, shiu khuliitsa khukalukha khukhulola tawe?’ Muliitsa khukhola ka vene mulolanga ni malahi, khali muliitsa khuvula khukalukha khwinzi.

³²Toto, mwana wi shikhana anyala khwivilila viuma vievie inoho mwiiha tsinguvu tsietsie tsiu mulukha ku khuhilana? Navutswa vandu vaanje vanzivilila khumatukhu manyishi kakhanyala khuvalitswa tawe.

³³Muli nu vucheli vu khuhitsanyinya vayaanze! Khali mwayechitsa vakhali vatamanu khulonda mwiima kwenyu.

³⁴Khali tsinguvu tsienyu tsia yitavanila musahi kwa vandu vamanani khandi vavula vutamanu vwosi; khali mushili khuvanyolakhu ni vamuhuuvilanga. Khali niiva vindu yivi viosi vikholekhanga

³⁵munyi muvoolanga, ‘Khuvula vutamanu vwosi; ni kilikali vurima vwevwe vwamala khuvwa.’ Navutswa niitsa khumukhalachila shichila muvoolanga, ‘Khushili khukholakhu vwoni.’

³⁶Mwayikhola khuva va hasi muno lwa mukalukhananga! Shivala shia Misri shilitsa khumukhola tsisoni khuli shivala shia Ashuria shiamukhola tsisoni.

³⁷Khali munyi muliitsa khurulayo numwikumili makhono kenyu khu mirwi mu tsisoni; shichila Mwami Nyasaye wayambakhana yavo va waramu lisuuvilitsa; shindu shivulakhuho shiuliitsa khunyola khurula khuvo.”