Read tsotso YEREMIA 27 Bible Online

YEREMIA 27 - tsotso bible

YEREMIA 27

¹Lwa Zedekia mwana wa Yosia yaraanga khwamiha Yuda, Mwami Nyasaye yavoolela Yeremia,

²“Yilombele mwene mukoye khurula khu liseelo nende milondi chiu muchochi wiyachikhi khu maveeka koko.

³Numali khukhola ndio, urumi varumwa vitsi mu Yerusalemi khulola Mwami Zedekia wa Yuda khulomoloma nu Mwami wa Edomu, Mwami wa Moabu, Mwami wa Amoni, Mwami wa Tiro, nende Mwami wa Sidoni;

⁴Vavoolele vatsi khuvoolela varuchi vavo ndi Mwami Nyasaye wi Mikaanda Chiliihe avoolanga ndi

⁵Ninzi walomba lilova khuvirila mu vunyali vwi tsingulu tsianje nende vunyali vwanje. Nalomba khandi mundu nende tsinyama tsiosi tsili mwoyo khulilova khunu. Navio vindu viambetsanga mundu wa ndolanga utushili khuheelwa.

⁶Mbele murumishi wanje Mwami Nebukadineza wa Babilonia vunyali vu khukwana vivala yivi viosi. Khali kholi tsinyama tsiumbulimu tsive ni tsimurumishilanga.

⁷Vandu vu tsimbia tsiosi valiitsa khumurumishila ye, vaana veve nende vitsukhulu veve khutukha lwa matukhu kaliitsa khutukha lwi shivala shieshie shiliitsa khutivitswa. Nako matukhu ka vandu vi tsimbia tsi tsingulu nende vami vi tsingulu, valiitsa khumukhola murukwa wavo.

⁸“Navutswa niiva vandu vuluhia lwosi inoho vwami vuliitsa khwambakhana khwamihwa nu Mwami Nebukadineza wa Babilonia, niitsa khuvasalilitsa khuvirila mu liihe, inzala nende lukhutsu khutukha lwa valiitsa khutivitswa.

⁹Khulwa yako, leshi khuhulishitsa ka vaprofeti venyu, vakhumu venyu, vakhali valooranga malooro venyu, nende valoochi venyu vamenya nivavoolanga shia khase khosi, ‘Muliitsa khuvula khurumishila Mwami Nebukadineza wa Babilonia.’

¹⁰Vamuprofetelanga vuvehi, kaliitsa khuchila mulirulitswa mu shivala shienyu, nu khuhilwa ihale wene. Niitsa khumukhunga, na munyi muliitsa khutivitswa.

¹¹Navutswa niiva vandu vuluhia lwosi valiitsa khuhuchilila khwamihwa nu Mwami Nebukadineza wa Babilonia, nu khumurumishila, nalwo lwa niitsa khuvarika mu shivala shiavo vene. Valiitsa khulima milimi chiavo nu khumenyamu. Inzi Mwami Nyasaye mali khuvoola.”

¹²Navoolela Mwami Zedekia wa Yuda makhuva malala mele. Namuvoolela, “Niiva uliitsa khuhuchilila Mwami Nebukadineza wa Babilonia khukhwamiha, khandi ulimurumishila na vandu veve, nalwo lwa utsitsanga khuva mwoyo.

¹³Shichila shina wenyanga yivi mwene halala na vandu vovo mwiiri shichila liihe, inzala, nende lukhutsu? Nako ku Mwami Nyasaye amali khuviritsa kaliitsa khwikholekha khu vandu vuluhia lwosi vambakhananga khurumishila Mwami Nebukadineza wa Babilonia.

¹⁴Muvuli khuhulishitsa vaprofeti vamuvoolelanga ndi Mwami Nebukadineza shianyala khumwamiha tawe. Vuprofeti vwa vamuvoolelanga nu vu vuvehi.

¹⁵Shiali ninzi Mwami Nyasaye wa varuma tawe; vaprofetanga vuvehi khuvirila mu lira lianje; khunomba nilikhunga vo nende vaprofeti vaprofetelanga munyi khutukha lwa mulitivitswa.”

¹⁶Nalwo lwa navoolela vasalisi nende vandu venavo voosi, “Mwami Nyasaye avoolanga, ‘Muvuli khuhulishitsa vaprofeti vavoolanga ndi vindu viarulitswa mu Litempeli lianje, viliitsa khukalushitswa khurula Babilonia. Vamuprofetelanga vuvehi.

¹⁷Muvuli khuvahulishitsa! Murumishile Mwami wa Babilonia, khu muve mwoyo. Shichila shina mwenyanga litaala likali yili lirikale khuli lichiinga lia mashindi kapomolanyinywa?

¹⁸Niiva ni vaprofeti vatoto khandi niiva vahulila likhuva liu Mwami Nyasaye, leshi vandeve inzi Mwami Nyasaye wi Mikaanda Chiliihe khulondokhana khu vindu vialekhwa mu Litempeli liu Mwami Nyasaye, mu inzu yu Mwami wa Yuda, khandi mu Yerusalemi khuvula khuhilwa mu shivala shia Babilonia.’ ”

¹⁹Mwami Nyasaye wi Mikaanda Chiliihe avoolanga makhuva yaka khulondokhana khu tsirilu, litaanji lialombwa khu mukasa, makaare, halala ni vindu vilala viarikala mu litaala likali yili,

²⁰viu Mwami Nebukadineza wa Babilonia yalekha, lwa yarulitsa mu Yerusalemi Mwami Yekonia mwana wa Yehoyakimu wamihanga Yuda, halala na vimilili voosi va Yuda nende Yerusalemi navahila Babilonia.

²¹“Hulishitsa makhuva ka inzi Mwami Nyasaye wi Mikaanda Chiliihe, uli Nyasaye wa Israeli mbolanga khulondokhana khu vindu viarikala mu Litempeli lielie, khandi mu inzu yu vwami mu shivala shia Yuda khandi mu Yerusalemi,

²²Viliitsa khuhilwa Babilonia, nu khutsililila khuvayo khutukha khulitukhu lia niitsa khuvitsushitsa. Nalwo lwa niitsa khuvikalushitsa nu khuvilera havundu hanu. Inzi Mwami Nyasaye mali khuvoola.”